KISIMNABU 3
3
Aaron tapate
1Tamte khu Sinai muoltunga Mangpa’n Mosi ahoupi lai a, Aaron leh Mosi hahlesuonte ahi uhi. 2#Kisim. 26.60Tualeh tamte khu Aaron tapate min ahi uhi; a upa pen Nadab, Abihu, Eleazar leh Ithamar ahi uhi. 3Tamte khu Aaron tapate siempu nasem ding a sathau nu a namdet a umte min ahi. 4#Siempu. 10.1,2; Kisim. 26.61Nadab leh Abihu in Sinai gamdai a Mangpa masang a, mei sienglou alat ziehun Mangpa masang ah ashita uhi. Amauten tapa anei sih uhi: Tuachi’n Eleazar leh Ithamar in apa uh Aaron damsung tengin siempu nna asem tawntung uhi.
Levite siempu nasem dinga tel ahi uh
5Tualeh Mangpa’n Mosi ahoupi a akungah, 6“Levi phung khu siempu Aaron kung ah hing zawpi inlen ana asep pieh theina dingun akung ah um sahin. 7Tualeh amauten biehbuh nasem in, kimutuona biehbuh masangah akul leh poimaw bangzel in ama leh mipite’n nna asem ding uhi. 8Tualeh kimutuona biehbuh sunga vanzah zousie akemding ua, Israel tate a dingin biehbuh nasep asem ding uhi. 9Tualeh Levimite pen Aaron leh atapate kungah na pe ding a: amaute khu Israel tate lah a kipata a pumpia akunga pieh ahi uhi. 10Tualeh Aaron leh atapate na teldoh dinga, siempu hina nasep asem den ding uhi; namdang hing kigolkha a um leh thalia ahi ding hi.”
11Tuachi’n Mangpa’n Mosi ahoupi a akungah. 12#Pawt. 13.2“Ngaiin Keima’n Levimite khu, Israel tate lah a kipat ta masa naubu hong masapen zousie taangin Israelte lah a kipat ka lata hi. Tuaziehin Levite khu keia ahi uhi. 13Tachil zousie lah kei a ahi ngal a, Izipt gam a tachil pieng masa zousie, mihing hiin ganta hitaleh kei a dinga ka koi siengthou ahita hi. Keima Mangpa kahi,” achi hi.
Levitate kisimna
14Tualeh Mangpa’n Sinai gamdai ah Mosi ahoupi a akungah, 15“Levi tate aphung aphung, ahainet ahainet in sim inlen; pasal ha khat a kipat atunglam zousie nasim ding ahi,” achi hi. 16Tuachi’n Mosi in akunga thu kipie dungzui leh Mangpa thu bang in amaute asim ta hi. 17Tamte khu amin uh dungzui a Levi tapate ahi uhi: Gershon, Kohath leh Merari; 18Tualeh tamte khu aphung dung zui un Gershon tapate min ahi uh; Libni leh Shimei. 19Tualeh aphung dungzui zel un Kohath tapate, Amram Izehar, Hebron leh Uzziel ahi uhi. 20Tualeh aphung dungzui ua Merari tapate, Mahli leh Mushi ahi uhi.
Gershon phung kisimna
21Gershon apat Libnite phung leh Shimeite phung ahing umdoh a, tamte khu Gershon hahlesuonte ahi uhi. 22Pasal hakhat apat atunglam min sima um zousie a unin tul sagi leh zanga ahi uhi. 23Tualeh Gershon phung miten, biehbuh tumlam pangah apuonbuh uh azah ding uhi. 24Tualeh Gershon tate lamkai ding Lael tapa Eliasaph ahi ding hi. 25Tualeh Gershon taten kimutuona biehbuh akep ding ukhu biehbuh leh atung khunate, kimutuona biehbuh a puonzahte; 26Ahuongsung puonzahte, biehbuh huongsung tunkot leh maitam kimvel a puonzahte, tualeh, tua mun a nasepna zousie a zah ding khaute ahi ding hi.
