MARK 4
4
Tsax Saikya Kaxpan
(Mat 13.1-9; Luk 8.4-8)
1 #
Luk 5.1-3. Chatlechu Jisu-e Galili Shinthuk-titung kax ma hwon-ano ang süt. Afoxkya khünaknu chix akhople huanuma tüikya, ikhoma chix khua ding ma nga ilaxle thung. Khua a ti khato wüi changkya ikoxle khünaknu a fako ma tüikya. 2Hwom hama jojüikyabu apua ano ang chixe kaxpanbu twonle chixe hwom ang thüi:
3“Apalax! Hanpak tuita ma tsax sai mix tsaxli sai ang ka. 4Chixe zimfa ma chiakle saikya zuma tsaxtsang züizüi lomtang to düt; osabu hüilaxle ijabu tswonle sax. 5Züizüi hax muale tüikya longtok to düt. Hax zule chitüi koxle ibu tsaxtsang lebama akhang. 6Ofüima zanghankya zuma ija khang tankya tsax nyemsabu to tüle huak, üntoxle zule otsing jukya chitüi koxle ochwon ma zilaxle ijabu zanle max. 7Ilaxle züizüi a hux füikya fumkha to düt, fum ibu lwon le hüikoxle tsax to alumle changkya khoma ibue oziak chidün. 8Ikoxle züizüi a haxwan müikya khato düt; ijabu nyemle tsong ilaxle züizüi ma tsübün pong, puzom pong üntoxlechu hopong le jao oziak tüle dün.”
9Ilaxle Jisu-e ashuk: “Atat ang na zaikya mixe atatlax!”
Ija Kaxpan Mongtex
(Mat 13.10-17; Luk 8.9-10)
10Jisu chix tata tüiponge, wangshembu füi tomle ija chix kax atatkyabue ija kaxpan akhixle wünle fa angkya chix füi akax. 11Chixe hwom ang thüi: “Zang Wangting huxsa zangwün bama awan angkya hünzom ang koxdaoa; ikoxlechu kotok tokyabu hanpakma ijabu pangnu kaxpan makhange tix tsuakpu, 12#Isa 6.9,10.ikhoma;
“Hwome tüle hukoxchu chitsingüi;
tüle apakoxchu chiawan tsuaküi;
Ile chichang thüikoxle,
hwom mong Zang hato chatse;
chixe hwom ang thailak koxkya tüise.”
Jisu-e Tsaxli saikya Kaxpan bama akhixle Wünle kox
(Mat 13.18-23; Luk 8.11-15)
13Ilaxle chixe hwom ma atüi: “Hünzome ija kaxpan maawan tomta hia? Ile changkoxle mamabu kaxpan a chemle awanle thoüi? 14Tsax saikya mixe Zang kax saipu. 15Khünak züizüia lomtang kax to dütkya tsaxtsangbu ningle changpu; otue hwome atatpuix ifüi tomle haxshix hüilaxle hwom mongkha to saile thomdaokya kax tswonle pao. 16Khünak mamabu longtok to saikya tsaxtsangbu ningle changpu; kaxho atatkya füi shemle hwome mongmüi atungle pongle kop. 17Ikoxle hwom ma otsing zule ju angkya onui tam chitüi, ikhoma azang koxlechu otsün chilo; ija kax khoma sikngün hia zothup apongkya zuma hwome ochwon ma ija danle tox. 18Mama khünakbu a hux füikya fum khato saikya tsaxtsangbu ningle; hwome onox ma kaxho pongle kop. 19Ikoxle chaxwannu bama abankya tamchu ngun syen tokya nüfux hia mamabu to asingkya, ibu chix ma nopkyae pongle kopthom daokya kaxho to alum, ile ijae oziak dün ang chitom. 20Ikoxle khünak mamabu a hax müikya khato saikya tsaxtsangbu ningle; hwome Zang kaxho atat, ija pongle kop, ilaxle oziak dün; züitae tsübün pong, züizüie puzom pong üntoxle züizüie hopong.”
