MARK 1

Johan Baptijihbuhnü Thsangyuthsangrakhi

(Mt 3.1-12; Lk 3.1-18; Jhn 1.19-28)

1Ha Thrünpuh tsührü Jisu Khrista thiyusheak atsü atankih.

2Isaia wukihrünü thrüta lah:

“Kheahang, nüsa limro thsakhamshihpü,

nüsa müngüh I yunithsürü yüshihchoh.

3Sunglo ching khülangnü azhikhi düsheak:

Atungpuh limro thsakhamjang,

api tsahpung mukhiungarihdo thsüjang.”

4Johannü sunglo ching baptijihde tüsho neak bahpü thsungkheak mulong rholode baptipü thsangyuthsangrade arü. 5Tüsho Judea lomi alala, tüsho Jirusalem chingnü api kilim wukhiuk tüsho arü neakbo alokhide Jordan ayung ching apinü alala baptijih. 6Johannü kemel nam khim phuyu tüsho achim yande shihküpnü rüm, tüsho apinü tangkhobo le mütüm mukhukebo tsüh. 7Tüsho apinü thsangyuthsangrade tha, “I kheaknü atobe khülang, inü mükhümbah ajingkhümpü zhi trünjihpü müthülünkhi, I dunglim arüchoh. 8Inü nüsa kenü baptijih, tüshe apinü nüsa Me Amüsühnü baptijihbah.”

Jisu Baptikhi tüsho Rükakikhi

(Mt 3.13—4.11; Lk 3.21-22; 4.1-13)

9Ju kim ching Jisu ju Galilee ching lakhi Nazareth chingnü arü tüsho Jordan ching Johannü baptijih. 10Jisu ke chingnü akhiukde alachoki, thüning khimshuhbah müthrithrümpü nangde api kheak Me akikhi ngü. 11#Mt 3.17; 12.18; Mk 9.7; Lk 3.22Tüsho yinmi chingnü düsheak khülang arü: “Nü inü amuzhokhi I tsührü; nü kheak I mulong keamchoh.”

12Tüsho zukleangnü Menü api sunglo ching bede yü. 13Tüsho api Arimrinü rükakide sunglo ching nimung yirü la, tüsho mütüm shiwüh bolung lakheah; tüshe yunirübonü arübah api rung.

Jisunü Thüngüh-ramrü Phüyi Jikhi

(Mt 4.12-22; Lk 4.14-15; 5.1-11)

14Kheakü Johan rihyam ching yukshu, Jisunü Thrünpuh kiulongthsü thiyusheak-atsü thsangyude Galilee ching arü, 15#Mt 3.2tüsho tha, “Kim khiungdo, tüsho Thrünpuh kiulongthsü thüninde lah. Mulong müthriang, tüsho thiyusheak-atsü ching kinang.”

16Tüsho api Galilee keto yean tsahde alachoki, Simon tüsho aniurü Andria büne keto ching keang jipde ngü; tümüde ane thüngüh-ramrü lakheah. 17Judüki Jisunü ane ki tha, “I dunglim arang tüsho inü nüke mihtsürü-ramrü kamshihbah.” 18Tüsho judüchokinü anenü keangbo bah tüsho api dunglim yan. 19Küyimki api ju chingnü anükhüh limshude ayükhea, apinü Zebedee tsührü Jakob, tüsho aniurü Johan ane sangkung ching keangbo thsülode ngü. 20Zukleangnü apinü ane ji, tüsho anenü ane abuh Zebedee lung amulokhi yamlarübo sangkung ching zojihbah api dunglim yü.

