WÜHKHE 27
27
Zelophehad Tsührü Aliberübo
1Judüki Josep tsührü Manase yamkhün chingnü api tsührü Makir kheak yo Gilead tsührü Hepher tüsho api tsührü Zelophehad kheak yo aliberübo mikhuhlim arü; tüsho api tsührübo mung: Mahla, Noa, Hogla, Milka, tüsho Tirza. 2Tüsho arünü arüngyam ripit ki Mosa le amükeambuh Eleazar, tüsho limberü le boto alala miki zhipbahle tha, 3“ Isa abuh sunglo ching sheabahdo; tüshe apinü Kora borü lung arihde Atungpuh mazhih, tahle nihbuh neak chingnü api shedo; tüsho api tsührü athrürü müla. 4Api tsührü athrürü mülale de, isa abuh mung nihbuh guk chingnü yihkhita bahpü? Jumonü isa abuh keoniorü lung isa kilim she yamrüplurüp jihang.”
5Jumonü Mosanü arü dünkheak Atungpuh miki lubah arü, 6tüsho Atungpuhnü Mosa ki tha, 7“Zelophehad tsührübebonü küpü thachonü dükdü ah; atsütsü nünü arü kilim arü abuh keoniorü lung yamrüplurüp jihang; tüsho arü abuh yamrüplurüp ju arü kheak yüshang. 8Tüsho nünü Israel mihtsürübo ki thaang, ‘ Mihtsürü khülang sheabahshu tsührü athrürü mülasho, nüsanü api yamrüplurüp anihbuh tsührübe kilim jihang. 9Api tsührü aliberü mülasho, nüsanü api yamrüplurüp ju anihbuh keoniorü kilim jihang. 10Api keoniorü mülasho nüsanü api yamrüplurüp ju anihbuh abuh keoniorü kilim jihang. 11Tüsho anihbuh abuh keoniorü mülasho, nüsanü api yamrüplurüp ju api thüninde alarü buhtsührü khürü kilim jihang, tüsho apinü ju lubah. Tüsho Atungpuhnü Mosa ki thiyukhüm jihkhi nangde Israelrü mihtsürü thsungkheaknü yakzan thsükhi thiyuzüngbo labah.’ ”
Mosa Müthri Jihusua Mokhitkhi
(Yuzüng 31.1-8)
12 Atungpuhnü Mosa ki tha, “ Abarim wung ching wutuang, tüsho inü Israelrübo kilim jihkhi lo kheahang. 13Tüsho küyimki nünü ju ngübanü, nü khiung Aron nangde nü she nihbuh mihtsürü lung yübah. 14Tümüde Zin sunglo kebo ching botonü azhihde wusuchoki, nüke chidonü arü mük ki I yukhüm amüsüh de ahuhpü I yu mani.” (Meriba ju Zin sunglo ching Kadesh Kenü ah.)
15Tüsho Mosanü Atungpuh ki tha, 16“Atungpuh , mihtsürü mebo kurungkheak Thrünpuhnü, boto kurungkheak mihtsürü khülang thiyia, 17arü müngüh wukhiukla azahla de, tüsho bekhitla beyukla de thsüshang; junangde Atungpuh mihtsürübo ju namfimihnu aneakrü mülakhi nangde mülabah.”
18Tüsho Atungpuhnü Mosa ki tha, “Nun tsührü Jihusua, me lakhi mihtsürü nünü bedarübah nü khah api kheak nimang; 19api amükeambuh Eleazar tüsho boto miki zhipshihbah, arü mük kinü rhimo nimkihjang. 20Tüsho Israelrü mihtsürü boto alalanü api yu anipü thsüde nünü api kheak nü yukhüm khürü jihang. 21Api amükeambuh Eleazar miki zhipbah anihbuh thsungkheak Urim mahkhapkhi yande Atungpuh ki keokhishihbah; Eleazar yukhüm hode api tüsho Israel mihtsürü boto wukhiukbah tüsho azahbah.” 22Jumonü Atungpuhnü athakhi nangde Mosanü rhimo. Apinü Jihusua bebahle amükeambuh Eleazar tüsho boto alala miki zhipshih. 23Tüsho Atungpuhnü thiyukhüm jihkhi nangde Mosanü Jihusua ku kheak akhah nimbah rhimo jih.
Currently Selected:
WÜHKHE 27: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