Khonge Akhuple thomkya Wüntik Tuita
(Luk 8.16-18)
21 #
Mat 5.15; Luk 11.33. Jisu-e chizakle hwom ang thüi: “Wünzua khonge akhuple chichangba lyafang to thom ang apüi zaicha? Ija dan angkya onui ma mündan puixnyi? 22#Mat 10.26; Luk 12.2.Ijadaile pyenle thomkya oli pangwüi kotok to alaiüi chichangba tütalichu khomle thomkya chitüi le kotok to angai angkya oli changle. 23Atat angkya na zaile tüikya mixe atat ang laxkox!”
24 #
Mat 7.2; Luk 6.38. Anaolechu chixe hwom ang thüi: “Hünzome chem atatpuix ija to mong koxlax! Hünzome mix bama kaxfün fa ang oja wanlom twonlaxpuix, ija wanlom Zange hünzom kaxfün fa ang twonüi; owae tsing ifüi sütsexle ngaxchu changtüilax. 25#Mat 13.12; 25.29; Luk 19.26.Khünak owa ma hidaole tüipuix, chix ang aluile faüi, ikoxle owama chemchu chitüiüi hex, atüitüisa ngaxchu chix angkya bakle paoüi.”
Tsaxli Tsongkya bama Kaxpan
26Jisu-e chizakle akaxle thüi: “Zang Wangting a ija ningle changüi: Khünak tuitae chix haxtok ma tsaxli saile tox. 27Chix awün ningle jip ilaxle anyix ningle tix chix zo, ija bama wüi tsaxtsangbu akhang ilaxle tsongle hüi. Ikoxlechu chixe ibu chemle tsongle hüipuix chiawan. 28Haxwane chix lualua to pün tsong ang kox ilaxlechu ziak ang tomle; pongwang ma ochak lai, ifüima tsaxto, ifüima tsaxto ma tsaxtsange awangle laiüi. 29#Jol 3.13.Otue oziak münüihex, khünake changkuix füi züt ang sütüi, chemthüikoxle tsax atu ang otu nguile hüile.”
Suili-tsang bama Kaxpan
(Mat 13.31-32; Luk 13.18-19)
30Üntoxle Jisu-e hwom ma atüi: “Keme Zang Wangting chem ningle tüile le thüiüi? Ija akhixle wün angkya hanpakma chem kaxpan twonüi? 31Ija a ile changle, khünak tuitae chaxwan ma ahixkya pünziak tuita suili tsang kop ilaxle chixe ija haxtok ma küi. 32Sühom füima ija tsong ilaxle suilai pün khakha ma süchongkya pün tuita ang achang. Ija püne, okhung to osabue ozop zing ang müile okangsabu alai.”
33Ija ningkya kaxpan mamabu huanuma twonlaxle Jisu-e khünaknu hama hwon-ano. Hwome otukux awan ang thopuix ibukuxle chixe hwom hama apua. 34Kaxpan chilax homtoxle chixe hwom füi chiakax; ikoxle wangshembu füi chix tata süile changpongma chixe hwom hama pangnusa akhixle wün.
Jisu-e Zangchei Adang
(Mat 8.23-27; Luk 8.22-25)
35Ija nyixnyix wüi hansonge, Jisu-e wangshembu ang thüi: “Kem tinu ta le tachi to lehax.” 36Ikhoma hwome khünaknu othom dantoxlaxle Jisu ami wüi thungle ngoünkya khua ma wangshembu chuwüi ngale tomle achex. Ikhama khua mamabuchu wüi tüihukya. 37Allele tüle zongkya zangcheie thu ilaxle tichapbu khua ding to dongle tie awang ang azong. 38Jisu a khua omüichi to tüikya. Chix a khangte ma ngom ate laxle jiple ngokya. Wangshembue chix azwotle thüi: “Nwotmix, nange kem ziüi münngün hia?”
39Jisu ajong laxle zangwin ang thüi: “Dangün”. Chixe tichapbu angchu wüi thüi: “Taxamok”. Zangchei thwonthütle dang ifüima zingzazui le dang. 40Ifüima Jisu-e wangshembu ang thüi: “Hünzom itukux büthüikoxle zapu? Hünzom ang mongong ojao chitüi le büthüipu?”
41Hwom huanuma wüi za ilaxle tata füi akax: “Chix chem ningkya mix hex? Zangwine ngaxchu chix kax ma laxle!”
Currently Selected:
MARK 4: WANCBSI
Highlight
Copy
Compare
Share
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
