FILIPI 2
2
Khrista Azhihayih tüsho Ato Kamkhi
1Jumonü Khrista ching mulong toshihkhi, amuzho sühakhim, Me ching arihako tüsho tsüyihde muzhoachihkhi lasho, 2ju lümkhi, amuzho, arihako tüsho lümkhi khülangnü I asühkhi banthsangshang. 3Yihnelune yungsho shilode tümü she düthsü, tüshe azhihayih chingnü nü kheaknü püpürü atsübe khejang. 4Nüsa mihbüm abannü nihbuhnü amulongkhi lang dükheah, tüshe püpürünü amulongkhi she kheahang. 5Nü yakli ju Khrista nangde alabeah: 6api Thrünpuh nangde lalashe, apinü Thrünpuh akede rukhüh kampü mülüm, 7tüshe mihtsürü nangde zübebah, yamlarü khülang kamde api akeangkeang kam. 8Tüsho mihtsürü shihphü nangde azhihayihde kambah ashepü ching, sangkim kheak shepü she mihyuani. 9Jumonü Thrünpuhnü api changde shuhkih tüsho mung alala kurungkheak atobe mung api kilim jih, 10junangde yinmi ching, alomi kheak tüsho lüpdükhi mukhuknü Jisu mung ki khukningbah, 11tüsho Abuh Thrünpuh müretahpü Jisu Khrista ju Atungpuh de thiyutha alalanü alokhibah.
Alomiküp ching Ayin nangde Atahkhi
12Jumonü amuzho müyamrübo, nüsanü kamruhroro mihyuanikhi nangde kheaküshe I lachoki lang yung tüshe alü thsüde I mülachoki trede tüsho ajande nüsa akhümkhit rhimokhitang; 13tümüde amulongpü tüsho api lümkhi atsü rhimopü nü kheak rhimokhi ju Thrünpuh ah.
14Matsangde yungsho mükeokhide lüpdükhi rhimoang, 15junangde nüsa areak mükihde tüsho amülim mülade, ha akhürang tüsho bephülap lün ching Thrünpuh tsührübo thsüde, arü bolung alomiküp ching ayin nangde tahde, 16rhangdung yu kheak düngde aramrihbah, junangde Khrista nimung ching I akeangkeang ching malih yungsho akeangkeang ching mükhisah de inü akükheangbah. 17Tüshe nüsa akinnü Thrünpuh kilim jihkhi shuhmülanga kingaünkhi kheak I thiyih bukkihkih she, inü nüsa alala kheak asühlah tüsho asühachihchoh. 18Junangde nüsanü she I lung asühbeah tüsho asühachihbeah.
Timothi tüsho Epaphrodita
19Inü nüsa kilim nahde Timothi thiyipü Atungpuh Jisu kheak mulonglam lah, junangde nüsa yusheaknü I reangzahbah. 20Nüsa arung thsungkheak atsütsünü amulongrü I lung api nangde she müla. 21Arü alalanü Jisu Khrista thsungkheak yungde arü nihbuh künkhi yimchoh. 22Tüshe künangde tsührü thsüde buhrü ki thiyusheakatsü ching I tankihkheanü Timothi thülünkhi nüsanü mükheahlah. 23Junangde I künangde alabanü mükheah akede inü api thiyibah; 24tüsho nahde I she nüsa kilim arüpü Atungpuh kheak kinlah.
25I keoniorü rukhüh rhimorü tüsho rukhüh bonungrü, tüsho nüsa yunithsürü tüsho I yihnüpü ching tankihrü Epaphrodita nüsa kilim thiyipü yihnüpü lah de inü lüm, 26tümüde apinü nüsa alala thsungkheak mürheangde lüm, tüsho nüsanü api tukthsülah de asokhi hode api lümthsünü. 27Atsütsü api ashepü thsüde tukthsüde alakheah. Tüshe Thrünpuhnü api le I kheak mihmüthsüm huhdo, jude yungkhülaa I a mulong rozhaknü mulong rozhak lapü lakheah. 28Jumonü api thiyipü inü alü thsüde mulonglah, junangde nüsanü api ngülochoki asühachihbah tüsho I mulong sansan nükde alabah. 29Jumonü Atungpuh lung asühde api leangkhiang; tüsho hadürü mihtsürü ki wüntre jihang, 30tümütüsho nüsanü mukukkhi, api rhangdung jihde I rungpü ching, Khrista rhimo thsungkheaknü api shemüchihdo.
Currently Selected:
FILIPI 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
