THUPILTE 2
2
Pilna phattuomna
1Ka tapa ka thute na san a,
ka thupiehte na lungsunga na kholkhawm a,
2pilna lam a nabil nadaw a,
theisiemna lam a na lungtang na ngat leh,
3Ahi, theikah siemna theinuom a na kikou a,
theisiemna aw ngaitah suo a na hat leh,
4Dangka banga na sui a,
gou kiphum banga na sui chien a ahileh,
5Tuachi’n Mangpa giindan na hing theisiem dinga,
tualeh Pasian theina na mudoh ding hi.
6Aziehpen Mangpa’n pilna apie a,
akam a pat in theina leh theisiemna ahing pawt hi.
7Aman midihtat a dingin pilna dihtah akholkhawm a,
dihtat taha gamtate a dingin ama khu lum le-phaw ahi.
8Aman dihtatna lampite avenga,
tualeh Amisiengthoute lampi avengbit pieh zel hi.
9Tuachi’n dihtatnate leh thudihnate,
tualeh vaihawmna siemnate,
deisahtuom neilounate na hing theisiem ding hi.
10Pilna na lungtang sunga ahing lut chiengin,
na hinna in theina nuom asah hun chiengin;
11Sie leh pha khensiemna in nang ahing kembit dinga,
theisiemna in nang ahing kem ding hi.
12Pilna in migiloute lampi akipat leh,
thusie ngen gente akipat ahing hunkhe ding hi,
13Mielna lampi a pei dingin,
dihtatna lampite anuasie uh a,
14Silgilou bawl khu akipahna uh ahi a,
tualeh silgilou bawlte kipahpi mite,
15Alampite uh akawi a,
gamtat uh kawi mite lah a kipat leh,
16Numei gamtat thanghuoi leh,
kam zol zuou gensiemte lah akipat in,
ahing hunkhe ding hi.
17Ama nu’n asenlawm ngai anuasie a,
a Pasian thuhunte amanghilta hi.
18Aziehpen a inn shina lam anga a,
amanu lampi khu shina ahi.
19Amanu kunga va hawkha pouma anua peikia nawn sih ua,
hinna lampite amankha kia nawn sih uhi.
20Mi hoite lampi a na pei a,
midihtatte lampi na zui theina ding in.
21Aziehpen midihtatten gamsung aluo ding ua,
mi hoibukimte’n gam aluo den ding uhi.
22Hinanleh migiloute pen gamsung akipat suhmang ahi ding ua,
tualeh mi ginumloute tua gam akipat akibotdoh ding hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.