WÜHKHE 16
16
Mosa tüsho Aron kheak Azhihkhi
1Kheakü Levirü tsührü Kohath kheaknü atrükkhitkhi Izhar tsührü Kora, ju lung Eliab tsührübo Dathan tüsho Abiram tüsho Reuben kheak yo, Peleth tsührü On, arünü mihtsürübo bea lu; 2tüsho arünü Israel mihtsürü boto chingnü mokhitkhi mungkhung limberübo 250 bebah Mosa azhihde wusu. 3Arübo rukhühnü Mosa tüsho Aron azhihde mukhungbahle ane ki tha, “Nüke khide münchi hodo, tümüde Israelrü boto alala ching mihbüm abande amüsüh lah, tüsho Atungpuh arü lung lah, dale küde thsah Atungpuh borü kurungkheak nüke zangrü shuhkihcho?”
4Küyimki Mosanü ju sokhea, apinü amiro zhinabah; 5tüsho apinü Kora tüsho ajingyanrübo ki tha, “Shido yapsu Atungpuhnü sherü api yo a tüsho shepü amüsühanü ahuhbah, tüsho ju buh mihtsürü api phünide ayülishihbah; junangde shepü apinü amokhitbanü api phünide ayüshihbah. 6Hade thsang: Kora tüsho nü jingyanrü alalanü mophuru shuhang; 7shido Atungpuh miki jurü ching mo tüsho rhümthüneabe yukang, tüsho mihtsürü shepü Atungpuhnü mokhitbanü amüsühbuh labah. Nüsa Levirübo khide münchi hodo!”
8Tüsho Mosanü Kora ki tha, “Nü Levi tsührü, kheakü aniang: 9Nüsa Israelrü Thrünpuh hode Israel boto chingnü chamkhita Atungpuh arüngyam ching rhimopü api miki yüpü, tüsho boto tankihshihpü thsüde arü miki zhipshihpü thsükhi nüsanü khide ninilah de lümcho de? 10Tüsho apinü nü tüsho nü keoniorü Levirübo api phünide bedarüdo, tüshe kheakü nünü amükeamrü shihcham she yimchoh! 11Jumonü nü tüsho nü jingyanrü alala thsürubah Atungpuh azhihchoh, tüsho Aron ju tümü ah de nüsanü api azhihde dapdapcho?”
12Tüsho Mosanü Eliab tsührübo Dathan le Abiram büne jipü thiyi, tüshe anenü tha, “ Ike matu! 13Niuhke tüsho mukhuke bukde alakhi Ijip lo chingnü isa bekhitbah sunglo ching laksahpü thsükhi, tüsho nünü isa kurungkheak atungrü thsükhi ha anikhüh ah de lümchoshi? 14Kheaküshe nünü isa niuhke tüsho mukhuke bukpung lo ching bede marü, yungsho thulu le kurungasolu yamrüplurüp isa kilim müjih. Nünü harü mihtsürü mükji khünkhita bahjihpü? Isa matu!”
15Tüsho Mosanü bukakhiukde Atungpuh ki tha, “ Arübonü kingaünkhi düleangkhi: Inü arü yo donki khülang lang she mulu, yungsho arü shepü kheak she amütsü mürhimo.”
16Tüsho Mosanü Kora ki tha, “Shido, nü tüsho nü jingyanrübo alala tüsho Aron she de Atungpuh miki arang. 17Nüsa mihbüm abande mophuru lubah ju ching arhümthüneabe yukang tüsho mophuru 250 ju nüsa abande Atungpuh miki lubah arang, nü tüsho Aron she nihbuh mophuru abande shuhang.” 18Jumonü mihtsürü abannü nihbuh mophuru ching mo yukbah ju kheak arhümthüneabe yihkih, tüsho Mosa le Aron ane lung arüngkhimyam ripit ki zhip. 19Tüsho Koranü arü azhihde alala arüngkhimyam ripit ki bemukhung, tüsho Atungpuh müretahkhi boto alala ki akhiuka huh. 20Tüsho Atungpuhnü Mosa le Aron ki tha, 21“Nüke boto chingnü atrütang, tüsho inü arübo khülangkiyu thsüde akheamshihbah.”
22Tüsho anenü mi zhinbahle tha, “O Thrünpuh mihtsürü me alala Thrünpuh, mihtsürü khülang neak dün, boto alala kheak nü bukakhiukba de?”
23Jumonü Atungpuhnü Mosa ki tha, 24“Kora, Dathan tüsho Abiram arüsam kinü akhinang de boto ki thaang.”
