MAHKHAPRÜ 21
21
Benjamin Trük Niuberübo
1Kheakü Israel mihtsürünü Mizpa ching thiyuchihchim lude tha, “Isa shenü she nihbuh tsührü aliberü Benjaminrü kilim niuberü thsüpü müjih.” 2Judüki mihtsürübonü Thrünpuh yam ching yü tüsho arelim khiungde Thrünpuh miki ju ching la. Arünü arü düsheak achangnü düsüknimde trip, 3tüsho tha, “O Atungpuh Israel Thrünpuh, khihni Israel trük khülang dükheakpü thsüde Israel ching ha küde adünjikhea?” 4Jumonü ashido yapsu mihtsürübonü mükikde asürübah ju ching kingaün sadam thsü tüsho taka kingaünkhi le mungtsü kingaünbo jih. 5Israelrünü tha, “Israel trük alala bolungnü shepü Atungpuh miki amukhungrü lung marü le?” Tümüde arünü Mizpa ching Atungpuh miki maturü dünkheak thiyuchihchim ato khülang thsü, “ Tsükjide api asheshihbah.” 6Tüsho Israelrünü arü keoniorü Benjamin dünkheak mulong rozhakde tha, “ Khihni Israel chingnü trük khülang yihkhita bahdo. 7Aninga larübo niuberü thsungkheak isanü küde athsüba, tümüde isanü arü kilim isa tsührübo mürhangshih de Atungpuh ki thiyuchihchimdo.”
8Tüsho arünü tha, “Israel trük chingnü shepü Atungpuh kilim Mizpa ching matu le?” Atsütsü, Jabesh-gilead chingnü sheshe amukhungrü lung binkheampung ching matu. 9Tümütüsho mihtsürübo khechoki Jabesh-gilead ching larü sheshe mülakheah. 10Jumonü amukhungrübonü athrungrü amüzhak mihtsürü 12,000 yüshihde thiyukhüm jih, “Yüang tüsho Jabesh-gilead ching larü aliberü tüsho azürü bede nukshangnü laksahang. 11Tüsho nüsanü arhimopü ju ha: Nüsanü mütsangkhitkhi athrürü tüsho aliberü aban laksahang.” 12Junangde arünü Jabesh-gilead ching larü atsangkhit anünürü athrürü lung munungrü 400 yimkhit; tüsho arübo Kanan lomi ching lakhi Shilo binkheampung ching bedarü.
13Judüki amukhungrü athrünkhinü Rimmon lungto ching larü Benjaminrü kilim thiyu yüshih tüsho arü ki mungtsü thayuk. 14Jumonü ju kim ching Benjamin alodarü, tüsho arünü Jabesh-gilead liberü müsheshihde khümkhitkhi arü kilim jih; tüshe arü thsungkheak suhdahde müyimkhityide alakheah. 15Tüsho mihtsürübonü Benjamin thsungkheak mulong rozhak, tümütüsho Atungpuhnü Israel trük bolung ching akeangkeang khülang akhiukshih.
16Judüki amukhungrü azothsürübonü tha, “Isanü aninga larü niuberü thsungkheak küde athsüba, tümütüsho Benjamin liberübo laksahkhamdo?” 17Tüsho arünü tha, “Benjaminrü aninga larü thsungkheak yamrüplurüp labeah, junangde Israel chingnü trük khülang müdükheak. 18Tütüshe, isanü isa tsührübo arü niuberü thsüpü müjih, tümüde Israel mihtsürübonü thiyuchihchim, ‘Benjamin kilim niuberü jihrü muthrumünean thsang.’” 19Judüki arünü tha, “Bethel dukulim, Bethel chingnü Shekem wutu lim limto aniakhiuklim, tüsho Lebbona düjinglim Shilo ching kam aban Atungpuh thünio khülang lachoh.” 20Jumonü arünü Benjamin mihtsürübo ki thsangdande tha, “Yüang, tüsho kurungasolubo ching jimde aleangang, 21tüsho kheahang; tüsho küyimki Shilo liberübo atsünpü akhiukbanü, kurungasolubo chingnü akhiukang tüsho athrürü abannü Shilo liberü bolungnü niuberü thsüpü ramang; jushu Benjamin lo ching yüang. 22Küyimki arü bebuhrü yungsho arü khiungmungrü arübah atsangbanü isanü arü ki thabah, ‘Isa dünlimnü arü ki muzhoang, tümütüsho thirithsü ching isanü arü khilim niuberü mulujih; tüsho nüsa amülim müla, tümütüsho nüsanü arü kilim nüsa tsührübo müjih.’” 23Tüsho Benjamin mihtsürübonü jude rhimo; arünü atsünrü bolungnü arü abande suhdahde niuberübo rama lu. Jushu arünü yübah arü yamrüplurüp kilim rholo tüsho kiutobo thsülobah jurü ching la. 24Jumonü Israel mihtsürü abannü ju kim ching chamachihde nihbuh trük, yamkhün tüsho nihbuh yamrüplurüp lim yü.
25Ju kim ching Israel ching kiulongthsürü mülade alakheah; mihbüm abannü nihbuh mük ki tümü alungkianü ju rhimo.
Currently Selected:
MAHKHAPRÜ 21: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
