FILIPI 4
4
Thsangdankhi
1Jumonü inü muzhokhi tüsho lümrhihkhi, I asühkhi tüsho I kuthran, I keoniorü, inü muzhokhi müyamrübo Atungpuh lung düküngde zhipang. 2Inü Euodia tüsho Syntake ki keoniorü nangde Atungpuh lung arihang de mushuchoh. 3Tüsho harü liberübo rungpü nüsa rukhüh rhimorü ki she inü keokhichoh, tümüde arünü Klement tüsho rhangdung hüm ching mungbo thrüta lakhi püpürü I lung rukhüh rhimorü lung thiyusheak-atsü ching banthsangde rhimodo.
4Atungpuh lung kamruhroro asühang; inü thalochoh, asühang. 5Nüsa arümkheamachihkhi alalanü mükheahshang. Atungpuh thüninde lah. 6Tümü thsungkheak she mulong düsansan, tüshe lüpdükhi ching tamkhüntamnüde tüsho makshe jihde amushukhibo Thrünpuh ki mükheahshang. 7Tüsho anikhitkhi alala kihode alakhi Thrünpuh mungtsünü Jisu Khrista ching nüsa mulong tüsho lümkhibo aheangbah. 8Akheam ching, keoniorübo, tümüpürü thiyuro la, tümüpürü wüntrepü la, tümüpürü alim la, tümüpürü atsangkhit la, tümüpürü akhamkhi la, tümüpürü amuzho la, tümüanü atsüdak lasho, tümüanü mungshipü thülünde lasho, judürü dünkheak lümakheahang. 9Nüsanü I kheaknü tümü anikhitde, leangkhide, sode tüsho ngüdünü rhimoang; tüsho Thrünpuh mungtsü nüsa lung labah.
Thsambah thsungkheak Makshe
10Nüsanü akheam ching I lümrhihkhi aso kamlokhi Atungpuh lung inü tode asühchoh; nüsanü I thsungkheak lümrhihde lado, tüshe nüsa kim müngüde lado. 11I yihnüpü lamonü ha thachoh yung, tümütüsho tümütümü kuhi thsüthsü she I reangkeampü inü anikhitdo. 12Tümü yihnüpü labea tüsho suhdahbeanü inü mükheahlah. Kuhi tümükhüh ching yungsho alala ching bukthsüpü tüsho akhümpü, suhdahpü tüsho mülamüthsüpü inü anikhitdo. 13I sühmüh jihbuh hode inü lüpdükhi thsükhuklah.
14Tüshe I küpkhukbo ching nüsanü arungkhi ju nüsa tsüdakkhi lakheah. 15Thiyusheak atsü atankih ching, I Macedonia chingnü akhinchoki, nüsa kheak hode ajihpü tüsho aleangkhipü ching borü shenü she I lung matrurungde nüsa Filipirünü mükheahlah; 16#Yunir 17.1#2 Kor 11.9Tesalonika ching she nüsanü alochode I kilim arung mühah. 17Ju inü thsambah yimkhi yung; tüshe nüsa alü thsükhi ching bukhi sangaso inü yimchoh. 18Inü khiukde tüsho alü she leangkhido; nüsanü amühahkhi thsambahbo rhümthünea kingaün aleangkhikhukbe, shuhmülanga jihbe tüsho Thrünpuh asühshihbe Epaphrodita kilimnü leangkhibah I suhdahde lah. 19Jisu Khrista ching api müretahkhi lakhit ayannü I Thrünpuhnü nüsa yihnüpü lüpdükhi jihbah. 20Isa Abuh Thrünpuh kilim lünnü lün müretah thsang. Amen.
Akheam Salüm
21Jisu Khrista ching amüsührü aban ki salüm. I lung lakhi keoniorübonü nüsa kilim salüm jihchoh. 22Amüsührü alala, adungto thsüde Kaesar yamkhünnü nüsa kilim salüm jihchoh.
23Atungpuh Jisu Khrista amüthsüm nüsa alala lung laang.
Currently Selected:
FILIPI 4: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
