RUTH 2
2
Ruthnü Boaz Lu ching Rhimokhi
1Kheakü Naomi yamkhünbuh Elimelek pürü buhtsüh chingnü alarü mihtsürü khülang amung Boaz lakheah. 2Moabberü Ruthnü Noami ki tha, “Yimlurünü abahkhi himüdre mopü thsüde I thulu ching yüanü. Mihtsürü khürünü a I ki amuzho huhpü labah de lümlah.”
Noaminü alo, “I tsah-a, Yüang,”
3Jumonü Ruthnü thulu ching yü tüsho yamlarü dunglim hi-müdre mode tsah. Tüshe thulu ju Elimelek buhtsührü Boaz lu lakheah.
4Adükeak anükhüh dunglim Boaz ju Bethlehem chingnü arübah yimlurübo ki makshe jihde tha, “Atungpuh nüsa lung lashang!” Arübonü api ki alo, “Atungpuhnü nü müngühshang!”
5Yimlurü bolung abebuh ki Boaznü keokhi, “ Anünübe ju shepüa?”
6Tüsho abebuhnü alo, “ Api Naomi lung arükhi Moabberü ah. 7Anihbenü yimlurü dunglim hi-müdre mopü I ki keokhikheah. Yün ching anükhüh kheak lang atsungkheambah yapsunü kheakü khiungde müdüchingde rhimochoh.”
8Boaznü Ruth ki tha, “I tsah-a, nünü ha aniang, ha luphü ching hode püpü lim hi mode düyü, tüshe I yamlaberü yankihbah rhimoang; 9arü kükheak yimluchonü kheahkihang tüsho arü dunglim yanang. Nü kheak küpkhuk müjihshihpü thsüde inü athrününgtsüngbo ki thaabahdo. Küyimki nü kethüriba, yüang tüsho athrününgtsüngbonü khipyuka zokhi keluh ching yo yungang.”
10Ruthnü alo lim ami mükhümbah Boaz ki tha, “I khiungkeberü khülang ah dale nünü I mürühpü thsüde nü mük ki tümü kheahkhitkhea?”
11Boaznü alo, “Nü yamkhünbuh sheshu nünü nü ni thsungkheak tümü rhimokheanü alala inü sodo. Tüsho nü be nü buh tüsho nü zübe lomi bahjihbah küruk nünü püpüki mümükheahkhi mihtsürü bolung lapü arükheanü inü mükheahlah. 12Atungpuh Israel Thrünpuh shepü ghidükeang bukkhüp nü tsoyukpü arükheanü, apinü nü rhimo tüsho nü mihkhah mode thsambah jihshang!”
13Ruthnü alo, “I tungpuh, nünü I kheak khide amüthsüm huhchoh, tümüde I nü yamlaberü ruk yunga lalashe mulong sühakhimde asuk.”
14Yimtsühchoki Boaznü Ruth ki tha, “ Ha kheak arübah yikhap asanke ching thsambah tsühang.” Jumonü alibenü yimlurü rheang ki binbah Boaznü ajihkhi yikhap abukthsüde tsühbah aninglo. 15Jushu alibenü hi mopü wusu, tüsho Boaznü athrününgtsüngbo ki tha, “ Hiphung ching yo she moshang, tüsho anihbe düyanlo. 16Tüsho hi aye khürü aphung chingnü thokhia zojihbah ju moa lushang tüsho anihbe düthürüh.”
17Jumonü Ruthnü arelim khiungde thuluphü ching hi mode yü, tüsho ju kingkhikhi ju khiduh khülang bande adünkhit. 18Apinü hi küdükhüh momukhungkheanü kiuto ching hande alungbah ani ki huh. Tüsho anihbenü tsahninga ahankhi she yihkhita jih. 19Naominü alibe ki keo, “ Küchingnü hadükhüh momukhungkhea? Nü she lu ching rhimokhea? Nü kheahyukbuh kheak Thrünpuhnü müngühshang!” Jumonü, I Boaz lu ching rhimokheah de Ruthnü Noami ki tha.
20Noaminü atsühmeakbe ki tha, “Atungpuh shepünü arhang larü tüsho asherü mübahyukde muzhochonü apinü müngühshang!” Kheaküshe Noaminü anihbe ki tha, “ Ju buh isa trükrü tüsho buhtsührü ah.” 21Tüshe Moabberü Ruthnü tha, “ Apinü I ki ha she tha, Müyimlukhamyi khiungde I yamlarü lung hi moang.”
22Naominü Ruth ki tha, “ Am, I tsah-a, yamlaberü lung Boaz lu ching rhimokhi lungkido, khürü lu ching yükhülaa nü küpkhuk jih-a labah.” 23Junangde Ruthnü Boaz yamlaberübo lung barli hi tüsho wheat hi müyimlukhamyi khiungde hi mo. Tüsho judü lang anihbenü ani lung lakheah.
Currently Selected:
RUTH 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.