NASEPTE 18
18
Paul Korinth khuo ah
1Tam silte nuain Paul Athen khuo akipat Korinth zuon in apeita hi. 2Tualeh amin Akuila kichi Juda mi khat amu a, tua mipa khu Pontius gam a pieng ahi a, Klaudia in Judate zousie Rome khuo akipat pawtdoh dinga thupieh apieh zieh a, azi Prisilla toh, tumasang zepa Itali akipat hing tung pan bep ahi ua, Paul amaute kungah ahing haw hi. 3Tuachi’n anasep uh puonbuh bawl ahi a, anasep uh akibang ahi ziehin akung uah atunga, amautoh na asemkhawm uhi. 4Tualeh khawlni chinin kikhopna inn ah, Judate leh Greek mite gintat sah tum in thu akikupi zel hi. 5Silas leh Timothi Masidonia gam akipat ahing tun tah un, Paul in Hagau theisahnain thu ngentang genin aumta a, Judate kungah Jesu khu Khrist ahi chi theipina thu genin ahil chien zel hi. 6Hinanleh Judaten ama akal ua, agensiet tahun, aman apuonsilte athinga, akung uoh, “Na sisan maw uh nouma lutungah tuta heh! Keipen ka sieng ahi, tu kalsie Jentelte kungah ka peita ding hi,” achi hi. 7Tuachi’n khuna pat in apei a, mi khat amin Titus Justus kichipa inn ah alut a, tua mipa’n Pasian abe zel a, a inn zong kikhopna inn toh kizom ahi. 8Tuachi’n Krispus kikhopna inn vaihawmpa’n a innkuonpite zousie toh Mangpa agingta ua, Korinth khuo a mi tampiin zong Paul thugen zain, agingta ua, baptisma atang uhi.
9Tuachi’n Mangpa’n zanlai in mengmuna in Paul ahoupi a, “Zau sinlen, sip louin thu gen zelin; 10Kei na kungah ka um ngitnget hi, koiman hing suliem dingin na tung ah khut aha sih ding hi, aziehpen tam khuo ah mi tampi ka nei hi,” achi hi. 11Tuachi’n Paul khum khuo ah kum khat leh ha guh ataam a, alah uah Pasian thu ahil hi.
Gallio leh Paul
12Gallio Akaia gam uhpa ahilai in Judaten kithutuoh tahin Paul aman ua, thukhenna mai ah ahing tut uhi. 13“Tam mipa’n dan toh kituoh loupi a Pasian be dingin mi azawl hi,” chiin aheh uhi.
14Paul in thu gen ding a akisah laitahin, Gallio in Judate kungah, “Aw nou Judate, sil hoilou bawl thu ahiei, gitlou gamtatna thu ahiei beeh hileh ka hing ngaisah tham ding hi; 15Hinanleh thute leh minte tualeh nouma dan thute ahi giap leh, nouman kingaituo zaw un, tambang thute ah thukhenpain ka pang ut sih hi,” achi hi. 16Tuachi’n thukhenna toupha mai a kipat in amaute adeldohta hi. 17Tuachi’n Greek mi zousiein kikhopna inn vaihawmpa Sosthenes aman ua, thukhenna toupha mai ah avuo uhi. Hinanleh Gallio in tam silte bangma in angai pieh sih hi.
Paul Siria a akinuale kiana
18 #
Kisim. 6.18
Tuachi’n Paul khu Korinth khuo ah hun sawttah ataam nalai a, tua zouin unaute toh akivaihah a, Siria gam lam zuonin kuongin apeita hi, tualeh Prisilla leh Akuila toh zong azawhkhawm uhi. Kichiemna khat anei ziehin Kenkeria khuo ah Paul in asam aheu hi. 19Tuachi’n Ephesa khuo atunga, tuanah Prisilla leh Akuila anuasie a, hinanleh ama pen kikhopna inn ah alut a Judate toh thu asuut khawm uhi. 20Amauten akung ua sawtdeu taam tadi dingin ahou ua, ama a ut sih hi. 21Hinanleh amaute avaihah a, ahing tung ding Jerusalem a annkuongluina ah tel teitei ka tum hi; “Pasian in pha asah leh na kung uah ka hing peikia ding hi” achi hi. Tualeh Ephesa khuo akipat kuongin apeita hi.
22Tuachi’n Kaisaria ahing tunga, apeitou a hattuomte ava nousiet a, Antiok khuo ah apeisuhta hi. 23Antiok a hun bangtan ahiei ataam nuain akipankhie a, Galatia gam leh Phrigia gam zousie atuon suoh a, nuazuite zousie a sudet a, athakhausah hi.
Ephesa khuo a Apollo nasep
24Juda mi khat amin Appolo, Alekzandria khuo a pieng, thugen siem leh Laisiengthou thu thei mama, Ephesa khuo ah ahaw hi. 25Tam mipa pen Mangpa lampi thu zilsa ahia; Johan baptisma thu maimai theinanleh lungsim a phatuom ngaitah in, Mangpa thu gen in ahilchien zel hi. 26Tuachi’n kikhopna innte ah hangsan tahin thu agen panta a; Prisilla leh Akuilain athugen azah un, a inn uah azawpi ua, Pasian lampi thu kichien zaw sem in ahilchien uhi. 27Tualeh ama’n Akaia gam a pei atup tahin, unauten ahantawh ua, ama ana kipahpina dingun khum gam a nuazuite kungah lai ahah uhi, tualeh ama atun tah in hepina zieh in gingtute nasatahin apanpita hi. 28Aziehpen ama’n vantang theiin Judate anieldonga Laisiengthou thu pansan in Jesu khu Khrist ahi, chi athei sah hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.