RUTH 1
1
Elimelek tüsho Ayamkhün Moab lim Yükhi
1Mahkhaprübonü yakzan shuhde alachoki lomi ching khümzung lakheah, tüsho Juda ching Bethlehem mihtsürü khülang Moab lomi ching, aniube tüsho tsührü athrürü mahne bebah tsode yünü la. 2Ju buh mung Elimelek, aniube mung Naomi, tüsho atsührüne mung Mahlon tüsho Kilion; arübo ju Juda ching lakhi Bethlehem chingnü Ephrarü lakheah. Arübo Moab lomi ching yü tüsho ju ching la. 3Tüshe Naomi yamkhünbuh Elimeleknü aniube ju atsührü athrürü mahne lung zojihbah sheabah, 4atsührünenü ane niuberü Moabberü lu: khülangbe mung Orpa tüsho püpü ju Ruth. Arü ju ching kam thürü bande la; 5tüsho Mahlon le Kilion ane chido sheabah, jumonü Naomi a niubuhrü tüsho tsührü mülade alangzü lungride la.
Naomi tüsho Ruth Bethlehem lim Alodarükhi
6Judüki Atungpuhnü amihtsürübo kilim latsühlayung müngühjih-a lah de Naominü so; jumonü atsühmeakbe büne bebah Moab lomi chingnü rholodarüpü thsakham. 7Jumonü anihbenü atsühmeakne bebah arü lapung chingnü Juda lomi lim alungpü limtsahmusu. 8Tüshe Naominü atsühmeakne ki tha, “ Thüyam lim alode yüang tüsho nüke berü ki laang. I lung tüsho sheabahrü lung nükenü lade arükhi thsungkheak Atungpuhnü nüke müthsümshang. 9Tüsho Atungpuhnü nüke chido yamkhünbuhrü atsü ngübah sühakhim ching lapü mülüshang.”
Jumonü Naominü mün müthsüpde chode tha. Tüsho arünü düsheak akhiukde trip. 10Tüsho anenü anihbe ki tha, “Yung! Ike nü lung nü mihtsürü kilim yübah.”
11Tüshe Naominü tha, “I tsühne, nüke alode ayübeah, tümüde nükenü I lung arünela? Nüke yihlulopü thsüde I tsührü athrürü lalobah de lümcho shi? 12I tsühne tsoloang, tümüde I mürhanglokhukpü thsüde khide shinabahdo. Thiyuthiyu tsührü labah de lümbah inü khihre rhangbah tsührü zübebe she, 13nükenü arü zo khiungde aleangba de? Ju dünkheaknü mührü ki mürhangyiba shi? Yung, I tsühne, ju amukukkhi ah de nükenü mükheahlah. Nüke kheaknüa I pü khide mulong rozhakbe ah tümüde Atungpuhnü I kheak khide khühde rhimodo.”
14Kheaküshe anenü atrippü tankih. Junangde Orpanü ani kheak mün müthsüpde chode thabah wulunglo, tüshe, Ruth a Naomi kheak kapkih. 15Jumonü Naominü tha, “Ruth, nü chi a nihbe mihtsürü tüsho thrünpuhbo kilim alode wulungdo, nü she yande wulungang.”
16Tüshe Ruthnü alo, “Nü bahbah atsopü I ki dümushu! I nü lung yüanü. Nü küching yübanü I she ayübah, nü küching labanü I she alabah; nü mihtsürü ju I mihtsürü thsübah, tüsho nü Thrünpuh ju I Thrünpuh thsübah. 17Nü küching shebanü I she ashebah, tüsho ju ching kiuyuka bahbah. Ashenü lang müchamde inü nü kheaknü bahbah tsosho Atungpuh thsümüchi amütsübe I kheak akihshang!”
18Küyimki Ruthnü anihbe lung arüpü mulongkhitkhi Naominü mütsankhea, tümü müthadebah.
19Jumonü Bethlehem mukhiungchokia ane judü lang yü. Küyimki ane akhiungkhea, kiuto ching larü athrünkhi asüh, tüsho aliberübonü zhide tha, “ Atsütsü ha Naomi a shi?”
20“I ki Naomi#Naomi amütsan müngühmühi. de düji,” anihbenü alo, “ Mara#Mara amütsan akhüh. de jiang, tümüde Wuto Thrünpuhnü I kheak khide khühde rhimodo. 21I ha chingnü atsochoki muzhomopungde yü, tüshe Atungpuhnü khah keangkeang belodarü. Wuto Atungpuhnü I junoabahde I kheak thsümütsü jihchoshihbah tümüde I ki Naomi de jicho le?”
22Hanangde Naominü Moabrü atsühmeakbe Ruth bebah alodarü. Ane Bethlehem khiungchoki barli hi yimlupü tankihde alakheah.
Currently Selected:
RUTH 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.