KISIMNABU 1
1
Sinai a Israelte kisimna
1 #
Kisim. 26.1-51
Izipt gam a kipata ahing pawtdoh nua uh kum nina, hanina, ani khat niin, Sinai gamdai a a umna uh kimutuona biehbuh sungah Mangpa’n Mosi kungah tambangin agen hi. 2“Israel tate mipi umkhawmte zousie, aphung aphung in, ahainet ahainet in, amin uh dungzui in pasal um zousie sim in. 3Israel sunga galdou dinga kuon thei, kum sawmni apat atunglam zousie apawl pawlin nang leh Aaron in na sim ding uhi. 4Tualeh phung zousie, ahainet sung chiet ua akhai pa chiet, nouma toh na kung uah a um ding uh ahi.#Nouma toh a um ding uh ahi: Nou gel hing panpi dinga na koi ding uh ahi 5Tamte khu na kung ua, nouma toh um khawm ding te ahi uhi: Reuben phungah Shedeur tapa Elizur; 6Simeon phungah Zurishaddai tapa Shelumiel; 7Juda phungah Amminadab tapa Nahshon; 8Issakar phungah Zuar tapa Nethaneel, 9Zebulun phungah Helon tapa Eliab. 10Joseph tate lah ah: Ephraim phunga Ammihud tapa Elishama; Manasseh phungah Pedahzur tapa Gamaliel. 11Benjamin phungah Gideon tapa Abidan. 12Dan phungah Ammishaddai tapa Ahiezer. 13Asher phungah Okran tapa Pagiel. 14Gad phunga Deuel#Dewel khu 2.14 ah Ruel chin akigiel hi tapa Eliasaph. 15Naphtali phungah Enan tapa Ahira.” 16Tamte khu mipi kikhawm ten atel doh uh phung zousie zungpipa chiet leh hainet upa chiet ahi uhi. 17Mosi leh Aaron in tana amin chiet ua kiloute azawpi ua. 18Tualeh amauten mipi umkhawm zousie khu aha nina ani khat niin a hankhawm ua, aphung aphung in, ahainet ahainet a amin uh kizawmdan dungzuiin kum sawmni akipat atunglam zousie amauh suongtu apu apate uh min atahlang uhi. 19Mangpa’n Mosi thu apieh bangin amaute Sinai gamdai ah asimta hi. 20Tualeh Israel tapa upapen Reuben tate khu ahainet, ahainet u’leh aphung aphung un, amin uh akizomdan dungzuiin, pasal kum sawmni akipat atunglam galkap dia kuon thei zousie a sim ua. 21Reuben phung a asim za uh, tul sawmli leh tul guh leh zanga ahi uhi. 22Simeon tate akhang u’leh aphung aphung leh ahainet ahainet dung zui ua, amin uh kizom dan in, Pasal kumsawmni akipat atunglam gal kuon thei zousie a sim ua; 23Simeon phunga asim za uh, tul sawmnga leh tul kuo leh zathum ahi uhi. 24Gad tate akhang u’leh aphung u’leh ahainet dung zui ua, amin uh kizomdan in, pasal kum sawmni akipat atunglam galdou a kuon thei zousie asim ua; 25Gad phunga asim za uh, tul sawmli leh tul nga leh zaguh leh sawmnga ahi uhi. 26Juda tate akhang u’leh aphung uh, tualeh ahainet, hainet dungzui ua, amin uh ki zom dan in pasal kum sawmni akipat atunglam, galkuon thei, zousie asim ua; 27Juda phunga asim za uh, tul sawmsagi leh tul li leh za guh ahi uhi. 28Issakar tate akhang u’leh, aphung u’leh, ahainet ahainet ua, amin uh kizomdan dungzuiin, Pasal kum sawmni akipat atunglam gal kuon thei zousie a sim ua; 29Issakar phunga asim za uh, tul sawmnga leh tul li leh za li ahi uhi. 30Zebulun tate akhang u’leh, aphung ua, tualeh a hainet ahainet ua, amin uh kizom dan dungzui in, Pasal kum sawmni akipat