WÜHKHE 14
14
Israelrünü Reanglokhi
1Judüki boto alalanü düsheak achangnü zhi; tüsho mihtsürübo ju re trip. 2Tüsho Israelrü alalanü Mosa le Aron azhihde dapdapneangneang; boto alalanü ane ki tha, “ Isabo Ijip lo chingnü pü sheabahkhülaa! Yungsho isa ha sunglo chingnü sheabahkhülaa! 3Tümüde Atungpuhnü isa ha lo ching nukshangnü asheshihpü bede yücho le? Isa niuberü tüsho isa tsührübo laksahkhambah; isa Ijip lim alode ayükhipü atsübe thsüba shi?” 4Jumonü arünü khülangnü khülang kheak thaachih, “ Isanü wühkenorü mokhitanü, tüsho Ijip lim alode yüanü.”
5Mosa le Aron anenü Israelrü amukhungrü boto miki mükhüm. 6Tüsho Nun tsührü Jihusua tüsho Jephunne tsührü Kaleb, lomi zütakheah lung benenü khimmih thorüp, 7tüsho Israel mihtsürü boto ki tha, “ Isanü züta kheahde hode ayükhi lo ju khide tsüdaklah. 8Atungpuhnü isa kheak asühsho, apinü isa ha lomi ching bede ayübah tüsho niuhke le mukhuke bukde alakhi lomi ju isa kilim jihbah. 9Atungpuh azhihdü lang duwusu; tüsho lomi ching larü mihtsürü dütre, tümüde arübo isa thsungkheaknü yikhap ah; arü tsungdojihbuh Thrünpuh arü kheaknü akhinabahdo, tüsho Atungpuh isa lung lah; arübo dütre.” 10Tüshe boto alalanü ane rusahabahpü asukachih, judüki Atungpuh müretahkhi ashorupung khimyam ching Israelrü mihtsürü alala miki akhiuka huh.
Mosanü Mihtsürübo thsungkheak Tamkhüntamnü
11Tüsho Atungpuhnü Mosa ki tha, “ Harü mihtsürübonü külokhüh I bahyukba? Tüsho inü arü bolung khinthiyinbe huhhuh she, arünü külokhüh I kheak mükinba? 12Inü arü ashebe tukthsünü ashikbah tüsho arü yamrüplurüp mulushih, tüshe inü nü arü kheaknü trük ato tüsho amürangbe kamshihbah.”
13Tüshe Mosanü Atungpuh ki tha, “ Judüasho Ijiprübonü ha dünkheak sobah, tümüde nü sühmüh hode harü mihtsürü arü bolungnü bede atu, 14tüsho arübonü ha dünkheak ju lomi ching larübo ki thabah. O Atungpuh , nü ha mihtsürübo lung lah de arünü so, Atungpuh , nü mironü miro ngü tüsho nü yo amo arü kumung zhip; tüsho animung amo dungto chingnü tüsho are mo dungto chingnü arü mikhuh nü yüchoh. 15Kheakü nünü harü mihtsürü khülangkinü laksahsho, nü dünkheak sorü trükshihbonü athabah, 16‘ Tümütüsho Atungpuhnü harü mihtsürübo apinü ajihpü alokhikhi lo ching bebah marükhuk, jumonü apinü arübo sunglo ching laksah-a lah.’ 17Jumonü kheakü inü mushuchoh, nünü asukkhi yande, Atungpuh wu huhang: 18‘Atungpuhnü bukakhiukpü müniokheamchoh tüsho mihmüthsüm ching suhdahlah, neak tüsho azhihde-wusukhi bahjihchoh; tüshe apinü arü bebuhrü neak dünkheaknü tsührübo tüsho tsührü-tsührübo kheak lün mahsam tüsho lün phüyi khiungde mülakphahde athsümüchihbah.’ 19Nü mihmüthsüm tokhi tüsho Ijip chingnü kheakü khiungde harü mihtsürü neak bahjihkhi nangde, harü mihtsürü neak bahjang de inü tamkhüntamnüchoh.”
