MARK 2

Thripshe Mihtsürü Thsüngukhi

(Mt 9.1-8; Lk 5.17-26)

1Tüshe kheaküshe apinü nimung anükhüh dunglim Kapernaum ching yüzah, tüsho api ju thüyam ching lah de so. 2Zukleangnü ahihkhüh mukhungkhinü khimdopü aleanglim ki she khiungshak mülade kam; tüsho apinü arü ki thiyu ju thsangyuthsangra. 3Judüki arü mihtsürü phüyinü thripshe tukthsürü shuhbah api kilim arü. 4Tütüshe boto lakhinü arünü api thüninde marükhuk, jumonü arünü api kumung ayidükhik chakashungbah tukthsübuh yapkhi ju yükishih. 5Küyimki Jisunü arü akin ngükhea, apinü thripshe tukthsübuh ki tha, “I tsah-a, nü neakbo bahjihdo.”

6Tüshe ju ching athrütrü khürü binde alakheah tüsho arü mulong ching lümakheah, 7“Tümü thsükhi ha mihtsürünü hanangde mükhemükimyu thacho? Thrünpuh kheak hode shenü neakbo bahjihpü kukla?”

8Ha arü mulong ching lümde alakhi ah de Jisunü nahdü lang api me chingnü mükheah, tüsho arü ki tha, “Tümüde nüsanü hadürü lümcho? 9Thripshe tukthsübuh ki, ‘Nü neakbo bahjihdo,’ yungsho, ‘Asürübah nü yapkiu hanang tüsho tsahang,’ de küpü thakhi amülübe laba? 10Junangde alomi ching Mihtsürü Tsührünü neak bahjihpü wu lah de nüsanü amükheahbah.” Apinü thripshe tukthsübuh ki tha, 11“Inü nü ki thachoh, asürübah nü yapkiu shuh-a hanang, tüsho thüyam lim yüang.”

12Tüsho zukleangnü api asürübah yapkiu shuh-a han, tüsho arü alala mikinü wukhiuk, junangde arü alala müyinsah tüsho Thrünpuh shide tha, “Isanü hanangde küyimkishe müngüakheah!”

Jisunü Levi Jikhi

(Mt 9.9-13; Lk 5.27-32)

13Judüki apinü kheaküshe keto yean wukhiuk; yimto ato api kilim arü, tüsho apinü arü thsangyu. 14Tüsho api tsahhode alachoki, apinü Alphia tsührü Levi ruk-threyam ching binde ngü, tüsho apinü anihbuh ki tha, “I dunglim yanang.” Tüsho apinü asürübah api dunglim yan.

15Küyimki api Levi yam ching yimtsühde alakhea, ruk-threrü ahihkhüh tüsho aneakrübo she Jisu le ajingyanrü lung binde alakheah; tümüde api dunglim yanrü ahihkhüh lakheah. 16Tüsho küyimki athrütrü le Pharisirübonü ruk-threrü tüsho aneakrübo lung api yimtsühde angükhea, arünü api jingyanrübo ki tha, “Tümü thsükhi apinü ruk-threrü le aneakrübo lung tsühyungcho?”

17Küyimki Jisunü ha sokhea, apinü arü ki tha, “Mütukthsürü thsungkheak thümürü yihnüpü müla, tüshe tukthsürü thsungkheak ah. Thiyuro-lungkirü yung tüshe aneakrübo#Yungsho wüntre-kihkhi yung tüshe abobe-kuhi ching larü. jipü I arükheah.”

Khümkeak dünkheak Keokhikhi

(Mt 9.14-17; Lk 5.33-39)

18Tüsho Johan jingyanrübo le Pharisirübo khümkeak thsüde alakheah. Mihtsürü khürünü arübah Jisu ki keokhi, “Tümü thsükhi Johan jingyanrübo le Pharisirü jingyanrübonü khümkeak thsücho, tüshe nü jingyanrübonü khümkeak müthsü le?” 19Jisunü arü ki alo, “Yamkhünkambuh müyamrübonü arü lung yamkhün-kambuh lachoki khümkeak thsüpü kukla de? Arü lung yamkhünkambuh la khiungdüa arünü khümkeak müthsükhuk. 20Tüshe arü bolung yamkhün-kambuh bede atsopü nimungbo arübah, tüsho arünü khümkeak thsübah.

21“Shenü she khim amürhüt kheak aso mükhüpkihchoh, tümütüsho akhüpkihkhi ju khim kheaknü rukkhichoh, tüsho abitkhi amütsübe kamshihchoh. 22Yungsho shenü she shihküp-keluh awün ching yukhu amühdo muyukchoh; jude thsüsho shihküp-keluh ju atrübah tüsho yukhu bukkhitbah, tüsho shihküpkeluh ju athsümünimbah. Tüshe shihküp-keluh aso ching yukhu amühdo yukbeah.”

Amuni dünkheak Keokhikhi

(Mt 12.1-8; Lk 6.1-5)

23Kheakü Amuni khülang ching apinü manji-lu hode yü; tüsho arü yüde alachoki ajingyanrübonü manji rütpü tankih, 24Tüsho Pharisirünü api ki tha, “Kheahang, Amuni mürhimopü yakzan lakhi tümü thsükhi arünü rhimocho?” 25Jisunü alo, “David tüsho api lung berübonü yihnüpü ching tüsho khümde alachoki tümü rhimokheanü nüsanü küyimkishe mükheakheah de? 26Achangbe amükeambuh Abiathar nimungbo ching, apinü Thrünpuh yam ching yüzah tüsho amükeamrübonü lang atsühpü yakzan lakhi amüsühkhitkhi yikhap tsüh tüsho apinü khürü api lung berübo kilim she jih.”

27Tüsho apinü arü ki tha, “Amuni ju mihtsürü thsungkheaknü thrün; tüsho mihtsürü thsungkheaknü Amuni yung. 28Jumonü Mihtsürü Tsührü ju Amuni yo Atungpuh ah.”

Currently Selected:

MARK 2: YIMCBSI

Highlight

Copy