WÜHKHE 32
32
Jordan Aniakhiuklim Trükbo
(Yuzüng 3.12-22)
1Kheakü Reuben tüsho Gad tsührübo akam-shiwüh hihdakde alakheah; tüsho küyimki arünü Jazer tüsho Gilead lomi ngükhea, ju lomi ju shiwüh akampü tsüde alakhea, 2Gad tüsho Reuben tsührübonü amükeambuh Eleazar tüsho boto limberübo ki arübah tha, 3“ Ataroth, Dibon, Jazer, Nimra, Heshbon, Eleale, Sebam, Nebo, tüsho Beon, 4lomibo Atungpuhnü Israel boto müngüh kukkhi; ha shiwüh akampung lo ah, tüsho nü yamlarübo akam-shiwühbo lah.” 5Jumonü arünü tha, “Nü mük ki isa muzhode ngüsho, ha lo nü yamlarübo kilim nihbuh kukruk thsüpü jihang, tüsho isa Jordan hode bebah düyü.”
6Tüsho Mosanü Gad le Reuben tsührübo ki tha, “Nüsa keoniorübo thirithsü ching yüchoki nüsa ha ching binba de? 7Kheakü tümüde nüsanü Israel mihtsürübo Atungpuhnü arü kilim jihkhi lomi ching yüpü mulong ninishihcho? 8Nüsa buhrübo inü alomi kheahshihpü Kadesh-barnea ching yüshihchoki hanangde arhimokheah. 9Tümüde küyimki arü Eshkol jindükhün ching wutubah alo ju angükhea, arünü Israel mihtsürübo mulong ninishih, junangde arünü Atungpuhnü ajihkhi lomi ching müyü. 10Jumonü Atungpuhnü ju nimung abukakhiuk tüsho thiyuchihchimde tha, 11‘ Tsükjide Ijip chingnü aturü, kam mukunü akumung shenü she inü Abraham, Isak, tüsho Jakob ki thiyuchihchimkhi lo müngü, tümütüsho arü mulong athrünkhinü I müyan. 12Kenizrü Jephunne tsührü Kaleb, tüsho Nun tsührü Jihusua anenü lang mulong athrünkhinü Atungpuh yu anido.’ 13Jumonü Atungpuhnü Israelrü kheak bukakhiuk, tüsho apinü arü sunglo ching Atungpuh miki amünean rhimorü lünbo muhokham khiungde kam yirü sunglo ching rümde tsahshih. 14Tüsho kheahang! Nüsanü nüsa buhrübo müthride, lün aso aneak mihtsürübonü Israelrü kheak Atungpuh buk alü akhiukshihpü lah. 15Tümüde nüsanü api dunglim müyande rholosho, kheaküshe apinü sunglo ching arü bahjihbah, tüsho nüsanü harü mihtsürü thsümünimjihbah.”
16Tüsho arünü api phünide arübah tha, “ Isanü ha ching akam-shiwühbo yam tüsho azürübo thsungkheak chipi ayünde kiuto thsanü, 17tüshe isa she tsungthsüh thsakhambahle arü lapung bekhiungde marüyi khiungde Israel mihtsürü lung keochihde ayübah; tüsho judüchoki isa tsührübo le aliberübo ha lomi mihtsürü kheaknü ajikkhukpü thsüde chipi ayünkhi kiutobo ching labah. 18Israel mihtsürübo mihbüm aban yamrüplurüp müngüyi khiungde isanü thüyam lim alode marü. 19Tümüde isanü Jordan thripkhüh lim tüsho ju hobah arü lung yamrüplurüp mulu, tümütüsho ha Jordan aniakhiuklim isa yamrüplurüp lah.”
20Mosanü arü ki tha, “Nüsanü ha rhimosho, tüsho tsungthsüh thsakhambah Atungpuh müngüh yüsho, 21tüsho keochihrü alala Jordan hode yübah Atungpuh müngüh api riri amikinü yankhita mübahyi khiungde, 22tüsho Atungpuh miki alo ju yankhisho, jushu nüsabo nihbuh yam lim alode arübah Atungpuh tüsho Israelrü miki alim thsübah; tüsho Atungpuh miki ha nüsa lapung lo thsübah. 23Tüshe nüsanü jude müthsüsho, mütsanang, nüsanü Atungpuh azhihde neak yihbeakdo; tüsho nüsa neaknü nüsa yimkhitbah de mütsanang. 24Nüsa tsührübo thsungkheak kiutobo tüsho namfimihnubo thsungkheak thüyam thsakhamang, tüsho nüsanü mün chingnü akhiukkhi nangde rhimoang.”
25Tüsho Gad le Reuben tsührübonü Mosa ki tha, “ Isa tungpuhnü thiyukhüm jihkhi yande isa nü yamlarübonü arhimobah. 26Isa tsührübo, niuberübo, mihnubo tüsho akam-shiwühbo alala Gilead kiutobo ching labah; 27tüshe nü yamlarü thirithsürübo a, isa tungpuhnü athakhi nangde Atungpuh müngüh thsühnuk hanbah keochihpü yübah.”
28Jumonü Mosanü arü thsungkheak amükeambuh Eleazar Nun tsührü Jihusua tüsho Israel mihtsürü trükbo ching guk kurungkheak azothsürübo ki thiyukhüm jih. 29Tüsho Mosanü arü ki tha, “ Gad tüsho Reuben tsührübonü nüsa lung Jordan hode, keochihrü Atungpuh miki yübahle nüsa müngüh alo yankhisho, nüsanü arü kilim arü lapung lo thsüshihpü Gilead lomi jihang. 30Tüshe arünü nüsa lung tsungthsüh thsübah hode müyüsho, nüsa lung Kanan ching arü lapung lo ngübah.”
31Tüsho Gad le Reuben tsührübonü tha, “Atungpuhnü nü yamlarübo ki thakhi nangde, isanü arhimobah. 32Isanü Atungpuh miki tsungthsüh thsakhambah Kanan lo ching yübah, tüshe yamrüplurüp a ha Jordan thrippeang labah.”
33Jumonü Mosanü Gad le Reuben tsührübo, tüsho Josep tsührü Manase trük chamkhüh kilim, Amor kiulongthsüpuh Sihon kiulongthsü, Bashan kiulongthsüpuh Og kiulongthsü, alo tüsho kiutobo, tüsho ju mühi lomi ching lakhi kiutobo jih. 34Tüsho Gad tsührübonü athsükhibo ju Dibon, Ataroth, Aroer, 35Atroth, Shophan, Jazer, Jogbeha, 36tüsho chipi ayünkhi kiutobo Beth, Nimra le Beth Haran, tüsho arü shiwüh akampung yam thsü. 37Tüsho Reuben tsührübonü athsükhi ju Heshbon, Eleale tüsho Kiriathaim, 38kheaküshe Nebo le Baal Meon (harü mungbo müthrikheah) tüsho Sibma tüsho arünü athsükhi kiutobo mung ji.
39Tüsho Manase tsührü Makir guknü Gilead ching yübah ju lu, tüsho ju ching larü Amorrü yankhitabah. 40Jumonü Mosanü Manase tsührü Makir guk kilim Gilead jih tüsho arü ju ching la. 41Kheaküshe Manase tsührü Jair nü kiuto aninibo lu tüsho jurü ki Havoth Jair de ji. 42Tüsho Nobanü yübahle Kenath tüsho kiulongbo lu, tüsho api mung yande Noba de ji.
Currently Selected:
WÜHKHE 32: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
