WÜHKHE 31
31
Midiarü kheak Royimkhi
1Tüsho Atungpuhnü Mosa ki tha, 2“ Israel mihtsürü thsungkheaknü Midiarü kheak royimang. Ju dunglim nü a nüsa mihtsürübo lung yübah.”
3Jumonü Mosanü mihtsürübo ki tha, “Nüsa khürü keochihpü thsungkheaknü tsungthsüh thsakhamang; tüsho arübo Atungpuh thsungkheaknü Midiarü kheak royimpü yüshang. 4Israel trük aban chingnü 1000 keochihpü yüshang.”
5Jumonü Israel trük aban chingnü 1000 mokhit, keochihrü alala thsürubah 12,000. 6Junangde Mosanü keochihpü arübo trük aban chingnü 1000 yüshih; apinü arübo amükeambuh Eleazar tsührü Phinehas yande, amüsüh kukrukbo tüsho akhah ching amütpü hulipungpung shuhbah yüshih. 7Tüsho Atungpuhnü Mosa ki thiyukhüm jihkhi nangde arünü Midiarü bede keochih, tüsho arünü athrürü alala laksahkham. 8Arünü alaksahkhi lungnü Midiarü kiulongthsürübo phüngü harü laksah: Evi, Rekem, Zur, Hur, tüsho Reba. Arünü Beor tsührü Balaam she nuknü laksah.
9Tüsho Israel mihtsürübonü Midiarü azoberübo arü tsührü aninibo bebah rama lu, tüsho arü lakhit thsümünimjihde moshi, mihnu tüsho kukruk alala lukhamjih. 10Arünü arü lapung kiutobo, tüsho chipibo she monü takabahjih. 11Tüsho arünü ayankhikhi tüsho athsümünimkhi mihtsürü tüsho shiwühbo lu. 12Tüsho arünü aramrü le kukruk lukhibo tüsho athsümünimkhibo Mosa tüsho amükeambuh Eleazar kilim lubah arü, tüsho Jirikho hobah Jordan ki Moab dükhün binkheampung ching larü Israel mihtsürü boto kilim lubah arü.
Bonungrübo Alodalungkhi
13Tüsho Mosa, amükeambuh Eleazar tüsho boto limberü alalanü binkheampung aleanglim arü mihleangpü wukhiuk. 14Tüshe Mosanü bonungrü atorübo, chithürübo tüsho chibo kurungkheak wühkenorübo keochih chingnü alunglorü kheak bukakhiuk. 15Tüshe Mosanü arü ki tha, “Nüsanü azoberü alala rhangdung lashihla de? 16Kheahang, arünü Balaam yu anibah Israel mihtsürübo Peor ching dünjichoki Atungpuh azhihde amülim rhimoshih, tüsho Atungpuh mihtsürü bolung arüm tukthsü lakheah. 17Jumonü azürü bolung athrürübo tüsho athrürü kheak nungrü aliberübo alala laksahang. 18Tüshe nüsabo thsungkheaknü atsangkhitkhi anünürübo rhangdung lashang. 19Tüsho nüsabo binkheampung aleanglim nimung thüne laang; nüsa mihtsürü laksahrübo, ashemi qiurübo tüsho nüsanü aramrübo asam ni le athüne nipü ching müsühkhitang. 20Khimmihbo, shihküpnü athsükhibo, mihnu namnü akeakkhi, tüsho sangnü athsükhi alala müsühkhitang.”
21Tüsho amükeambuh Eleazarnü keochih ching yürü mihtsürübo ki tha, “ Ha Atungpuhnü Mosa kilim thiyukhüm jihkhi yakzanbo: 22Suna, shotoyinchi, müwayinchi, yinchi, müyeyinchi, tüsho mülang yinchi, 23mo müyükihbebo ju monü thsahang, tüsho amüsüh labah; tütüshe ju amüsühkhitbe kenü müsühkhitang. Tahle mo yükihbebo a kenü müsühkhitang. 24Tüsho nüsanü khimmihbo athüne nipü müsühang tüsho müsühde kamang, tüsho jushu nüsa binkheampung ching arüpü kuklah.”
