NASEPTE 20
20
Masidonia gam leh Troas a hathum nasepna
1Buoina aven nuain, Paul in nuazuite akung ah ahan a, amauh ahantawh zou in Mangpha ahah a, Masidonia gam zuonin apeita hi. 2Tua gam sungah azin a, amau hanthawnna thu tampi agen zouin Greek gam atungta hi. 3Tuanah ha thum ataam a, tualeh Judaten ama abuhdap zieh un, Siria gam langa kuonga pei dinga kisa lai, Masidonia gam langa pei dingin akisa kiata hi. 4Tualeh Berea khomi Pirhus tapa Sopatar, Thessalonika khuo a mite Aristarkus leh Sekundus, Derbe khomi Gaius leh Timothi, tualeh Asia gam mite Tikikus leh Trophimus in Asia gam dongin azui uhi. 5Tam mite ka masang uah ana pei ua, Troas khuo ah ahing na ngah uhi. 6Hinanleh koute pen Tanghou tolsawlou pawi bawl nua in, Phillipi akipat in tembaw in ka pei ua, ni nga zou in amaute umna Troas khuo ka tung ua, tuanah ni sagi ka taam uhi.
Eutikus kaithawna
7Nipikaal ni masapen ni in nuazuite tanghou balkeh dinga ahing peikhawm lai un, Paul in azing ni a pei atup ziehin amauh kungah thu agen a, zankim dongin akihoulimpi a thu ahil zom tou peh hi. 8Inndan tungnung a akikhopna uah, thaumei tampi akitaang hi. 9Tualeh amin Eutikus kichi tangval khat kotta ah atou a, tuitahin ana imu hi, Paul in thu agen sawt seng ziehin, imu lai innsawng thumna akipat in akesuh a, ashisa in aphong uhi. 10Paul avakumsuh a, atungah abawh a, apom a, “Patau sih un, ahing nalai hi,” achi hi. 11Paul inndan tunga akaltou kia bepin, tanghou abalkeh a, ane a, sawtpi zingmawng khovah dongin ahoulim a, apeita hi. 12Amauten tangvalpa hingin ahing zawpi ua, akidawmpah sih uhi.
Mileta zuon a Paul zinna
13Tuachi’n koute tembaw lam ah kana pei ua, tualeh Assos lam zuon in kana pei masa ua, tua mun ah Paul zong tuonsah ka sawm ua, aman keng lam a pei atup zieh in kengin hing pei zawvang achi hi. 14Tualeh Assos khuo a ahing kimupi tahin, ka tuongsahta ua, Mitilene khuo ka tungta uhi. 15Tuana kipat in tembawin ka pei kia ua, azing niin Kios tuikuol gam gallam ka tung ua, tualeh azing ni in Samos ka tung ua, Trogilium ah ka tam ua, azing niin Mileta khuo ka tung uhi. 16Paul in Asia gama taam sawt a utlou ziehin Ephesa khuo tembaw a pei pel atupsa mawng ahia; ahithei liei leh Jerusalem khuo a pentikos pawi lap a tun a ut a, kin pei ahi.
Ephesa hattuom upate avaihahna thu
17Mileta khuo akipat, Ephesa khuo ah mi asawl a, hattuom upate ava hansah hi. 18Amaute a kunga ahing tun tahun,” Paul in amaute kungah, Asia gam a ka hing tun chiil ni masa ni akipata na lah ua ka um sungsie a ka umdan na thei uhi, 19Lungsim a kingaingiemna leh Judaten ahing zebawl ua ahing bawlsietzieh ua hitui tampi toh ka tung a hing tungte thuoh kawmin Mangpa nna ka sem hi. 20Noute phattuomna ding bangma im ka nei sih a, ka hing theisah sieng hi, tangpi theiin thu ka gen a, inn chin ah noute thu kang hil ngitnget hi. 21Judate leh Greekte kungah zong, Pasian lam a kihei kisiana thu leh i Mangpa Jesu Khrist lam a ginna thu ka theisah zel hi. 22Tuin Ngai un, Hagau a kolbun in Jerusalem a hawtou dinga kisa ka hia, khunah ka tunga sil hing tungdingte ka thei sih hi. 23Henna leh gimthuohna in ahing na dawn ding chi a, Hagau Siengthou in khochin a, ahing theisahte maimaite ka thei hi. 24#2 Tim. 4.7Hinanleh ka kitaidemna kipahtah a ka taitung theina ding leh Mangpa Jesu a kipat a ka mu, Pasian hepina khantanhoi theisah ding nasepna ka sep zou theina dingin, tam silte khat beehin ahing suling sih a, ka hinna zong it taahin ka ngai sih hi.
25Tualeh tuin Ngai un, noute zousie lah a, Pasian leenggam thu gen a ka vah kawinate’n ka mel na mu nawn sih ding uh, chi ka thei hi. 26Tuaziehin mi zousie sisan ah ka sieng ahi chi tuni’n ka hing theisah hi. 27Aziehpen Pasian thuguot zousie noute kunga phuondoh lou a im ka nei sih hi. 28Tuaziehin noute pilvang unlen, belamhonte zousie vengun, Pasian Hattuom Ama sisan a aleisate vah dingin, Hagau Siengthouin amaute lah a belampu hi dingin noute ahing guot ahi. 29Aziehpen ka pei nua chiengin, ngia giloute na lah uah ahing lut dinga, belamhon akhawi sih ding uh, chi ka thei hi. 30Nouma lah mama ah zong nuazuite amauh lam a kaimang dingin, thu alelam a gen ahing um ding uhi. 31Tuaziehin kivengun, kum thum vingveng, asun azan a hitui luong kawma, michin phawhhil ka tawp lou dan thei ngitnget un.
32Tuin unaute, noute hing lamtou a, hing khangsah thei a, mi suhsiengthousate lah a goutan pe thei Pasian leh akhotuona thu ah noute ka hing kemsah hi. 33Koima sana, dangka leh sil leh ten, ka eng ngai sih hi. 34Tam khutte’n keima leh ka kunga umte tahsap awng hu in ka sem zel chi noute mamain na thei uhi. 35Bangkim ka bawl zousie nouten zong tambanga semgim leh Mangpa Jesu thu thei ngitnget kawmin mi hatloute na panpi ding dan uh hing ensah ka hi. Mangpa Jesu mama in lah sangin pieh hi guolzawlna sangzaw a hi,” achi khu thei ngitnget un.
36Tam thute agen zouin, khupdin in amaute zousie toh athum khawm uhi. 37Tualeh a unpi un akap ua, Paul angawng kawi ua, atawp uhi. 38Amel amu nawnlou ding uh, thu agenin amauh adasah pen hi. Tualeh amaun tembaw umna mun tan dong ava ha ta uhi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.