WÜHKHE 15
15
Kingaün Yakzanbo
1 Atungpuhnü Mosa ki tha, 2Israelrü mihtsürübo ki thaang, küyimki inü ajihkhi lo ching lapü nüsa arübanü; 3tüsho nüsanü Atungpuh kilim taka kingaünkhi yungsho shuhmülanga kingaünkhinü thiyuchihchim yungsho amulongkhi kingaün yungsho akhukhitkhi thünio dünjishihde, moshi yungsho mihnu bolungnü Atungpuh kilim arhümthüneade ajihpü thsüsho, 4shepünü Atungpuh kilim kingaün jihbanü apinü ayikangkang khahngak 1 ching oliv müdangke pungdüchi 1 yukbah hi kingaün jihbeah; 5tüsho yukhu pungdüchi 1 ju nünü taka kingaünkhi yungsho shuhmülanga kingaünkhi lung yukbah, namfimihnunu abande thsakhamang. 6Yungsho mihnupung 1 jihsho ayikangkang khahngak 2 oliv müdangke pungdüchi 1 kheak niukshakkhüh yukbah hi kingaün jihang; 7tüsho ayungbe kingaün ching nünü yukhu pungdüchi 1 kheak niukshakkhüh yukbah Atungpuh kilim arhümthüneade jihang. 8Tüsho nünü taka kingaünpü yungsho thiyuchihchimkhi dünkheak shuhmülanga kingaünkhi yungsho Atungpuh kilim mungtsü kingaünpü moshipung nunu lusho, 9moshipung nunu lung ju ayikangkang khahngak 3 ching oliv müdangke pungdüchi 2 yukbah ajihbeah; 10tüsho ayungbe kingaün ching yukhu pungdüchi 2 monü taka kingaünde Atungpuh kilim arhümthüneashang.
11Hanangde moshipung nunu, mihnupung, yungsho namfimihnunu yungsho mihnu nunu abande arhimobeah. 12Nünü ajihkhi khekhi yande nünü ju abande thsakhamang. 13Nihbuh lapung chingnü azüberü abannü ha yande taka kingaün jihkhi hode Atungpuh kilim arhümthüneashang. 14Tüsho khiungkerü khürü nüsa lung larü yungsho nüsa lung lünnü alarünü taka kingaün jihde Atungpuh kilim arhümthüneashihpü thsüsho, nüsanü arhimokhi ruk apinü she arhimobah. 15Nüsa le nüsa lung larü khiungkerübo thsungkheaknü lün thsungkheak yakzan khülang labah; nüsa künangde la, junangde khiungkerü she Atungpuh miki rukhüh labah. 16Yakzan khülang tüsho thiyuzüng khülang nüsa le nüsa lung larü khiungkerü thsungkheak rukhüh labah.
17Tüsho Atungpuhnü Mosa ki tha, 18Israelrü mihtsürübo ki thaang, Inü bede ayükhi lo ching küyimki nüsa yüzahbanü, 19nüsanü alo chingnü akhiukkhi yikhap tsühchoki, Atungpuh kilim arung kingaün jihbeah. 20Nüsanü hi akhuh chukhi chingnü yikhap jihang tüsho ju rhimopung ching yo kingaün jihkhi nangde jihang. 21Nüsanü akhuh nungkhi yikhap Atungpuh kilim lünnü kingaün jihang.
Müreanglim Neak Yakzanbo
22Tüshe nüsanü müreanglimnü Atungpuhnü Mosa ki thakhi yukhümbo khürü manide lakmihsho– 23Atungpuhnü Mosa hode nüsa kilim jihkhi thiyukhüm alala, Atungpuhnü thiyukhüm jihkhi nimungnü tüsho nüsa arübe lün khiungde, 24tüsho ju botonü mümükheahde yihbeaka lasho, boto alalanü moshipung nunu 1 taka kingaün jihde, Atungpuh kilim arhümthüneashihbah, juju yakzan yande hi kingaün tüsho ayungbe kingaün tüsho neak kingaün thsungkheak mihnupung 1 jurü bolungnü ajihbeah. 25Jumonü amükeambuhnü Israelrü tsührü boto dünthsükhide neak bahjihbah tümüde ju müreanglimnü yihbeak; arübonü taka kingaünkhi tüsho müreanglimnü ayihbeakkhi neak kingaün Atungpuh miki handarübah. 26Israel mihtsürü boto alala tüsho arü bolung lakhi khiungkerü alala kilim neak bahjihbah, tümütüsho mihtsürü athrünkhinü müreanglimnü rhimodo.
27Tüsho mihtsürü khülangnü müreanglimnü neak yihbeaksho, apinü mihnu dre kam khülang bankhi neak kingaün jihbah. 28Jumonü küyimki mihtsürü khülangnü Atungpuh miki müreanglimnü neak yihbeakbanü api müsühkhitde amükeambuhnü dünthsükhibah; tüsho api neak bahjihbah. 29Nihbuh lo ching Israel mihtsürü lung zübekhi thsüala tüsho arü bolung lakhi khiungkerü thsüala, müreanglimnü ayihbeakkhi neak dünkheak yakzan khülang lang alabah.
Khekhung Neak Yakzan
30Tüshe mihtsürü shepünü mede neak yihbeakbanü, nihbuh lo ching züberü yungsho khiungkerü thsüthsü, shepü Atungpuh miki amülim handarübanü, api nihbuh mihtsürü bolungnü khekhita bahbah. 31Tümütüsho apinü Atungpuh yu bahyukdo, tüsho api yukhüm thsümünim, ju buh mihtsürü ju tsükjide khekhita bahbah; anihbuh neak api kheak labah.
Amunimung Thsümünimkhi
32Kheakü Israelrübo sunglo ching lachoki, arünü mihtsürü khülang amunimung sang yihde ngü. 33Tüsho api sang yihde angürübonü api ju Mosa le Aron tüsho boto kilim bebah arü. 34Arünü api rihyam ching zo, tümütüsho api dünkheaknü tümü rhimobeanü müthayide alakheah. 35Tüsho Atungpuhnü Mosa ki tha, “ Mihtsürü ju tsükjide asheshihbeah; boto alalanü api binkheampung aleanglimnü rusahabah.” 36Jumonü Atungpuhnü Mosa ki thiyukhüm jihkhi nangde, boto alalanü api binkheampung aleanglim bede wukhiuk tüsho lungnü rusahabah.
37Kheaküshe Atungpuhnü Mosa ki tha, 38“ Israelrü mihtsürübo ki thaang, Arü tsührü-tsührü lün ching khim münkheam kheak amüngam müchepü thaang, tüsho amünkheam lim amüchekhi ching biyi hing yukshang. 39Tüsho nüsa kheak hingmüngam müchekhi ju alabah, tüsho ju kheak kheahbahle Atungpuh yukhümbo lümkhitbah, tüsho jurübo rhimobah, tüsho jude athsükhinü nüsa mulong tüsho nüsa müknü abekhi lim müzammüramde nüsanü müyü, 40tüsho I yukhümbo lümkhitde arhimobah, tüsho nüsa Thrünpuh kilim müsühde alabah, 41I Atungpuh nüsa Thrünpuhnü, nüsa Thrünpuh thsüpü nüsa Ijip lo chingnü bekhit; I Atungpuh nüsa Thrünpuh.”
Currently Selected:
WÜHKHE 15: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
