WANGSHEMBU MWOT 21
21
Pol Jerusalem to Ngui
1Kwome hwom ang müimüi wüi ngohüio le akaxlaxle achex. Khua ma tangthole talaxle kwom Kos to ngui; ofüi nyix kwome Rod alop, üntoxle imakhange thuile kwom Patra to pao. 2Ikhama kwom thoma Foinesia to le angkya khua tuita nuile kwomchu wüi ima thuile nga üntoxle achex. 3Saipras atale ngünkya khato kwom ngui, üntoxle ija chaknong ma toxlaxle shuathongchi fole Siria to apüi, üntoxle khua angkya hün Tair ma athai angkya daile kwom ikhama thai. 4Ikhato kwom thoma mongong mixbu züita bang. Hatdang tuita ibu füi nuile tox. Otsao Chasa zong makhange hwome Pol ang Jerusalem to taxka le akax. 5Ikoxle hwom füi nui angkya kwom hanpak ashukle hüikya füi tomle, kwom achex ilaxle amikya kwom lom tangchuale le. Sheko lüka hia naosom hwom pangwüi kwom füi tomtomle tingnu akaile azui. Kwom pangwüie fa ma chikux athong üntoxle zangjop. 6Ifüima kwome tata wünzuale tata füi müimüi ngohüio le akax, ilaxle kwom khua ma nga, iponge hwom a homchi to chat.
7Kwom Tair makhange Tolemai to thuithuile le; ikhato tüinaobue kwom wünpwonle kop, ilaxle hwom füi tomle kwom nyixta nui. 8#Mwt 6.5; 8.5.Ofüi nyix kwom achexle Kaisaria to ngui. Ikhato kwom kaxho apukkya mix Filip hom to ngui, ilaxle chix hama zak. Chix a Jerusalem ma zünkya dekon anüt khama tuita changkya. 9Chix ang sacha hwom naocha ali tüikya; hwome Zang kaxho apuk. 10#Mwt 11.28.Ikhato kwom hanpak hidaole nui, ituke Jehudi chaxwan tokya Agapa ajepa ju. 11Chix kwom hato hüi, Pol kux züpak lax, ija füi chix cha hia chix chak to kha, ilaxle thüi: “Ija a Otsao Chasae akaxkya kax changle: Ija züpak hopupa to Jerusalem ma Jehudi khünakbue ilailaile khaüi, ilaxle hwome chix mixnokbu chak to owüiole koxüi.”
12Kwome ija kax atatlaxle, kwom pangnue ilaxle ikhama asukya mamabuechu wüi Pol ang Jerusalem to chika koxwüi müisele abax. 13Ikoxlechu Pol-e lan: “Büthüipu! Hünzome ile sople ku mong mix ahikle hi? Jerusalem ma khak angkya ning chem, Jowanpa Jisu kuxma ku zi angkya ngaxchu achwonle tüile.”
14Kwome chix abax ang chitho, idaile kwome oshukma “Jowanpa mongtex wüi naxchang fatix”, le zangjople ashuk.
15Ikhato hidaole nui ilaxle, kwom mwot-kat achwon üntoxle Jerusalem to ka ang achex. 16Kaisaria angkya Jisu wangshem züita kwom füi tomle ka, üntoxle kwom wünthong ang lax angkya kha Nason hom to kwom apüi. Nason a ami pongto khange wüi Jisu wangshem tuita changkya.
Pol-e Jakop Waikya
17Kwom Jerusalem ma nguikya zuma tüinaobue mongmüi atungle kwom wünpwonle kop. 18Ofüinyix kwom füi tomle Pol Jakop füi apong ang pao; üntoxle tüichong mixmüibuchu wüi pangnu wüi tüikya. 19Pol-e hwom ang wünpwon salam kox ilaxle chix makhange Zange mixnokbu khato mokle hüikya bama bakle wün. 20Chix kax atatkya füima hwom pangnue Zang achuak. Ifüima hwome Pol ang thüi: “Tüinao! Ija chemle changpuix nange ngünle ngotüi. Mongong le hüikya Jehudi khünakbu hajat-hajat tüihule, ilaxle hwom pangwüi wanlom ma shingmongle ngokyabu changle. 21Nange mixnok chaxwan to ngokya Jehudi khünakbu ang Mosa Wanlom awütle, hwom susabu ang khwonzüt zom chizing ngo angkya hia Jehudi wanlom tole chingo angkya anwot-ano le ta le nang bama kwom hama wündaoa. 22Nang nguile tüile le hwome tütakoxchu atatüi jao. Chemle wünüi? 23#Huak 6.13-21.Kwome nang ang chemle thüipuix ile mok hüi. Ikhama tsaosax daokya mixsün ali tüile. 24Hwom laxlaxle paolax üntoxle otsao zomzing ma hakle khongailax ilaxle otsao zomzing ma tö koxkya ma bakkya otha thomlax; ifüima hwome ibu khangong ang tsuaküi. Imakhangetix pangnue wüi hwome nang bama wündaokya zangwün otsingtsing münchangle awanüi, itülüi, nang wüi Mosa Wanlom ma otya ma ngole le laxüi. 25#Mwt 15.29.Ikoxle mongong mixbu ang achangle hüikya mixnokbu hanpakma ‘chapabu ang koxkya süt taxsax; aji taxsax; üntoxle aji chiajen homle langkya müi chemchu taxsax; üntoxle hünzom chinunchakkai mwotbu füi malualua to atsaile ngolax’ le kwome wündaokya kax laiza le apuadaoa.”
