MARK 5
5
Haxshix Chasa füikya Khünak tuita Jisu-e Amüi
(Mat 8.28-34; Luk 8.26-39)
1Jisu hia chix wangshembu tinu tachi tokya Garasa chaxwan to ngui. 2Jisu khua angkya thaikya füi tomle, ikhama tüikya zuk-kha tokya laikya mixsün tuita chix füi apong. Ija mixsün ma haxshix chasa tüikya. 3Chix a zuktsam khato ngokya; athaxpi chix to owaechu kople thom ang chitho. 4Obithomthom ma hexle chix cha hia chak ma janbüi füi khale changdaokya ikoxlechu chixe janbüi afün ilaxle jankap ama. Pangnu zongto wüi chix a tüle tsak. 5Zangnak zangngaile zuktsam hia haxhua tokhange akhongle tamchu chix to alüi le long füi zütngale samle aham ngo.
6Chix ngün pongma Jisu siatsaile tüikya; ikoxle chix zikle hüilaxle Jisu chitong ma chix shwomle akhux; 7ilaxle akhongle thüi: “Jisu, nang a Taitax Zang Hosa! Nange ku füi büthüise tsupu? Zang münlün laxle thüipu, ku ang sik sütax-angününfa!” 8(Jisu-e haxshix chasa ang chix angkya laile pao angkya kaxkox koxle chixe ija akax).
9Ikoxle Jisu-e chix ma atüi: “Nang ang chemle amün?” Ija mixsüne lan: “Ku mün a Lejion! Kwom a tüihu le!” 10Ilaxle chixe ikha tokya haxshix chasa mama khato jwonle chiapao angkya bama chingcha jule Jisu füi akax ngo.
11Ija hama hoxhox le tüikya haxhua ma osüt saxle wakzyem tuita tüikya. 12Ikoxle haxshix chasabue chix ma kaxju: “Kwom wak hato paolaxle hwom ma nop ang tomhüi.” 13Chixe hwom pao ang tsan, ilaxle haxshix chasabu ija mixsün angkya laile pao üntoxle wakbu ma nop. Hajat anyi tukux tüikya wak abakle tinu ha angkya haxkax to awukle pao ilaxle ti to dütle zi.
14Wak ibu nyele ngokya khünakbu tingkhua to chatlaxle wak tsomnui pangnu khato wüi ija bama kax apuk. Chemlepang changdaokoxpu le hu ang khünaknu pao, 15ilaxle hwom Jisu hato hüikya zuma, haxshix chasabu koplaxle ngokya mixsün chix hama ngün. Chix a khangka hingle tamchu nyi laxlaxle ikhama thungle tüikya; ilaxle hwom pangnu wüi abüt. 16Ija ngünkyabu pangnue wüi, haxshix chasa füi ngokya mixsün to chemlepang changdaopuix tamchu wakbu mo khünaknu hama wün.
17Ikhoma hwome Jisu füi hwom longzi akaile pao angkya akax.
18Ikoxle Jisu khua ma ngale ngopong ma, ami haxshix chasa füi ngodaokya mixsüne thüi: “Ku nang füito hüi ang koxhüi!”
19Ikoxchu Jisu ija mixsün chix füito hüi ang chitom; itülüi chixe ija mixsün ang thüi: “Nang hünzom kako homkha hato chatlax ilaxle nang hanpakma Jowanpa-e otukux mokdaopuix ilaxle chixe nang to ching otukux chadaopuix, ibu hwom hama apuakox.”
20Idaile ija mixsün nok bün akaile le üntoxle Jisu-e chix hanpakma mokkya apukle pao. Ija bama atatkya pangnu wüi abüt.
Jairas Sacha hia Jisu Nyitua to Twonkya Mixcha nyi
(Mat 9.18-26; Luk 8.40-56)
21Jisu tinu tale tachi to chat. Shua tachi ma, ikhato chix akhople khünaknu asox. 22Ija nok angkya sinagok ma akhokya mixsün tuita Jairas ikhato ngui üntoxle chixe Jisu ngünkya zuma, chix chitong ma akhux; 23ilaxle onüi ang chingcha jule akax: “Ku sacha huanuma kakle tüile. She kakmüi laxle ozün ma naxngo, chingchajaja laxle nang chak füi she to twon ang shongnguifa!”
24Ifüima Jisu chix füito pao. Chix füi tomle, chix akhople khünaknu huanuma hüi.
25Ikhama zangbün anyi aji paole kakle ngokya mixcha tuita tüikya. 26Kak-hu-mixbu obiobi hato she paole aho daokya; she e ngun-syen komle ashix, ikoxlechu müihaxkux tsyen to onüi mix khünle pao. 27She-e Jisu bama atat ilaxle khünaknu othom nuakfüichi tokhange chix hato hüi. 28She-e mongto thüt: “Kue chix nyitua to twon ang jangkopba ku kak müiüi.”
29She-e chix nyitua to twon, ifüi tomle she aji jenle ngokya thwon; ilaxle she-e ma kak owüiole müiüna le awan ang kop. 30Ima wüi Jisu-e, chix angkya zong laile paokya awan. Ikhoma khünaknu othom chito akhople hulaxle chixe atüi: “Ku nyi to owae twonpuix?”
31Chix wangshembue lan: “Ibibi mixe nang akhople ngokya chingün ngünchu, nang to owae twonpuix le nange büthüikoxle atüipu?”
32Ikoxlechu chix nyi to twondaokya khünak awan kop angkya kuxma chixe khünaknu chito khile hungo. 33She to chemle changdaopuix, ija ajang koplaxle, aban ngale ija mixcha hüi, chix chitong ma akhuxlaxle otsingtsing komkaile ngaile akax. 34Jisu-e she ang thüi: “Afex, nang mongonge nang kak amüidaoa. Mongsom ma paolax ilaxle müimüi zangngaile ngolax.”
35Jisu-e ija akax ngoponge Jairas hom tokya kaxho mix züizüi nguilaxle chix hama wün: “Hünsa shekosa zidaoa. Nange Nwotmix ang tingtui taxfa ngozi!”
36Jisu-e ibu kaxho to na chitha#5.36: na chitha; chichangba olyem ang atat. ikoxle Jairas ang mix “Taxza, onglan onghüi”, le thüi. 37Ifüima Jisu-e Pitar hia Jakop ilaxle honao Juhan hwom boma owachu chix füito azui ang chitom. 38Hwom Jairas hom to ngui. Jisu-e khosam ma ngokyabu ngün ilaxle züizüi akhongle mangkhoma sople ngokyabu atat. 39Chix noplaxle hwom füi akax: “Chemto abüt aban ngopu? Hünzom büthüikoxle soppu? Naosa a zikya münchang. She a jiple ngowüi!”
40Hwome chix chanyi ikoxchu chixe hwom pangnu wüi ikha angkya acha ang tom. Shekosa hopa hia honu nyi boma chix wangshem hwom azom le chix füito kop, ilaxle naosa jiple ngokya nui to dong. 41Chixe she chak ma twonlaxle she füi akax, “Talitha, kaum” thüikoxle “shekosa, kue nang zo ang tsanpu”, le thüikya tha.
42She ima wüi zo ilaxle aham. (She a zangbün anyi nao changkya). Ile changkya zuma tix hwom pangwüi abüt. 43Ikoxle Jisu-e hwom ang owa hamachu chiwün angkya kaxshing kople akax. Ilaxle chixe “She ang süt laxkox”, le thüi.
Currently Selected:
MARK 5: WANCBSI
Highlight
Copy
Compare
Share
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
