FILIPI 3
3
Atsütsü Thiyuro-lungki
1Akheam ching, I keoniorübo, Atungpuh lung asühang. Nüsa kilim ju rukhüh thrütlopü I küpkhuk müla, tüsho ha nüsa kümrü lah.
2Khihnubo, amütsü rhimorü, shih thsümünimrü aheangang. 3Tümüde isa ju me ching Thrünpuh kingaünrü, Jisu Khrista ching müretahrü, tüsho shih ching mulongram mülakhi thiyuro tsütabahkhi lah. 4Judüalalashe inü she shih ching mulongram lakhi amütsan lah. Mihtsürü khürünü shih ching mulongram lakhi thsungkheak api amütsan lah de lümsho, I alü thsüde lah: 5#Rom 11.1; Yunir 23.6; 26.5tizheah nipü tsütabah, Israel mihtsürü, Benjamin trük, Ibrirü zübekhi lah; yakzan yandüa Pharisi, 6#Yunir 8.3; 22.4; 26.9-11mulong sümsüm yandüa borü thsümüchirü; thiyuro-lungki yandüa yakzan bukkhüp amudopü müla. 7Tüshe tümüpürü I alü thsükheanü kheakü inü Khrista dünkheaknü kukshahkhi de lümchoh. 8Jisu Khrista I Tungpuh de amükheahkhi ching khide athülün lakhinü inü lüpdükhi kukshahkhi khechoh. Tümüde api dünkheaknü alala kukshahkhi inü thsünü, tüsho jurü sünit khejihchoh, junangde inü Khrista alü thsübah 9tüsho yakzan yande I küdahnü thiyuro-lungki kamkhi yung tüshe Khrista ching akin hode akin kheak ningkihkhi Thrünpuh kilimnü arükhi thiyuro-lungkinü I api kheak ngübah; 10junangde inü api tüsho arhang kamlokhi wu mükheahbah tüsho api shekhi ching api ruk kamde thsünükhi ching shihcham lubah, 11junangde kuksho ashe chingnü arhang kamlokhi khiungbah.
Münchi Khiungpü Alihkhi
12I ha ngüabahdo yungsho I khiukdahabahdo de yung; tüshe inü ju tholopü mürangchoh, tümütüsho Khristanü she I tholodo. 13Keoniorübo, ha inü tholodo de mülüm; tüshe inü khülang rhimokhi ju, dunglim tümü lanü mihababahbah müngüh tümü lanü akhiungpü thsüchoh. 14Jumonü inü Jisu Khrista hode Thrünpuhnü ajikhi akulim thsambah ngüpü langakindo münchi lim alihchoh. 15Isa sherü azorüanü ha lümbeah; tüsho nüsa lümkhi püpü lasho Thrünpuhnü nüsa ki mütsanjihbah. 16Isanü khiunga lakhi thiyuro ju lang tholoanü.
17 #
1 Kor 4.16; 11.1 Keoniorübo, I kheahkhiang, tüsho isanü nüsa kilim jihkhi yakli yande sherünü lachonü mütsanang. 18Püpüki inü alochode nüsa ki thado tüsho kheaküshe chike bukde thachoh, ahihkhühnü Khrista sangkim yo thiriri thsüde lachoh. 19Arü akheam ju athsümünim, arü thrünpuh ju buk, tüsho arü müretah ju arü achihbe, alomi kukrukbo kheak lümkhi zolah. 20Tüshe isa mihkhung jua yinmi ching lah, tüsho ju chingnü isanü akhümkhitrü, Atungpuh Jisu Khrista aleangchoh. 21Apinü anihbuh yakzan bukkhüp lüpdükhi hande arükhukkhi wu hode isa reangmüzahkhi pang müthrijihbah tüsho müretahkhi api pang nangde akamshihbah.
Currently Selected:
FILIPI 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