26Idaile Pol-e ibu khünakbu lax üntoxle ofüi nyix wüi otsao zomzingle tsuak. Ifüima chix Zangshwom-Hom to pao ilaxle otsao zom zing ang obi nyix laxüihex üntoxle hwom mixhuak pangnu hanpakma tö otue koxüihex ija tsing ang kox.
Zangshwom-Hom ma Pol Kop
27Hanpak nyix anüt ashuküi khakhama, Asia haxtok tokya Jehudi khünak züitae Zangshwom-Hom ma Pol ngün. Hwome khünaknu pangnu to chüile mwop ngai ang tom ilaxle Pol kop. 28Hwome akhongle thüi: “Israel khünaknu! Kwom to asunhüi! Kem Israel khünaknu hia Mosa Wanlom tamchu ija Zangshwom-Hom füi opüipüi pangnu hama apua-ano le pangnu khato aham ngokya mixsün a ija changle. Ilaxle athax tomning chixe mixnok Ija Zang shwomnui to apüikya makhange ija Otsao Nui chitsaokya ang achangdaoa!” 29#Mwt 20.4. (Tingnu ma Pol füi tomle Efisia tokya Trofima ngünlaxle, Pol-e ija mixsün Zangshwom-Hom tochu apüidao tüiangpu le ana laxle hwome ile akax).
30Ija mwop ngaikyae tingnu pangkha towüi u, üntoxle khünaknu akhangle asoxlaxle Pol kop ilaxle Zangshwom-Hom angkya chix linle alai. Ifüi tomle Zangshwom-Hom ka hak. 31Jerusalem pangkha towüi mwopüna le Rom süpahi akhokya hato kaxkox pongma khünaknue Pol lang ang tungle ngo. 32Ifüi tomle süpahi lompae süpahi alixachongbu hia zangjang süpahi züizüi laxlaxle khünaknu hato zikle ngui. Süpahibu füi chix nguikya ngünlaxle khünakbue Pol to fitkya zak. 33Süpahi-Lompa Pol hato hüi, chix kop, ilaxle janbüi anyi füi mongle kha angkya kaxkox. Ifüima chixe atüi: “Ija a owa changkya, üntoxle chixe chem zia amadaopu?” 34Othom kha angkya khünak züitae tüle üntoxle mamabue mamale akhong. Idu khosam makhange süpahi lompaechu chem tomta changkya hex le opak chitiktsuak; idaile chixe chix khünakbu ang Pol hwom zanhu nui to dündao le kaxkox. 35Hwome chix dixtua chithong kople apüi, üntoxle khünaknu ziamale mwopkya khoma süpahibue Pol paile pao angkya lai. 36Hwom pangwüi chix füito azuile zik ilaxle akhong: “Chix langdao!”
Pol-e Alüile Ma Khose ang Ajong
37Hwome Pol zanhu nui to paoüi khakha ma, chixe süpahi lompa ma kaxju le thüi: “Kue nang füi kax tuita akax ang tsuak angchahex?”
“Nange Grik kax awanpia?”, le süpahi lompae atüi. 38“Ikoxle nang a atho angkya wan ma alünle ajongkya owang wanglaxle jat ali khünak chang-pax füikyabu faokha to paokya Ijip sün hia büle?”
39Pol-e lan: “Ku a Jehudi khünak, Silisia angkya Tarsas ma puxle akhokya tingnu ma nokpu tuita changpu. Ku ang khünaknu füi akax ang shongfa hüi.”
40Süpahi-Lompa-e chix ang akax ang kox. Idaile Pol dixtua chifün ma ajong ilaxle khünaknu to chix chak aja. Hwom dangle ngopongma Pol-e hwom füi Ibri kax ma akax.
Currently Selected:
WANGSHEMBU MWOT 21: WANCBSI
Highlight
Share
Compare
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
