MATHI 28

Arhang Kamlokhi

(Mk 16.1-10; Lk 24.1-12; Jhn 20.1-10)

1Kheakü Amuni dunglim, amu-khip akhuhbe nimung mükikde, Mari Magdalen tüsho püpürü Mari arünü kiuyuk kheahpü arü. 2Tüsho kheahang, muliuyuk ato khülang lakheah; tümüde Atungpuh yunirü yinmi chingnü aki tüsho lung ju lah-a bahbah ju kheak bin. 3Api phü ju chinchobe, tüsho api khimmih ju phürüm nangde müyedo alakheah. 4Aheangrübonü api trede ajan tüsho ashekhi mihtsürü nangde kam. 5Tüshe yunirünü aliberübo ki tha, “Dütre, tümüde nüsa ju yümkih-a bahkhi Jisu yimchoh de inü mükheahlah. 6Api ha ching müla; tümüde apinü athakhi nangde anihbuh arhang kamlodo. Arang, Atungpuh yappung kheahang. 7Tüsho niokheamde yübah api jingyanrübo ki, api ashe chingnü arhang kamlodo, tüsho api nüsa müngüh Galilee ching yüchoh de thaang; ju ching nüsanü api ngübah. Kheahang, inü nüsa ki thado.” 8Jumonü arünü trede tüsho khide asühde kiuyuk chingnü nahde chamachih, tüsho api jingyanrübo ki thapü alihde yü. 9Arübo api jingyanrübo ki thapü yüchoki, zukleangnü Jisunü arü shorubah tha, “Nüsa lung mungtsü laang!” Tüsho arünü arübah ajing kheak ramrih tüsho api kingaün. 10Judüki Jisunü arü ki tha, “Dütre. Yüang tüsho I keoniorübo ki Galilee ching yüpü thaang; ju ching arünü I ngübah.”

Aheangrü Yusheak

11Küyimki arü yüde alakheanü, aheangrü khürünü kiuto ching arübah amükeam putungrübo ki adünjikhi alala thiyusheak jih. 12Küyimki arünü azothsürübo lung mukhungbah lümkhi asukachihkhea, arünü bonungrübo kilim sho ahihdo jih, 13tüsho tha, “Isa yapde alachoki api jingyanrübonü azhing ching arübah api ahühde tsodo de arü ki thaang. 14Kovünornü ha yusheak shosho, isanü api reangkeamshihbah, tüsho nüsa küpkhuk müngüde alabah.” 15Jumonü bonungrübonü sho ju lu tüsho arü ki athsunganahkhi nangde rhimo. Tüsho ha yukhüm Jihudarü bolung khihni khiungde thabude arü.

Jisu Api Jingyanrübo ki Akhiukkhi

(Mk 16.14-18; Lk 24.36-49; Jhn 20.19-23; Yunir 1.6-8)

16 # Mt 26.32; Mk 14.28 Judüki jingyanrü thürükheak khülang ju Jisunü arü ki thiyikhi müzüng lim Galilee ching yü. 17Tüsho küyimki arünü api ngükhea, arünü api kingaün; tüshe khürünü lümshangmang. 18Judüki Jisunü arübah arü ki tha, “Yinmi ching tüsho alomi kheak thiyukhümsühmüh alala I kilim jihdo. 19#Yunir 1.8Jumonü yüang tüsho Abuh, Atsührü tüsho Amüsüh Me mung chingnü baptide trükshih alala jingyanrübo kamshang, 20inü nüsa ki thiyukhüm jihkhi alala anipü arü ki thsangyuang; tüsho kheahang, I nüsa lung kamruhroro, lün akheam khiungde alabah.”

Currently Selected:

MATHI 28: YIMCBSI

Highlight

Copy