25Mosanü asürübahle Dathan, Abiram tüsho api jingyanrü Israelrü azothsürübo kilim yü. 26Tüsho apinü boto ki tha, “Kheakü khimyam ching lakhi harü amütsü mihtsürübo kheaknü akhinang! Arü yo tümü she düqiu, jude yungsho arü neakbo dünkheaknü nüsa kheamkhambah.” 27Jumonü arübo Kora, Dathan tüsho Abiram arüsam yam kinü tsoakhinabah; tüsho Dathan le Abiram anenü akhiukbahle ane niuberü, ane tsührü athrürü tüsho tsührü aninibo bebah arü khimyam ripit ki zhip.
28Tüsho Mosanü tha, “ Ha hode harübo rhimoshihpü Atungpuhnü thiyikheah de nüsanü amükheahbah, tümüde jurübo inü amulongkhi chingnü rhimochoh yung. 29Harü mihtsürübo ha tukthsünü shesho tüsho püpüki mihtsürü kheak dünjikhi ruk lang thsüsho, Atungpuhnü I müthiyikheah. 30Tüshe Atungpuhnü tümükhüh aso-thsüde rhimosho tüsho alonü mün kabahle arübo le kukrukbo muyusho tüsho arübo arhangnü alokhün ching yüzahsho, harü mihtsürübonü Atungpuh bahyuka lah de nüsanü amükheahbah.”
31Tüsho apinü harü yu thakhamshu arü bukkhüp alo azüabah, 32tüsho alonü amün kabahle arü lung betsührübo, Kora lung mihtsürü alala tüsho arü kukrukbo muyuabah. 33Jumonü arü le arü lung lakhi mihtsürübo arhangnü alo khün ching yüzahbah; alonü arü hüpdoabah, tüsho arübo boto bolungnü dükheakabah; 34tüsho arü mühide alarü Israelrü alala zhide alihyukbah tso, tümüde arünü tha, “ Alonü isa she muyubah mütsüle!”
35Tüsho Atungpuh kilimnü mo akhiukbahle arhümthüneabe jihrü mihtsürü 250 ju taksahabah.
Mophurubo
36Tüsho Atungpuhnü Mosa ki tha, 37“ Amükeambuh Aron tsührü, Eleazar ki mo chingnü phurubo ju thrükhitang de thaang, tümüde jurübo amüsüh ah, tüsho mo ju limshude hiumüzüta bahang. 38Arü me azhihde neak yihbeakrü yo mophuru ju kingaün sadam lüpdopü thsüde phurubeak kamde yümnakshang, tümütüsho arübonü ju Atungpuh miki jihmonü amüsüh kamdo; tüsho jurübo Israelrü thsungkheaknü amütsan thsübah.” 39Jumonü Eleazar amükeambuhnü taksahabahrübonü ajihkhi müwayinchi mophurubo lu tüsho kingaün sadam lüpdopü thsüde kingbeak, 40tüsho ju Israel tsührübo thsungkheaknü mümih-mütsan thsü, junangde api ki Atungpuhnü Mosa hode alokhikhi nangde Aron tsührübo khah hobah püpürü shenü she Atungpuh miki arhümthüneabe jihpü marü, jude yungsho api ju Kora tüsho api jingyanrübo ruk kambah.
Aronnü Mihtsürübo Khümkhit
41Ashidopü Israel mihtsürü boto alalanü Mosa tüsho Aron azhihde tha, “Nüsanü Atungpuh mihtsürü laksahdo.” 42Tüsho küyimki botonü Mosa tüsho Aron azhihde mukhungkhea, anenü arüngkhimyam lim abin; zukleangnü amonü ju liudoabah, tüsho Atungpuh müretahkhi akhiuk. 43Judüki Mosa le Aron ane arüngkhimyam ki arü. 44Tüsho Atungpuhnü Mosa ki tha, 45“ Harü boto chingnü tsoakhinang, tüsho inü arübo khülangkiyu thsüde akheamshihbah,” tüsho ane miro zhinabah. 46Jumonü Mosanü Aron ki tha, “ Mophuru khülang kingaün sadam kheaknü lubah ju ching mo tüsho arhümthüneabe yukang tüsho ju nahde lubahle boto kilim yübah arü thsungkheak dünthsükhiang; tümüde bukakhiukkhi Atungpuh kheaknü wukhiukdo. Arüm tankihabahdo.” 47Mosanü athakhi nangde Aronnü ju lubahle boto phulung yü; tüsho arüm ju boto ching tankih-a lakheah. Jumonü apinü mokhih kheak arhümthüneabe yukbahle mihtsürübo thsungkheak dünthsü, 48tüsho apinü asherü le arhang larü dükeak zhip; jumonü arüm ju tukloabah. 49Kheakü Kora lung sherü mükhede, arümnü ashekhi 14,700 lakheah. 50Jumonü Aronnü Mosa kilim ashorupung khimyam ripit ki alode yü, tümüde arüm ju tukloa lakheah.
Currently Selected:
WÜHKHE 16: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
