WÜHKHE 28
28
Nimung Aban Kingaünbo
(Abe 29.38-46)
1 Atungpuhnü Mosa ki tha, 2Israel mihtsürübo kilim thiyukhüm jihang, tüsho arü ki thaang, I ki kingaünbe, I tsühyungbe monü taka kingaünde I kilim arhümthüneabebo akhukhitkhi kim ching kingaünpü nüsanü kümkangang.
3Tüsho nünü arü ki thaang, Ha nüsanü Atungpuh kilim taka kingaünbeah: lapha mükihkhi namfimihnunu pung 2 kam khülang bankhi mutukzhakde taka kingaünang. 4Namfimihnunu 1 nüsanü yapsu kingaünang, püpü ju arelim kingaün jihang. 5Ju lung ayikangkang khahngak 1 ching oliv müdangke pungdüchi 1 yukbah hi kingaün jihang. 6Ha mutukzhakde Atungpuh kilim arhümthüneashihde monü taka kingaünpü Sinai Müzüng ching arüngde müsühkhitkhi lah. 7Tüsho namfimihnunu abande ayungbe kingaün nangde kingaün sadam kheak ayungbe pungdüchi 1 dungkihang. 8Namfimihnunu püpü ju nüsanü arelim jihang; ju nüsanü yapsu thsakhamkhi hi kingaün tüsho ayungbe kingaünbo lung jihang. Ha monü taka kingaünde Atungpuh kilim arhümthüneashihkhi lah.
Amuni Kingaün
9Tüsho amunimung kam khülang bankhi namfimihnunu lapha mükihkhi 2 tüsho ayikangkang khahngak 2 ching oliv müdangke yukbah hi kingaün tüsho ayungbe kingaün jihang. 10Ha mutukzhakde kingaünkhi tüsho ayungbe kingaün lung yukrude amunimung aban taka kingaünpü lah.
Khinu Aban Kingaün
11Khinu aban akhuhbe nimung nüsanü Atungpuh kilim harü taka kingaünang: moshipung nunu 2, mihnupung 1, tüsho kam khülang bankhi lapha mükihkhi namfimihnunu 7; 12moshipung abande hi kingaün nangde ajihpü ayikangkang khahngak 3 ching oliv müdangke yukkhi; mihnupung 1 thsungkheak khahngak 2; 13tüsho namfimihnunu aban khahngak 1 Atungpuh kilim arhümthüneade taka kingaün jihang. 14Dükde ayungbe kingaünpü ju moshipung abande ayungbe pungdüchi 2, mihnupung thsungkheak pungdüchi 1 kheak phukrüpkhüh, tüsho namfimihnunu abande pungdüchi 1. Ha taka kingaünpü ju kam amuyung khinu abande alabah. 15Tüsho neak kingaünpü thsüde, mutukzhakde taka kingaünkhi tüsho ayungbe kingaün lung yukrude neak kingaün thsungkheak mihnupung khülang Atungpuh kilim jihang.
Phungho-thünio
(Lev 23.5-14)
16Akhuhbe khinu nimung thürükheak phüyi nipü ju Atungpuh phungho-thünio ah. 17Tüsho ha khinu nimung thürükheak phüngü ni ju thünio tankihbah; nimung thüne phaüm muyukkhi yikhap tsühbah. 18Atan nimung ju nüsanü amüsüh amukhung labah, tüsho nüsanü rhimo achak tümü mürhimo. 19Tüsho nüsanü Atungpuh kilim monü taka kingaünkhi harü jihang: moshipung nunu 2, namfimihnupung 2 tüsho kam khülang bankhi namfimihnunu 7; jurübo ju lapha mükihkhi thsübeah. 20Nüsanü ayikangkang lung oliv müdangke yukbah hi kingaün jihpü ju: moshipung 1 thsungkheak khahngak 3, namfimihnupung thsungkheak khahngak 2; 21nüsanü namfimihnunu 7 abande khahngak 1 jihang; 22tüsho nüsa neak dünthsükhipü mihnupung khülang neak kingaün jihang. 23Harübo mutukzhakde taka kingaünkhi lungnü jihang. 24Hanangde nüsanü tsühyungpü, nimung thüne taka kingaünde Atungpuh kilim arhümthüneashang; ha taka kingaünkhi tüsho ayungbe kingaün mutukzhakde ajihkhi lungnü kingaünang. 25Tüsho nimung thüne nipü nüsanü amüsüh mukhung laang, tüsho rhimo achak tümü dürhimo.
Yimlukhi Thünio Kingaün
(Lev 23.15-22)
26Tüsho amunibo thünio kim ching sangsolungsobo akhuh yimlu nimung, küyimki nüsanü hiso kingaün Atungpuh kilim jihbanü, nüsanü amüsüh amukhung laang, tüsho rhimo achak tümü she dürhimo. 27Nüsanü Atungpuh kilim taka kingaünde arhümthüneashihpü ju moshipung nunu 2, namfimihnupung 1, tüsho kam khülang bankhi namfimihnunu 7; 28jurü lung ayikangkang ching oliv müdangke yukbah hi kingaün jihpü ju: moshipung abande khahngak 3, namfimihnupung 1 thsungkheak khahngak 2, 29tüsho namfimihnunu 7 abande khahngak 1; 30tüsho nüsa neak dünthsükhipü mihnupung 1. 31Nüsanü harübo nimung abande taka kingaünkhi tüsho hi kingaün jihkhi lung ajakde ayungbe kingaün lungnü jihang. Shiwühbo ju lapha mükihkhi thsübeah.
Currently Selected:
WÜHKHE 28: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