20Tüsho Atungpuhnü tha, “Nü yu yande, inü neak bahjihdo; 21tüshe tsükjide I lale, alomi athrünkhi I müretahkhinü amibah– 22tümütüsho Ijip sunglo ching I müretahkhi, tüsho inü khinthiyinbe rhimokhi ngürü mihtsürü alalanü kheakü I ki thürü ki rükakido, tüsho I yu mani, 23inü arü bebuhrü ki thiyuchihchimkhibo tsükjide arünü müngü, yungsho I bahyukrü shenü she ju müngü. 24Tüshe I yamlarü Kaleb kheak me büthsüde alakhi hode mulong jihde I yan, api yükhi lo lim inü api bedarübah tüsho atsührü-tsührübonü ju yamrüplurüp lubah. 25Kheakü Amalekrü tüsho Kananrü jindükhün ching lachoh, shido rholoang tüsho Amürüm Keto limro yande sunglo lim tsahmusuang.”
Atsanglorü Thsümüchikhi
26Tüsho Atungpuhnü Mosa tüsho Aron ki tha, 27“ I azhihde dapdapneangneangkhi amütsü boto kheak inü külokhüh arümpü? Israelrü tsührübonü I azhihde dapdapneangneangkhi inü sodo. 28Arübo ki thaang, Atungpuhnü tha, Tsükjide I lale, inü sode nüsanü tümü thakheanü inü nüsa ki rhimobah: 29nüsa kam mukunü akumung wühkhe lurü, I azhihde dapdapneangneangrü ashemibo sunglo ching keambah. 30Jephunne tsührü Kaleb tüsho Nun tsührü Jihusua ane kheak hode, nüsa sheshe inü alokhikhi lo ching müyüzah. 31Tüshe thsümütsü ngübah de nüsanü athakhi nüsa tsührübo a, nüsanü abahyukkhi lomi ching inü bede yüzahbah tüsho arünü ju lomi mükheahbah. 32Tüshe nüsa ha sunglo ching shekhambah. 33Tüsho nüsa tsührübo sunglo ching kam yirü rümde atsahbah, tüsho nüsa ashemi sunglo chingnü mükheam khiungde nüsanü thiyuro mülakhi dünkheak thsünübah. 34Nüsanü lomi zütakheahkhi nimung yirü yande nimung khülang dün kam khülang ju kam yirü, nüsa münean hanbah, tüsho inü abahyukkhi nüsanü amükheahbah. 35I Atungpuhnü ha thado; ha amütsü boto I azhihde amukhungrü kheak dükde inü arhimobah. Ha sunglo ching arübo akheam thsübah, tüsho ju ching arü shebah.”
36Tüsho Mosanü lomi züta kheahpü thiyikhi mihtsürübo, sherübonü alodarübah lomi yusheak akeangyu jihde boto alala api azhihde dapdapshihkhea, 37lomi chingnü amütsü yusheak hanbah arürü mihtsürübo, arümnü Atungpuh miki sheabah. 38Tüshe Nun tsührü Jihusua tüsho Jephunne tsührü Kaleb anea lomi züta kheahpü yürü mihtsürü bolungnü aninga arhang la.
Lomi ching Kühde Yüzahkhi Akhuhbe
(Yuzüng 1.41-46)
39Küyimki Mosanü Atungpuh yu Israelrü mihtsürübo ki thakhea, mihtsürübonü khitode tüzho. 40Tüsho arünü yapsu mükikde asürübahle awung mujuk kheak wutu tüsho tha, “ Isa ha ching lah, tüsho Atungpuhnü alokhikhi dangpung ching isa wutubah, tümüde isanü neak yihbeakdo.” 41Tüshe Mosanü tha, “Kheakü tümüde nüsanü Atungpuh yukhüm thsümünimcho? Ju akuk müngü. 42Duwutu, jude yungsho nüsa ririnü nüsa kukbah, tümüde Atungpuh nüsa bolung müla. 43Tümütüsho Amalekrü tüsho Kananrü nüsa müngüh lah, tüsho nüsa nukshangnü akeamshihbah; tümütüsho nüsanü Atungpuh kheaknü alode tsodo, Atungpuh nüsa lung lapü yung.” 44Tüshe Atungpuh tangzüng sangdan tüsho Mosa binkheampung chingnü matrüttrüt she arünü awung mujuk ching wutupü mürang. 45Tüsho ju wung ching larü Amalekrü le Kananrü akibah arü yanyukabah tüsho Horma khiungde yande müsham.
Currently Selected:
WÜHKHE 14: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
