WÜHKHE 30
30
Thiyuchihchimkhi Dünkheak Thiyuzüngbo
1Mosanü Israel mihtsürü trükbo kurungkheak azothsürübo dünkheaknü tha, Ha Atungpuhnü thiyukhüm jihkhi ah: 2Mihtsürü khülangnü Atungpuh ki thiyuchihchimsho, yungsho tangzüngachihde thiyuchihchimsho, apinü nihbuh yu müthsümünim; apinü amün chingnü athakhi yande lüpdükhi rhimobeah.
3Küyimki aliberü khülangnü Atungpuh ki thiyuchihchimbanü, tüsho anihbe anünü kim ching abuh yam ching lade tangzüngachihkhinü rhüka lasho, 4tüsho anihbenü thiyuchihchimde tangzüngachihkhi abuhnü sobahle tümü müthasho anihbenü thiyuchihchimkhi nangde alala rhimobah. 5Tüshe abuhnü ju sobah yanlosho anihbenü thiyuchihchimde tangzüngkhibo mürhimo; tüsho Atungpuhnü anihbe neak bahjihbah, tümütüsho abuhnü anihbe mümülüjih.
6Tüsho anihbenü thiyuchihchimkhi yungsho münnü tangzüngachihkhinü rhüka lakhi kim ching, niubuhrü khülang yam ching rhangsho, 7tüsho aniubuhnü ju sobahle tümü müthasho, anihbenü thiyuchihchimkhi yungsho tangzüngachihkhi nangde arhimobah. 8Tüshe aniubuhnü ju sobahle mümülüsho, anihbenü thiyuchihchimde tangzüngachihkhi ju mürhimo tüsho Atungpuhnü anihbe neak bahjihbah.
9Tüshe khimoberü yungsho bah-a tsoshihkhi liberü khülangnü thiyuchihchimsho junü anihbe rhüka labah.
10Aliberü khülang aniubuh yam ching lachoki thiyuchihchimde tangzüngachihkhinü rhüka lasho, 11tüsho aniubuhnü ju sobah mümülüde tümü müthasho, anihbenü thiyuchihchimkhi tüsho tangzüngachihkhibo alala rhimobah. 12Tüshe aniubuhnü jurü sobah yanlosho anihbenü amün chingnü thiyuchihchimkhi tüsho tangzüngachihkhibo mürhimo. Aniubuhnü jurü akeangkeang kamshihdo, tüsho Atungpuhnü anihbe neak bahjihbah. 13Nihbe thsünüpü thsüde alibenü thiyuchihchimsho yungsho tangzüngachih-a lasho, aniubuhnü ju thsülangpü yungsho akeangkeang kamshihpü kuklah. 14Tüshe aniubuhnü sobah ju dünkheak nimung aban tümü müthasho, anihbenü thiyuchihchimkhi yungsho zangrü rhüklode tangzüngachihkhi mulongjihdo; apinü jurü leangkhido, tümütüsho apinü ju sobah anihbe kheak tümü mütha. 15Tüshe apinü jurü sobahle akeangkeang kamshihsho, apinü anihbe neak hanbah.
16Harü ha aniubuh le aniube dünkheak tüsho abuh le atsührübe abuh yam ching anünü kim thsungkheak Atungpuhnü Mosa kilim thiyukhüm jihkhi yakzanbo lah.
Currently Selected:
WÜHKHE 30: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
