NASEPTE 19
19
Baptispa Johan nuazuite Ephesa khuo ah
1Tualeh Korinth khuo a Apollo aum sungin Paul in mallam gamkai tuonsuoh zouin Ephesa khuo ah ahing tunga, khunah nuazui koite ahiei amu hi. 2Aman akung uah, “Na gintat chiillai un Hagau Siengthou na tang uoi?” achi hi. Amaun akungah, “Hagau Siengthou um chi zong ka zakha ngai mawngmawng sih uhi,” achi uhi. 3Tuachi’n aman akung uah, “Bang baptisma ahiei na tan uh?” achi hi. Amauten “Johan baptisma,” achi uhi.
4 #
Mat. 3.11; Mak. 1.4,7,8; Luk. 3.4,16; Jn. 1.26,27 Tuachi’n Paul in, “Johan in anua a hing pei dingpa gingta ding a mite hil in kisiana baptisma in a baptis zel hi. Tua ahing pei dingpa khu Khrist Jesu ahi,” achi hi. 5Amauten tam thu azah tah un, Mangpa Jesu min in baptisma atangta uhi. 6Tualeh Paul in atung ua akhut angah tahin, Hagau Siengthou atung uah ahing tungta a, ham theilouin aham ua, thu agenta uhi. 7Amaute abawn un mi sawm leh ni ahi uhi.
Paul Ephesa khuo ah
8Paul khu kikhopna inn ah alut a, ha thum sung hangsantah in thu agen a, Pasian leenggam thu ah kinielpi in, mi a zawl lut zel hi. 9Hinanleh pawlkhatte kilungkhausah in agingta ut sih ua, mipite mai a tua Lampi agensiet tahun, Paul in amauh apeisan a, nuazuite azawpi a, Tiranus sekul ah nisim in thu akikuppi hi. 10Tambangin kum ni sung a um a, tuachi’n Asia gam pumpi a um Judate leh Greekte zousiein, Mangpa Jesu thu azata uhi. 11Pasian in Paul khut zangin sillamdang tuom mawngmawngte abawl hi. 12Tuachi’n Paul satung toh kisukha mainulna diel neu, ahisihleh puonah tungsilte, damloute kungah ahing tawi ua, anatnate uh adam zel a, tualeh asung ua dawi gilou umte zong apawtkhie uhi. 13Tuachi’n dawi thusiem vielvah Judate pawl khat in “Paul in athu atangkoupi zel Jesu min in ka hing vau hi,” chiin dawi vei mite tungah, Mangpa Jesu min alou zel uhi.” 14Juda siempu lien khat, Skeva in tuabanga bawl tapa sagi anei hi. 15Hinanleh dawi in adawnga, “Jesu ka thei a, Paul zong ka thei hi, hinanleh noute koite na hi uoi?” achi hi.
16Tuachi’n dawi matpa’n amaute abaw a, azou a, abawnun anuoinet a, tuachi’n tua inn akipat in saguoh leh liem in ataidoh ta uhi. 17Tam thu Ephesa khuo a teng Judate leh Greekte zousiein athei tahun azau mama ua, Mangpa Jesu min nasatah a tawisangin a umta hi. 18Tualeh agingtate tampi zong ahing pei ua, asilbawlte uh thupha tawi in akipuong uhi. 19Mitphieldawi tawi mi tampi in alaibute uh ahing tawi khawm ua, mi zousie mitmu in ahalta uhi, tualeh aman atuot ua, dangka tul sawmnga man apha hi. 20Tuachi’n thupitah maiin Mangpa thu adalzahta a, a guolzou zel hi.
Paul siltup
21Tua silte nuain Paul in alungsim in Masidonia gam leh Akaia gam atotsuoh zou chienga Jerusalem khuo a pei atum a, “Khuna ka pei zou chiengin Rome khuo zong kava pha teitei ding hi,” achi hi. 22Tuachi’n ama nasepna panpi mi ni Timothi leh Erastus Masidonia gam ah asawl a, hinanleh ama pen Asia gam ah hun bangtan ahiei ataam nalai hi.