Ayankhikhi Kukrukbo Chamkhi
25 Atungpuhnü Mosa ki tha, 26Nü le amükeambuh Eleazar tüsho gukbo ching azothsürübonü, yankhia lubah arükhi mihtsürü tüsho shiwühbo khea kheahang; 27tüsho ayankhikhi ju shihcham mahne thsüde, keochih ching berü tüsho aningkhi boto chamjang. 28Keochih ching yürü bonungrübo kheaknü Atungpuh kilim ruk jihpü thsüde mihtsürü, moshi, donki, tüsho namfimihnubo chi phüngü aban chingnü khülang yihkhitang; 29ju lubahle Atungpuh kilim kingaün nangde amükeambuh Eleazar kilim jihang. 30Tüsho aningkhi Israel mihtsürübo kheaknü mihtsürü, moshi, donki, namfimihnu tüsho akam-shiwühbo thünim chingnü khülang yihkhitbah Atungpuh arüngyam neakrü Levirübo kilim jihang. 31Jumonü Mosa tüsho amükeambuh Eleazar anenü Atungpuhnü Mosa ki thiyukhüm jihkhi yande rhimo.
32Tüsho bonungrübonü keochih ching yankhikhi nihbuh lupü zokhi thsürubah namfimihnu 675,000, 33moshi 72,000, 34donki 61,000, 35tüsho atsangkhit anünürü 32,000. 36Keochih ching bonungrübo yo: namfimihnu 337,500, 37ju chingnü Atungpuh kilim ruk jihkhi 675; 38moshi 36,000, ju chingnü A TUN GPU H kilim ruk jihkhi 72, 39donki 30,500, ju chingnü Atungpuh kilim ruk jihkhi 61; 40mihtsürü 16,000, ju chingnü Atungpuh kilim ruk jihkhi 32, 41Atungpuhnü thiyukhüm jihkhi nangde Mosanü ruk ju Atungpuh shihcham thsüde amükeambuh Eleazar kilim jih.
42Tüsho keochih ching berü shihcham kheaknü Mosanü chamkhia Israelrübo kilim jihkhi– 43boto yo namfimihnu 337,500, 44moshi 36,000, 45donki 30,500, 46tüsho mihtsürü 16,000. 47Tüsho Israel mihtsürü shihcham mihtsürü le shiwühbo thünim chingnü khülang yihkhita Atungpuhnü thiyukhüm jihkhi nangde Mosanü Atungpuh arüngyam neakrü Levirü kilim jih.
48Tüsho chithürü kumung atorübo, chithürü kumung wühkenorü tüsho chi kumung wühkenorübo Mosa ki arü; 49tüsho arünü Mosa ki tha, “Nü yamlarübonü keochih ching berü isa yukhüm ching lakhi mihtsürü khea kheahdo, tüsho mihtsürü khülang lang she müdükheak. 50Jumonü isanü angükhi shoto kukrukbo: khu, bingkhüm, yingkhüm, nüpü, tüsho lakbo isa neak dünthsükhipü Atungpuh kilim handarüdo.” 51Jumonü Mosa tüsho amükeambuh Eleazar anenü suna tüsho züt akhambe kukrukbo arü kheaknü leangkhia lu. 52Tüsho chithürübo tüsho chibo kurungkheak wühkenorübonü Atungpuh kilim kingaün jihkhi suna ju khahngak 200 khüh lakheah. 53Keochih ching berü abannü nihbuh thsungkheak ayankhikhi kukrukbo lu. 54Tüsho Mosa le amükeambuh Eleazar anenü chithürü kumung wühkenorü tüsho chi kumung wühkenorübo kheaknü suna leangkhi, tüsho ju Israel mihtsürü thsungkheak lümkhitde alapü thsüde Atungpuh miki arüngyam ching handarü.
Currently Selected:
WÜHKHE 31: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
