KISIMNABU 2
2
Giehphuol mun kihawm dan
1Tualeh Mangpa’n Mosi leh Aaron ahoupi a akung uah tam bangin agen hi. 2“Israel tate’n aphung chiemtena puonlap uh taa chiet in apawl uh bawl dan bangin a puon inn uh azah ding uhi: kimutuona biehbuh nai senglou in akimkot in biehbuh lam ngat chietin azah ding uhi. 3Nisuohna lam suolam pangah apawl uh tamdan dungzuiin Juda pawlin Puonzah azah ding uhi. Amminadab tapa Nahshon khu Judate lamkai ahi ding hi. 4Tualeh galkap pawl sima umte tamdan, tul sawmsagi leh tul li leh zaguh ahi uhi. 5Tualeh aban a puoninn zah ding Issakar phung ahi dinga; Zuar tapa Nethaneel khu Issakarte lamkai ahi ding hi. 6Tualeh galkap pawl sima umte tamdan tul sawmnga leh tul li leh za li ahi uhi. 7Tuaban ah Zebulun phung ahi dinga, tualeh Helon tapa Eliab khu Zebulun tate lamkai ahi ding hi. 8Tualeh galkap pawl sima umte tamdan, tul sawmnga leh tul sagi leh za li ahi uhi. 9Apawl uh tamdan bangzela Juda pawl lah a simtelte tamdan tul za leh tul sawm giet leh guh leh zali ahi uhi. Amauten ma apui zel ding uhi. 10“Simlam pangah: Reuben pawlte apawl uh tam dan dungzuiin a um ding uhi: Reuben tate lamkai dingin Shedeur tapa Elizur ahi ding hi. 11Tualeh galkap pawl sima umte tamdan tul sawmli leh tul guh leh za nga ahi uhi. 12Tualeh ama kunga puon inn zah ding khu Simeon phung ahi dinga: Simeon tate lamkai ding khu Zurishaddai tapa Shelumiel ahi ding hi. 13Tualeh galkap pawl sima umte tamdan khu tul sawmnga leh tul kuo leh zathum ahi uhi. 14Tua ban ah Gad phung ahi dinga, tualeh Gad tate lamkai dingin, Reuel#Reuel khu 1.14 Deuel kichi khu ahi tapa Eliasaph ahi ding hi. 15Tualeh galkap pawl sima umte tamdan, tul sawmli leh tul nga leh zaguh leh sawm nga ahi uhi. 16Apawl uh tamdan dungzuia Reuben pawl a sim telte tamdan tul za leh tul sawmnga leh khat leh zali leh sawm nga ahi uhi. Amaute aguolni na ah apei ding uhi. 17“Tuachi’n kimutuona biehbuh apat apawt doh dinga, Levimite khu alai ah a um ding ua, Amauh diellap chiet toh gieh phuol abawl bangun apei ding uhi. 18“Tumlam pangah: Ephraim pawl, akichiemtena uh puonlap taa in atamdan dungzui un a um ding ua, Ephraim tate lamkai ding Ammihud tapa Elishama ahi ding hi. 19A galkap sima umte tamdan tul sawmli leh za nga ahi uhi. 20Tualeh aban ah Manasseh phung a um dinga, Manasseh tate lamkai Pedahzur tapa Gamaliel ahi ding hi. 21Tualeh agalkap pawl sima umte tam dan tul sawmthum leh tul ni leh zani ahi uhi. 22Tuazouin Benjamin phung ahi dinga, Benjamin tate lamkai, Gideon tapa Abidan ahi ding hi. 23Tualeh agalkap pawl sima umte tamdan, tul sawm thum leh nga leh zali ahi uhi. 24Ephraim giehphuol a mipite apawl apawl a akisim leh tul za leh giet leh za khat ahi uhi. Mailam nawt a apei chiengun amaute a guol thumna ahi ding uhi. 25“Mallam pangah: atam dan dungzui un Dan phungte a um ding ua; Dan tate lamkai Ammishaddai tapa Ahiezer ahi ding hi. 26Tualeh agalkap pawl sima umte tamdan tul sawmguh leh tul ni leh za sagi ahi uhi. 27Tualeh aban ua puon zah dingte, Asher phung ahi ahi ding a, Asher tate lamkai Okran tapa Pagiel ahi ding hi. 28Tualeh agalkap pawl sima umte tamdan tul sawmli leh tul khat leh za nga ahi uhi. 29Tua ban ah Naphtali phungin puonbuh azah ding ua Naphtali tate lamkai Enan tapa Ahira ahi ding hi. 30Tualeh a galkap pawl sima umte tamdan tul sawm nga leh tul thum leh zali ahi uhi. 31Dan pawla sima um zousiete tamdan tul za leh tul sawmnga leh tul sagi leh zaguh ahi uhi. Amaute apuonlap utoh aguol nukhia pen ah apei ding uhi.” 32Tamte Israel tate aphung aphung ua kisimte ahi ua, agieh phuol ua, mipi kisim zousie agawmkhawm in tul zaguh leh tul thum leh za nga leh sawmnga ahi uhi. 33Hinanleh Levi mitepen Israel tate lah a simtel ahi sih uhi; Mangpa’n Mosi thu apieh bangin. 34Tualeh Israel taten Mangpa’n Mosi thu apieh zousie dungzuiin abawl ua; tuabangin apawl apawlin puon inn azah ua, Tualeh aphung aphung leh ahainet ahainet dung zuiun akipan khezel uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.