WANGSHEMBU MWOT 20
20
Mesidonia hia Akaia to
1Wuk dang füima Pol-e mongong mixbu nyakle asox, ilaxle hwom zong adünle zangwünkya füi hwom ang wünzua salam kox. Ifüima chix Mesidonia to pao. 2Chix ibu haxtok to aham ilaxle khünaknu ang zong adünle kaxhobu apua. Ifüima chix Grik nok to ngui. 3Ikhato chix lyetkua azom nui. Chix Siria to le ang achwonle ngokya, iponge Jehudi khünakbue chix lang ang azya ngokya awanle lax; idaile Mesidonia akaile chatkya wüi müiüile chixe thüt. 4Beria tokya Pirha sasün Sopata chix füito azui; ilaxle Thesalonika tokya Aristarkas hia Sekunda nyi; Darbe tokya Gaia tamchu Timothi; anaolechu Asia haxtok tokya Taikhika hia Trofima nyi le chix füito azui. 5Hwom achale le üntoxle Troas ma kwom tanle nui. 6An lum pangpua füima kwom Filipi angkya khua ma pao, üntoxle nyix aga füima Troas ma hwom apong, ikhato kwom hatdang tuita nui.
Pol-e Troas oshuk ang Waikya
7Hat azok ma kwom tomle fongsax ang asox. Chix ofüi nyix wüi pao angkya daile Pol-e khünaknu hama ozulole tsüdang kople apua-anole ngo. 8Kwom asoxkya nui homdingkho to lyem wüntik obibi hex atsople tüikya. 9Eutika le amünkya mixsün thangmik ma thungle ngokya; ile Pol-e zangwün ozu alwotkya füito, Eutika to mikngüt thule hüi, oshukma chix mikngüt khaxle jipkya zuma homthün azom kho tokya thuile dütle haxkop. Hwome chix tswonkya thoma chix a ziün le bang. 10Ikoxle Pol-e julaxle zikle hüile chix to thuile kün. Chixe: “Taxaban, chix ozün ma wüi tüile”, le thüi. 11Ifüima chix homdingkho to donglaxle an ashik, ilaxle mongong mixbu füi tomle sax. Hwom füi zanghan chüdün kople zangwünle ngo laxle Pol achex. 12Hwome ija mixsün hom to ozün ma chat ilaxle mongsom kop.
Troas makhange Pol Milita to aham
13Kwom achale achex ilaxle khua ma ngale Asos to ka; Pol a ikhato tix khua ma nga angkya. Chix ikhato haxza-haxzale ahamle ka angkya daile, kwom füi ile changhüio le akax. 14Otue Asos ma chixe kwom füi apongpuix, kwome chix khua ma angat le lax üntoxle Mitilen to ka. 15Imakhangechu kwom khua ma wüi kale ofüi nyix Kaios alop. Nyixta füima kwom Samos to ngui, üntoxle ofüi nyix wüi kwome Milita alop. 16Asia haxtok ma chatle hanpak chiashix angkya kuxma, Pol-e Efisia to khua ma ka angkya mongzangwünle tsuak. Chix a Jerusalem to ngui ang mom, ilaxle jangtsuak thüiba Pentekos nyix ikha alopse thüt.
Efisia angkya Tüinao hwom füi Pol Wünzua Kax
17Müimüithom tüichong mixmüibu chix füi apong angkya bama Pol-e Milita tokhange Efisia to kaxho apao. 18Hwome ikha alopkya zuma, chixe hwom ang thüi: “Asia haxtok to ku onguiwang nyix makhange hünzom füi ku chemle ngole hüidaopuix hünzome awan ngopu. 19Jehudi khünakbue lang ang tungkya tokhange ku hato hüikya zothup akaile thuakjokkya hia mikfi füi Jowanpa da tuita changpu le kue ku mwot mokle hüidaoa. 20Hünzom hato noktu ma hia kako ma apuk apuale tamchu anwot-ano le hüipongma hünzom to fongse a lükya olom ma kue otuechu hulanle chitoxkya hünzome awan ngopu. 21Hwom pangnu wüi ma ochax tokya Zang hato chatle, Jowanpa Jisu shwom angkya changle le Jehudi khünak hia mixnok pangnu ang wüi kue otsing tomtata ma kaxkhün tomwüi fadaoa. 22Ikhato ku chemle changüihex münawan, ikoxlechu Otsao Chasa kax ma laxle athax a ku Jerusalem to paoüi. 23Kun ma sho angkya hia sikngüne ku tanle ngole le tingnu pangkha towüi ku ang kaxkhün fale hüikya tata kue awanwüi. 24#2 Ti 4.7.Jowanpa chingcha bama Kaxho Müikya apuk angkya, Jowanpa Jisu-e ku ang koxkya mwot, ija ku mwottho mokle jangtho laxba, ku zongma ku tsün chemchu münchangle texpu.
25“Zang Wangting bama apuk-apua ang ku hünzom khato ahamle ngopu. Ikoxle athax a hünzom opupuechu ku sün chatle ngün ang münkopüi le kue awanle. 26Idaile anyix kue hünzom ang otsing tomtata ma ngaipu; hünzom owawa jangmax jangsamba, ku ma chem tsaitox kaxfe angkya müntüipu. 27Chemthüikoxle kue Zang tutex pangnu hünzom hama chingai homle chitox. 28Ma hanpakma alüile ilaxlechu Otsao Chasae nang ang nyelaxo le koxkya pangnusa hanpakma khünkhile nye ngolax. Chix Hosa zi ang koxkya makhange ma ang achangkya Zang müimüithom ma chunnyetmix ang achanglax. 29Ku cha achex füima, chisumüikya shwonbu hünzom hato hüiüi, ilaxle hwome othom angkya chunbu komle thomjoüi. 30Hwom füito mongong mixbu chichangkya lom to chüile apao ang hünzom khama züizüie atse le zangwün angkya hanpak tuita hüi angkya changle. 31Mik hingle ngolax, üntoxle zanglao azom bama kue mikfi ajenle, zangnak zangngaile hünzom pangnusa hama apuakya kaxbu pangwüi mong ma thomlax.
32“Üntoxle athax a kue hünzom Zang tamchu chix chingcha Kaxho chak to koxpu. Chixe hünzom ang chasa ma tsakzong koxüi ilaxle chixe ma khünaknu nok hanpakma thomkya mohiman hünzom ang koxüi. 33Kue mixkux, jan, hun, chichangba nyiza tütatochu za münlo tox. 34Ku hanpakmachu üntoxle ku füikya üithobu hanpakmachu wüi tütalichu kue ija ku chak füitix wüi moklaxle okhongui le lax-twonkya hünzome awan ngopu. 35‘Kopkya mix füi koxkya mix mongmüi wüi achongkya’ le Jowanpa Jisu-e akaxkya kax mong ma koplaxle, kue mokkya ningle azongle mwot moklaxle keme chitsuak chiman mix to fong angkya changle le pangnu li-lom ma kue hünzom hama apuadaoa.” 36Otue Pol-e zangwün ashukpuix, chixe hwom füi tomle chikux athong laxle Zang to jop. 37Hwome chix füi akünle wünzua tun apongkya zuma hwom pangwüi sop. 38Hwome chix chatle tam münngünüi le akaxkya chix kax khoma sisile hwom ang mongma. Üntoxle hwom khua ha alople chix füi tomtomle hüi.
Currently Selected:
WANGSHEMBU MWOT 20: WANCBSI
Highlight
Share
Compare
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