atunglam, gal kuon thei zousie asim ua; 31Jebulun phunga asim za uh, tul sawmnga leh tulsagi leh zali ahi uhi. 32Joseph tate chipen Ephraim tate akhang u’leh aphung uh tualeh ahainet ahainet ua, amin uh kizom dan dungzuiin, pasal kum sawmni akipat atunglam gal kuon thei zousie asim ua; 33Ephraim phunga asim za uh, tul sawmli leh za nga ahi uhi. 34Manasseh tate akhang u’leh aphung uh tualeh ahainet ahainet dungzui ua, amin uh kizom dan dungzuiin, Pasal kum sawmni akipat atunglam gal kuon thei zousie a sim ua; 35Manasseh phunga asim za uh, tul sawmthum leh tul ni leh za ni ahi. 36Benjamin tate akhang u’leh aphung, aphung u’leh ahainet ahainet dungzui ua, amin uh kizomdan dungzui in, pasal kum sawmni akipat atunglam gal kuon thei zousie, asim ua; 37Benjamin phunga asim za uh, tul sawmthum leh tul nga leh zali ahi uhi. 38Dan tate akhang u’leh aphung aphung u’leh ahainet ahainet ua amin uh kizom dan dungzuiin pasal kum sawmni akipat atunglam, galkuon thei zousie, asim ua; 39Dan phunga asim za uh, tul sawmguh leh tulni leh za sagi ahi uhi. 40Asher tate akhang u’leh aphung aphung u’leh ahainet ahainet dungzui ua, amin uh kizom dan dungzui in, pasal kum sawmni akipat atunglam gal kuon thei zousie asim ua; 41Asher phunga asimza uh, tul sawmli leh tul khat leh za nga ahi uhi. 42Naphtali tate akhang u’leh aphung aphung uh tualeh ahainet ahainet ua, amin uh kizom dung zuiin, pasal kum sawmni apat atunglam gal kuon thei zousie asim ua; 43Naphtali phunga asim za uh, tul sawm nga leh tul thum leh zali ahi uhi. 44Tamte ahi uh, Mosi leh Aaron in Israel nam lamkai sawmleni asimte uh, amaute aphung sung chiet ua u pate ahi uhi. 45Tuachi’n Israel tate aphung aphung un, kum sawmni apat atunglam, gal kuonthei zousie Israel gam ah asim ua; 46Asim zousie uh a bawnun, tul za guh leh tul sawm thum leh za nga leh sawm nga ahi uhi.
Biehbuh enkol dinga Levite kiguotna
47Hinanleh Levimite suongtu apu apate uh pen alah uah asimtel sih uhi. 48Aziehpen Mangpa’n Mosi kungah; 49“Levi phungpen na sim sih dinga, Israel tate lah ah zong amaute na sim tel lou ding ahi. 50Hinanleh Levimite pen theipina biehbuh enkol ding leh, asunga vanzah zousie leh van um zousie kem dinga na guot ding ahi. Amauten biehbuh apoding ua, avanzah zousie toh, Tualeh tuate zousie a enkol ding ua, biehbuh akim kot in a imkhum ding uhi. 51Tualeh biehbuh akisuon ding chiengin Levi miten aphet ding ua, tualeh biehbuh tunding ahi chiengin, Levimite ma in atung ding uhi; namdang mi akung nai a ahing pei leh thalup ding ahi. 52Tualeh Israel taten ama uh mun chiet ah apawl pawl in atam dan uh dungzui zelin apuon innte uh azah ding uhi. 53Hinanleh Levimiten theipina biehbuh kim kot in apuon innte uh azah ding uhi; Israel mipi kikhawmte tunga lungthahna atun louna dingin Levimiten theipina biehbuh a enkol ding uhi;” achi hi. 54Tuachi’n Israel taten Mangpa’n Mosi athupieh zousie dungzuiin tuabangin abawl ta uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.