Kohath phung kisimna
27Tualeh Kohath apat Amram mite phung Izharmite phung leh Hebronmite phung leh Uzzielmite phung ahing umdoh hi; tamte khu Kohath mite innkuonte ahi uhi. 28Pasal ha khat akipat atunglam min sim a um zousiete aun un tul giet leh za guh ahi ua mun siengthou kem dingte ahi uhi. 29Kohath tapaten biehbuh simlam pangah apuon inn uh azah ding uhi. 30Tualeh Kohathmite lamkai ding khu Uzziel tapa Elizaphan ahiding hi. 31Amaute etkol ding khu Thuhun bawm, dawkan, thaumei tunna, maitamte, munsiengthou sunga Siempu nasepna a vanzah umlebelte leh munsiengthoupen lutna kot a puonzahte leh tam vanzah zousie toh kisai a mawpuohna nei ahi uhi. 32Tualeh Siempu Aaron tapa Eleazar khu Levimite lamkaite lamkai lienpen ahi dinga, mun siengthou etkolna ah houtu ahi ding hi.
Merari phung simna
33Tualeh Merari apat Mahlite phung leh Mushite phung ahing umdoh hi. Tamte Merari phungte ahi uhi. 34Tualeh pasal ha khat apat atunglam min sima um zousie, tul guh leh zani ahi uhi. 35Tualeh Merari phungte upa pen Abihail tapa Zuriel ahi; Amauten biehbuh sahlam pang ah apuon innte uh azah ding uhi. 36Tualeh Merari tapate etkol dinga kiguot khu biehbuh singpehte a zawlte, akhuomte, khuom phuna khuohkuohte, umlebelte zousie leh nasepna a vanzahte zousie ahi ding hi. 37Tualeh ahuong kimkot a khuomte leh akhuom ngahna khuohkuohte, akilbehnate leh akhaute toh ahi ding hi.
38Tuaban ah nisuonalam biehbuh mai a kimutuona biehbuh mai a, suolam panga Puon inn zah ding khu Mosi leh Aaron leh atapate ahi ding ua, Israeltate taangin munsiengthou a enkol ding uhi. Namdang mi akung nai ua ahing pei leh thalup in a um ding ahi. 39Mangpa thupieh banga Mosi leh Aaron in a aphung phunga pasal hakhat apat atunglam zousie asimte uh tul sawmni leh tul ni ahi uhi.
Pieng masapente taangin Levite
40Tualeh Mangpa’n Mosi kungah, “Israel tate lah ah tachil pasal ha khat apat atunglam zousie sim inlen amin uh giel lut in: 41Tualeh Levimite khu kei a tuom ahi ua (Kei Mangpa khu Ka hi). Israel tate lah a tachil piengmasa zousie taangin na la ding hi, tualeh Levimite gantate khu Israel ganta pieng masapen taangin na la ding ahi” achi hi. 42Tuachi’n Mangpa’n thu apieh bangin Mosi in Israel tate lah a tachil zousie a sim hi. 43Tachil pasal amin uh kizom bang zel un, ha khat a upa apat atunglam a sim zousie uh, tul sawmni leh tul ni leh zanile sawm sagi leh thum ahi uhi.
44Tualeh Mangpa’n Mosi ahoupi a akungah, 45“Levimite khu Israel tate lah a tachil zousie taangin la inlen, tualeh Levimite ganta khu agantate uh taangin lain; Levimite kei a ahi ding uh: Kei Mangpa khu ka hi. 46Tualeh Levimite sanga atam zohna uh, Israel tate tachil zani leh sawm sagi leh thumte tatna dingin, 47Mi khat ah Shekel nga chiet na la ding hi, mun siengthou a shekel dungzuiin (Shekel khat khu Gerah sawmni ahi) 48Tualeh tatna sum avalteng khu Aaron leh atapate na pieh ding ahi,” achi hi. 49Tuachi’n Levimiten atatzou ban ua umnalai tatna sumte khu Mosi in ala a: 50Israel tate tachil lah a kipat in sum khu ala a, munsiengthou shekel dungzuiin shekel tul khat leh zathum leh sawm guh leh nga, ala hi. 51Tualeh Mangpa’n Mosi thu apieh bangin, Mangpa thu dungzuiin Mosi in tatna sumte khu Aaron leh atapate kungah apie hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.