THUPILTE 4
4
Pilna athupipen ahi
1Tate aw, pa thuhilna ngai unlen,
theisiemna thei dingin lungluttah in ngai un.
2Aziehpen ken thuhilna hoitah ka hing pie hi,
ka dan taisan sih un.
3Ka pa tapa ka hi a,
ka nu mitmu a adeithaw ata neisun ka hi nalai in,
4Ka pa’n ahing hil a,
ka kungah,
“Na lungtangin ka thute kem inlen,
ka thupiehte zui inlen,
hing in, ahing chi hi.
5Pilna nei inlen,
theisiemna nei in,
ka kam a thute manghil sinlen,
ki heimangsan sin.
6Pilna taisan sih pou lachin ahing kembit dinga,
pilna it lachin aman ang veng ding hi.
7Pilna athupi masa pen ahi a,
tuaziehin pilna nei inlen,
na nei zousie pum in theisiemna nei in.
8Pilna pahtawi lachin aman nang ahing tawisang ding hi,
na pom chinten pouleh aman zatatna ahing peding hi.
9Na lutanga dingin hepina kizepna ahing khipsah dinga,
thupina manglukhu ahing khusah ding hi.”
10Ka tapa aw,
ka thugente ngai inlen zuiin,
tuachi’n na damsung kumte a sawt ding hi.
11Ken nangma pilna lampi ka hing hil a,
lampi dih ah ka hing pui hi.
12Na pei chiengin na kalsuon ahasa sih dinga,
na tai chiengin na kisuikha sih ding hi.
13Thuhilna tukip chinten inlen,
hasuo vawt sinlen,
kem in,
aziehpen na hinna ahi.
14Migiloute lampi ah lut sinlen,
mi hoiloute lampi ah zong pei sin.
15Tua lampi zui sinlen peel in,
kiheisan inlen nuasie in.
16Aziehpen migiloute’n silsie khat tei abawl sih u’leh,
a imu thei sih ua,
tualeh mi khat puana ding abawl sih u’leh,
a imu thei sih uhi.
17Aziehpen amauten gitlouna tanghou ane ua,
thagumsuona uoin adawn uhi.
18Hinanleh midihte lampi zingmawng khovah bang ahi a,
sunlai nisa banga tangpha sem sem bang ahi.
19Migiloute lampi pen a miel keikui a,
banga kipal ahi uoi chi nangawn athei sih uhi.
20Ka tapa ka thute ngaikhie inlen,
ka thugente ah na bil daw in.
21Na mitmu akipat in peimangsah sinlen,
na lungsim sunggil ah kem in.
22Aziehpen tuate mukhete adingin hinna ahi a,
atahsa pumpi ua ding damna ahi.
23Bangteng sangin na lungtang kem hoi in,
aziehpen tuana kipat a hinna tuinah hing luongkhie ahi hi.
24Khelhamna kam koimang inlen,
tualeh lepchiena kamte nanga kipat,
gamlatah ah koimang in.
25Na mit in na mailam tangtah in en inlen,
na mit in na masang tangtah in en kilkel in.
26 #
Heb. 12.13
Na kengin azui ding lampi ngaituopha inlen,
tualeh lampi dih leh dette zuiin.
27Zietlam ahiei,
veilam ahiei ah zong piel sinlen,
sietna lampi ah na kalsuon vawt sin.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.