Ephesa khuo buoina
23Tua hun lai vel in tua Lampi thu ziehin buoina lientah a um hi. 24Aziehpen mi khat amin Demetrius dangka-sia khengmi khat a um a, Dangka sia in Diana biehna inn neu limte bawlin khutsiemte kungah sum muna hoitah asuohsah hi. 25Ama’n tuabanga khutsiem azahte leh tuabanga nasem dangte ahankhawm a, akung uah, “Lawmte aw, tam nasepna akipat in sum muna hoitah inei uh chi na thei uhi. 26Tam Ephesa khuo guoh ah hilou in, Asia gam pumpi ah, tam Paul in khut a bawlte pen pasiente ahi sih uh chiin mi tampi athuzaw a akiheisah siengta chi, na mu un na za uhi. 27Tuachi’n eite nasep sum muna ahing suhsiet ding zauhuoina guoh hilouin, pasiennu thupitah Diana biehinn zong ahing kingai neu ding a, tualeh Asia gam pumpi leh leitung pumpi miten abieh uh Diana thupina suhsiet in ahing um kha ding hi,” achi hi.
28Tam thu azah tahun, alungthah mama ua, “Ephesa mite Diana#Diana (Latin) Artemis (Greek) Ephesa mite milim pasien khat ahi. athupi hi,” chiin akikou uhi. 29Tuachi’n khosung pumpi buoinain apumdimta a, Masidonia mi Paul in akhuolzinna a azawpite gel, Gaius leh Aristarkus apum mat ua, kituohtahin etnop bawlna inn ah atailutpita uhi. 30Tualeh Paul in mipite lah a lut atup leh, nuazuiten aphal sih uhi. 31Tualeh Asia gam a houtu lienpente lah a Paul lawmte pawlkhat in akungah mi asawl ua, etnop bawlna inn a lut teitei lou dingin ahou uhi. 32Tua mun a mipi kikhawmte apumbuoi ua, pawlkhat sil khat akikoupi ua, adangten sil tuom dang khat akikoupi ua, alah ua atamzawin akikhopna zieh uh athei sih uhi. 33Mipite lah akipat Alekzandar akaidoh ua, Judaten ama mipite mailam ah asawn uhi. Tualeh Alekzandar in akhut azap a mipite kungah asiemna thu gen atum hi. 34Hinanleh ama Juda mi ahi chi athei tahun, naikal ni sung dingvel, aw kituohtah in “Ephesamite Diana athupi hi” chiin akikou uhi.
35Tualeh khopi laigielpa’n mipite asipsah a, Ephesa khuo a mite aw, “Ephesamite khu pasiennu thupitah Diana pen Zeus#Zeus van akipat hing kesuh milim biehinn venga kemte ahi uh chi theilou koi a um ei? 36Tuaziehin tam thu niel guollou ahi nuain, na sip khinkhian ding uh ahi, kinawhehu a bangma na bawllou ding uh ahi. 37Aziehpen tam na hing mi zawpite uh pen, biehinn bulu mi lah ahi sih ua, i pasiennu uh gensie lah ahi sih uhi. 38Tuaziehin Demetrius leh anaseppi khutsiem miten mi koi ahiei tunga thubuoi anei u’leh, thukhenna inn honsa in aum hi, tualeh gam uhpipate zong a um uhi; kiheh u’heh. 39Hinanleh sildanga buoina nei na hi u’leh, dan banga kikhopna ah ngaituo ding ahi. 40Tunia buoina ziehin, itung ua thu ahing um khah ding azauhuoi hi, ikikhopna san pen tami zieh ahi chi ding a um sih hi,” achi hi. 41Tualeh aman tambanga agen zouin mipi kikhawmte akikhensahta hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.