THUPILTE 3
3
Thumang dinga kihantawhna
1Ka tapa ka thuhilna manghil sinlen,
ka thupiehte na lungtang in kem heh.
2Aziehpen tuaten na damsung ni leh kumte,
asausah dinga lungmuonna kiningching,
ahing pieh belap nalai ding hi.
3Khotuona leh thutah hasuo sinlen,
na ngawngah viel inlen,
na lungtang suongpeh tungah giel in.
4 #
Luk. 2.52
Tuachi’n Pasian leh mihing mitmu ah deisahna leh,
ngaisangna na nga ding hi.
5Na lungtang zousie in Mangpa muong inlen,
nangma theina ah kinga sin.
6Na lampi zousie ama theisah in,
tuachi’n Aman na lampite atangsah ding hi.
7 #
Rom. 12.16
Nangma theina toh kipilsah sinlen,
Mangpa giing inlen,
gilou taisan in.
8Tami na tahsa pumpi a dingin damna ahi dinga,
na gute adingin hatna ahi ding hi.
9Na nei nalam leh na louma a gamasate zousie in,
Mangpa pahtawi in.
10Tuachi’n na annbuhte khu bu in ahing dimlet dinga,
na belpi liente zong uoin tha in adimlet ding hi.
11 #
Job. 5.17
#
Heb. 12.5,6 Ka tapa Mangpa phawhhilna ngaidau sinlen,
ahing suhdihnate zong chimtah sin.
12 #
Kihil. 3.19
Aziehpen pa in apahtat atapa athunun bangin,
Mangpa’n a itte ahoina dingun aphawhhil zel hi.
13Pilna mu khu mi hampha ahi a,
theisiemna mu mi khu mi nunnuom ahi.
14Aziehpen dangka sum nei sangin aphatuom zaw a,
tualeh apunna zong sana siengset sangin ahoizaw hi.
15Pilna khu suongmanpha rubi sangin amanpha zaw a,
tualeh na deithusam a na lunggulte toh zong,
tekah thei guol ahi sih hi.
16A khut ziet lam ah damsawtnate a um a,
akhut veilam ah hausatna leh pahtawinate a um hi.
17Ama lampite khu lungnopna lampi ahi a,
tualeh alampite zousie hamuonna lampite ahi hi.
18Ama tuchintente a dingin hinna sing ahia,
ama nei denten nuom asa uhi.
19Mangpa’n pilna in leitung amukhie a,
theisiemna in vante asudet hi.
20Atheina in tuithuhtahte apohkeh sah a,
meilumten vandaituite atakhe sah hi.
21Ka tapa na mitte akipat in tamte peimang sah sinlen,
pilnagil leh sie leh pha khensiemna kem ngitnget in.
22Tuachi’n na hagau a dingin hinna ahi dinga,
na ngawnga dingin kizepna kilawmtah ahi ding hi.
23Tuachi’n na lampi ah bittah in na pei dinga,
na keng na sui sih ding hi.
24Na lup chiengin na zausih dinga,
na i mut atui ding hi.
25Thakhat a patauna zau sinlen,
migiloute tunga sietna ahing tun chiengin zong zausin.
26Aziehpen na lungmuonna Mangpa ahi dinga,
na keng awhlouna dingin aveng ding hi.
27Na bawl thei ahi nahpou leh,
a tang dinga kilawmte silhoi it sin.
28Na nei nah pouleh,
na innveng kungah “Pei phot inlen,
zing chiengin hing hawkia in hing na pevang,”
chi’n nuasawl kia sin.
29Na innveng in nang hing muonga,
na kunga teng ahiziehin asietna ding ngaituo sin.
30Na sietna ding bangma abawl sih pouleh,
azieh bei in mi toh kihau sin.
31Thagum suo mi eng sinlen,
agamtatnate uh khatbeh zong zuisin.
32Aziehpen mi tatsete Mangpa’n akidah a,
hinanleh midihtatte pen athuguh kem dingin zong amuong nalai hi.
33Migiloute innsung ah Mangpa hamsietna a um a,
hinanleh midihte innsung aguolzawl hi.
34 #
Jak. 4.6; 1 Pet. 5.5 Misimmawhatte aman asimmaw ngei ngei dinga,
mi kingaingiemte kungah hepina apie hi.
35Mipilte’n thupina aluo ding ua,
hinanleh zumna khu mi mote kaisanna ahi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.