WANGSHEMBU MWOT 22
22
1“Apu-apahom ilaxle kushem kuzuihom, hünzom thüntho ma kue ma khosele akax fang, shong apa hüi!” 2Chixe hwom füi Ibri kax ma akaxkya atatlaxle hwom dang ang süt; üntoxle Pol-e akax:
3 #
Mwt 5.34-39. “Ku a Jehudi khünak, Silisia angkya Tarsas ma puxkya changle, ikoxlechu ija Jerusalem ma Gamaliel chitong ma lainao tuita ningle tsongle hüikya mix changpu. Bangkya kem pupa wanlom to angkya bama kue thutle awan kopkya changpu, ilaxle anyix hünzom ningle kuechu wüi tsuakkya apongle ma tsün Zang mwottho to koxle thomkya mix changpu. 4#Mwt 8.3; 26.9-11.Ija Jowanpa lomtang tokya mix to kue omang amüt le zothupkya changpu. Kue sheko lüka pangwüi koplaxle hwom kun ma shokya changpu. 5Nguakhobu hia nguawangbue ija ku kax changtomta kox-a le kaxkhi fa ang tsuaküi. Damaska ma ngokya Jehudi khünakbu hato zakya hwom angkya laiza füi, ibu khünakbu koplaxle janbüi füi khak üntoxle sikangün ang Jerusalem to laxlaxle chat angkya hanpakmale ku Damaska to paokya changpu.
Pol-e chix Künlop-monglüi Mowün
6“Ile ku ahamle Damaska kop-hax khakha ma tüipongma, tungto shene, ding tokya wünnyane allele ku akhople nyan. 7Ku hax to düt üntoxle ku füi ile akaxkya kue atat, ‘Sol! Sol! Nange ku zo büthüikoxle thuppu?’ 8‘Jowanpa, nang owa?’, le kue atüi. ‘Ku a Nazareth nok Jisu, nange zothuple ngokya mix changpu’, le chixe ku füi akax. 9Ku füi tomle tüikya khünakbue wünnyan ngün üntoxle ku füi akax ngokya kaxzing chiatat. 10‘Jowanpa, kue chem moküi?’, le kue atüi. Chixe lan, ‘Zolax, üntoxle Damaska to donglax, üntoxle Zange nang hanpakma mok ang achwonle tüikya komle ikhato nang hama wünüihex.’ 11Ile wünnyan zongkyae nyankya khoma ku ang mik apwom, ikhoma ku füikyabue ku chak ma syet laxle Damaska to dün.
12“Damaska ma tüikya Jehudi nokbue achuak achenle twonkya kwom Wanlom tokya otsao khünak tuita Anania le amünkya mixsün tüikya. 13Chix ku hato ngui, ilaxle ku zuima ajong üntoxle thüi: ‘Tüinao Sol, chatle ngünlax!’ Ifüi shemle kue chatle ngün üntoxle chix to hu. 14Chixe thüi: ‘Chix mongtex tsing angkya chix otsao da ngün angkya üntoxle chix tun makhange akaxkya chix kaxzing atat angkya hanpakma kem pupa hwom Zange nang zünle kopdaoa. 15Nange chem ngündaopuix üntoxle atatdaopuix ibu pangnu khünak nok hato wün angkya bama nang tuita chix kaxkhi ang achangüi. 16Idaile athax chem shen ngo angkya tüipu. Zolax, ilaxle bapti lax ilaxle chix mün lünkya tokhange nang ochax sole awütlax.’
Pol Mixnok Hato Pao angkya Wüi
17“Ku Jerusalem to chat, üntoxle kue Zangshwom-Hom ma zangjople ngopongma kue mikngün ohün ngün, 18ima kue Jowanpa ngün, iponge chixe thüi: ‘Momlax üntoxle Jerusalem nonokhaile dantoxdao, chemthüikoxle ikha angkya khünakbue nange ku bama kaxkhi fakya pongle münkopüi.’ 19Kue lan, ‘Jowanpa, kue sinagok to nguilaxle nang to ongkyabu to tüle fitmüi le hwonkya hwome abakle awan ngole. 20#Mwt 7.58.Ilaxle nang bama kaxkhi famix Stefen lang pongmachu ku tüikya. Kuechu wüi, Chix langkox wüi müiüi, le akax ilaxle chix langkyabu nyiza kue nyepu.’ 21Jowanpa-e ku ang thüi: ‘Paokox, chemthüikoxle kue nang ochu to mixnokbu hato apaoüi.’”
22Ija kax akaxkya kople khünaknue Pol zangwün to apale ngo; ifüima hwom azaxle akhong: “Chix lumpan akaidao! Chix ozün ma ngofang münchang!” 23Ile akhong nga le hwome, ma nyiza akyet ilaxle ding to labu fu. 24Rom süpahi lompae Pol zanhu nui to dün angkya kaxkox, üntoxle Jehudi khünakbu chix füi itukux chem khoma awukpuix Ija hanpak opaktik ang chix to fitkox le tom. 25Ikoxle hwome fit ang chix to khakkya zuma, ikhama ajongle tüikya alixachong tuita ang thüi: “Roman nokpu tuita to, chem zia amadaopuix, ija opak chitik homtoxle fit angkya wanlom tüipia?”
26Otue ija alixachonge ija kax atatpuix, chix süpahi lompa hato pao ilaxle atüi: “Nange chem hwonpu? Ija mixsün a Roman nokpu tuita changa!”
27Süpahi-Lompa-e Pol hato hüilaxle atüi: “Ku hama apuahu, nang Roman nokpu changlaxma?”
Pol-e lan: “Changle!”
28Ija süpahi lompae thüi: “Kuchu wüi ngun huanuma koxlaxle Roman nokpu ang achangpu.”
Pol-e lan: “Ku a nuput ma wüi achangpu.”
29Ifüi shemle Pol ma kax atüi ang thüikya khünakbu chix ha angkya chat; ilaxle Pol Roman nokpu changkya khakle koplaxle süpahi lompa abanle ngo.
Pol Nguawangbu Thüntho to Apüi
30Ofüi nyix, Jehudi khünakbue chix ma chem tsaihux kaxhux fepuix le opaktik ang chix da ilaxle nguakhobu hia nguawangbu nyakle asox ilaxle Pol jolaxle hwom thüntho ma ajong.
Currently Selected:
WANGSHEMBU MWOT 22: WANCBSI
Highlight
Share
Compare
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
