MARK 3
3
Chak Faile makya Khünak tuita
(Mat 12.9-14; Luk 6.6-11)
1Ifüima Jisu sinagok to chat, ikhama chak faile kakkya mixsün tuita tüikya. 2Jisu tuita mütkop mix ang achangse le tsukya khünakbu züita ikhama tüikya; ijadaile nazak nyix chixe ija mixsün amüi angcha hexle hwome soxlaxle khinle hungo. 3Jisu-e ija mixsün ang thüi: “Ikhato thochi to oman.” 4Chixe hwom ang thüi: “Wanlom ma nazak nyix chem moklax le tüipuix? Khüzün sün angkya changüi hia mik amüt angkya changüi?”
Ikoxle hwom dang ang mix süt. 5Üntoxle chixe hwom mongkhüikya khoma mongma laxle mongtsik füi hwom to akhople hu, üntoxle chixe ija mixsün ang thüi: “Nange chak tinkox.” Ija mixsüne chix chak tin. Ijama chix chak owüiole müi. 6Ikoxle farisibu sinagok angkya laile paolaxle, Jisu chemle langüihex le Herod othom füi chwonle katzua tsuak.
Tinu kax ma Khünaknu Othom tuita
7Jisu chix wangshembu füi Galili Shinthuk-titung to pao; üntoxle khünaknu othom chongkya chix füito azui. Hwom Galili hia Jehudi haxtok tokyabu, 8Jerusalem hia Edom nok haxtok tokyabu, üntoxchu Jordan shuanu tachi haxtok tokyabu, ilaxlechu Tair hia Sidon tingnu zui tokyabu changkya. Chixe khomtsikya mwot mokkyabu zing atatlaxle ibu khünaknu othom tuita chongkya chix hato ngui. 9#Mrk 4.1; Luk 5.1-3.Khünaknu othom huanuma changkoxle, chix to thwomthwomshing le chihüi angkya kuxmale Jisu-e chix wangshembu ang khua tuita chix hanpakma achwon angkya akax. 10Chixe kaklak huanuma amüi koxkya khoma kakmixbue malomlom jamle chix to twon ang atin. 11Ilaxle haxshix chasa füikyabue chix ngünkya zuma, hwom chix thüntho ma nguak üntoxle akhong: “Nang a Zang Hosa changpu.”
12Chixe hwom füi, chix owa hex, ija bama owa hamachu chiwün angkya kaxshing kople akax.
Jisu-e Wangshembu Bün Anyi Kamkya
(Mat 10.1-4; Luk 6.12-16)
13Ifüima Jisu-e haxnu kho to dong üntoxle chix mongkünkyabu chix hato nyak. Ibu chix hato hüi. 14Ilaxle chixe bün anyi zünle kop. Hwom ang chixe “wangshembu”, le nyak. Chixe hwom ang thüi: “Kue hünzom ku füi tomle ngo angkya hanpakma tamchu hwon-ano ang tsanle apao angkya kuxmale zünle koppu. 15Ilaxle hünzom ma haxshix chasa jwonle apao angkya tsakzong tüi angkya changle.”
16Chixe kamle kopkya bünanyi a ijabu: Simon (Jisu-e chix ang Pitar le nyak); 17Zebedi sasün Jakop hia Juhan nyi (Jisu-e hokhi ang zangdung khünak le nyak); 18Andriw, Filip, Bartholomew, Mathi, Thoma, Alfa sasün Jakop, Thaddaus, Kanan nok Simon, 19ilaxle Jisu khohangkya mixsün Juda Iskariot, ibibi.
Jisu hia Belzebul Nyi
(Mat 12.22-32; Luk 11.14-23; 12.10)
20Ifüima Jisu hom to ngui. Anaolechu khünaknu ile wüi asoxkoxle Jisu hia chix wangshembu ang fongsax angkya chakba ngaxchu chitüi le chang. 21Kakobue ija atatkya zuma, hwom chix to sa ang ngui; chemthüikoxle khünaknue chix ang “Chix pi ongat ang achangüna”, le akax.
22 #
Mat 9.34; 10.25. Jerusalem tokhange nguikya züizüi wanlom nwotmixbue thüi: “Chix ma Belzebul tüile! Chix ang haxshix chasabu jwonle apao angkya tsakzong a ija bao wanghome koxkya changle.”
23Ikoxle Jisu-e hwom chix hato selaxle kaxpanbu füi akax: “Bao-e bao chemle jwon tho angkya? 24Üntoxle chaxwan tuita ahak-ahanle jangtüi thüiba, ija chaxwan ajongle ngo ang müntho. 25Ilaxle kako tuita züizüihanle jangtüi thüikoxle, ija homkha ajongle ngo ang müntho. 26Idaile bao wanghom ma ahak-ahankya jangtüiba, chix ajong ang müntsuak ikoxle oli thukya hato hüiüi.
27“Pongwang ma chix khale koplaxle wüi chichang thüiba khünak owaechu mixtsak naomüi hom to donglaxle, chix hom hia bwotba ama ang müntho.
28“Kue hünzom füi otsing tomtata akaxpu, khünaknüsa ang hwom kaxchax pangnuli thailak tüiüi;#3.28: hwom kaxchax pangnuli; chichangba hwome Zang zongto kaxchax akaxkya pangwüi. 29#Luk 12.10.Ikoxle khünak owae Otsao Chasa zongto kaxthai akax laxüihex, chixe oshuk chitüikya ochax lyendaoa, ikhoma chix ang thailak müntüiüi.” 30(Khünak züitabue chix ma haxshix chasa tüile le thüikya khoma chixe ija kax akax).
Jisu Honu hia Honao Hwom
(Mat 12.46-50; Luk 8.19-21)
31Ifüima Jisu honu hia honao hwom hüi. Hwom homtho to ajongle ngo, ilaxle chix nyak ang kaxho mix tuita tsanle adün. 32Jisu akhople khünakbu thungle tüikya, ilaxle hwome chix ang thüi: “Hulax, hünnu hia hünnao hwom homtho to tüile. Hwome nang lomle.”
33Jisu-e lan: “Ku anu owa tamchu kunao hwom opang?” 34Chixe chix akhople thungle tüikya khünakbu to hulaxle thüi: “Hulax, anu hia kunao hwom ikhama tüile! 35Jowanpa mongtex ma owae mokpuix, hwom a kutüi-kunaohom tamchu ku anu changpu.” Hwom a kutüi-kunaohom tamchu ku anu changpu.
Currently Selected:
MARK 3: WANCBSI
Highlight
Copy
Compare
Share
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