Amünean Me Lakhi Mihtsürü

(Lk 4.31-37)

21Judüki arünü Kapernaum ching yü, tüsho zukleangnü apinü Amuni sinagog ching yüzah tüsho thsangyupü tankih. 22#Mt 7.28,29Tüsho apinü thsangyukhi ching mihtsürübonü müyinsah, tümüde apinü thiyukhüm-sühmüh lakhi khülang nangde thsangyu. 23Judüki sinagog ching amünean me yüzahkhi mihtsürü khülang lakheah. Tüsho apinü zhi, 24“Isanü nü lung tümü thsüba, Nazarethrü Jisu? Nü isa dükheakshihpü arükhea de? Nü sheanü inü mükheahlah– Thrünpuh yo Amüsüh Khülang ah!” 25Tüshe Jisunü api thürühde tha, “Dalan, tüsho api kheaknü akhiukang!” 26Amünean menü mihtsürü ju ajande achangnü arungshih, tüsho api kheaknü akhiukabah. 27Judüki mihtsürü alalanü müyinsahde arü bolung keokhiachih, “Ha tümü a? Kingaün-yakzan aso ha tümü a? Tümütüsho thiyukhüm-sühmühnü apinü amünean mebo she thiyukhüm jihchoh, tüsho arünü api ki mihyuanichoh.” 28Tüsho nahdü lang Galilee lomi alala ching api thukhi soride yü.

Mihtsürü Ahihkhüh Thsüngukhi

(Mt 8.14-17; Lk 4.38-41)

29Kheakü arü sinagog chingnü akhiuk müleangnü, arünü Jakob le Johan bebah Simon le Andria büne yam ching yüzah. 30Tüshe Simon niube phütsaknü tukthsüde yapa lakheah, tüsho arünü anihbe dünkheak Jisu ki thaa huh. 31Jumonü apinü arübah akhah kheaknü thomusu, tüsho nahdü lang anihbe kheaknü phütsak ju tsoabah. Tüsho alibenü arü mozümodoa kip.

32Kheakü arelim, ani yüzahbah, arünü tukthsürü tüsho amünean me yüzahrü alala api kilim bedarü. 33Tüsho kiuto abümnü khimdopü ki mukhungde arü. 34Judüki apinü tukthsürü aphuaphu ahihdo thsüngu tüsho amünean mebo yankhit; apinü amünean mebo thiyu müthashih, tümütüsho arünü api mükheah-a lakheah.

Jisunü Galilee ching Thsangyuthsangrakhi

(Lk 4.42-44)

35Yapsu khide mükikde, mitingde alachoki Jisunü asürübah thüyam chingnü chamachih tüsho azhikpung khülang ching yüzahbah tamkhüntamnü. 36Tüsho Simon le api lung larübonü api yim. 37Küyimki arünü api yimkhitkhea, arünü api ki tha, “Alalanü nü yimchoh.” 38Tüshe apinü arü ki tha, “Isanü püpü kiulongbo ching yüanü, junangde ju ching she inü thsangyuthsangrabah, tümütüsho ha thsungkheak I arükheah.” 39#Mt 4.23; 9.35Junangde apinü Galilee alala ching sinagogbo ching thsangyuthsangrade tüsho amünean mebo yankhita bahde yü.

Mihtsürü khülang Thsüngukhi

(Mt 8.1-4; Lk 5.12-16)

40Judüki aphamrü khülang api ki mushude, khukningde arübah tha, “Nünü mulonga lasho, I müsühkhitjang.” 41Tüsho Jisunü muzhode akhah chungkhitbah api qiu, tüsho tha, “Inü mulonglah, müsühde kamang.” 42Apinü atha akede, anihbuh kheaknü apham ju dükheakabah tüsho api müsühde kam. 43Tüsho apinü anihbuh ki düküngde thabah thiyia tsoshih. 44Tüsho apinü anihbuh ki tha, “Nünü she ki tümü dütha; tüshe nü limro ching yübah amükeamrü ki huhang, tüsho nü müsühkhitkhi dünkheak Mosanü thiyukhüm jihkhi nangde rhangdung-yumütsan thsüde kingaün jihang.” 45Tüshe apinü wukhiukbah thiyusheakbo bushihde zuzu thsüde athapü tankih. Jude athsükhinü Jisu ju zuzu thsüde kiuto ching müyüzahkhukde kam tüshe aleangkheak azhikpungbo ching lakheah; tütüshe mihtsürübonü thrip aban chingnü api kilim arü.

Currently Selected:

MARK 1: YIMCBSI

Highlight

Copy