MATHI 27

Pilat Miki Jisu

(Mk 15.1; Lk 23.1-2; Jhn 18.28-32)

1Yapsu mükikde, amükeam putungrü tüsho azothsürü alalanü Jisu sheshihpü lümkhi khikzhak. 2Arünü api rhük tüsho Rom kovünor Pilat kilim bede yünü jih.

Juda Iskariot Shekhi

(Yunir 1.18-19)

3 # Yunir 1.18,19 Judüki api yinatsühbuh Judanü Jisu bahyukkhi ngübah aküdahnü lümalo tüsho shotoyinchi 30 ju amükeamrü putungrü le azothsürübo kilim hanlode yü. 4Apinü tha, “Amülim mülarü yinatsühde thiyih bukshihkhi hode inü neak yihbeakdo.” Arünü alo, “Isanü ju tümü thsüjihpü? Ju nü küdah thsang!” 5Judüki apinü shotoyinchibo ju arüngyam ching jipa bahbah tso, tüsho yübah aküdah thsüde süksah. 6Tüshe amükeam putungrübonü shotoyinchibo ju lu tüsho tha, “Harü ju rahpung-yam ching yukpü yakzan müla, tümütüsho jurübo thiyih dün ah.” 7Tüsho arünü asukachihbah hanrübo kiuyuka bahpü phühdamrü lu thulo. 8Jumonü khihni khiungde ju lu ki Thiyih Lu de jide lah. 9Junangde Jeremia wukihrünü athakhi dünji: “Israel mihtsürübonü api dün akhukhi shotoyinchi 30 ju arünü lu, 10tüsho Atungpuhnü I ki thiyukhüm jihkhi nangde arünü phühdamrü lu thulo.”

Pilatnü Jisu ki Keokhikhi

(Mk 15.2-5; Lk 23.3-5; Jhn 18.33-38)

11Kheakü Jisu ju kovünor miki zhip. Tüsho kovünornü api ki keokhi, “Nü Jihudarü kiulongthsüpuh a de?” Jisunü alo, “Am, nünü thachoh.” 12Tüsho amükeam putungrübo le azothsürübonü api amülim jihchoki, apinü tümü malo. 13Judüki Pilatnü api ki tha, “Arünü küdükhüh nü azhihde thiyumütsan jihchonü nünü muso de?” 14Tüsho apinü anihbuh ki thiyu bümkhüh she malo, junangde kovünornü khide müyinsah.

Jisu Sheshihkhi

(Mk 15.6-15; Lk 23.13-25; Jhn 18.39—19.16)

15Kheakü phungho-thünio aban, botonü amulongkhi rihyam ching larü khülang dükhepü kovünor yakzan lakheah. 16Tüsho judüki rihyam ching larü amütsüdak Baraba de alakheah. 17Jumonü küyimki arü rukhüh mukhungkheanü Pilatnü tha, “Nüsa kilim inü shepü dükheshihnela? Baraba a shi, Khrista de ajikhi Jisu a?” 18Tümütüsho mükthsükhinü anihbuh kilim Jisu rama jihdo de apinü mükheah.

19Küyimki Pilat ju mahkhaprü binkiu kheak binde alakhea, aniubenü ha yusheak yüshih: “Ju thiyuro mihtsürü kheak tümü düthsü, tümüde api dünkheak yishih milim ching I khide küpkhukdo.” 20Tüshe amükeam putungrü le azothsürübonü Baraba dükhebah Jisu sheshihpü thaang de boto ki athsung. 21Kovünornü arü ki tha, “Ane bolung shepü inü nüsa kilim dükheba?” Arünü alo, “Baraba!” 22Pilatnü arü ki tha, “Dale tüsho Khrista de ajikhi Jisu ki inü tümü thsüba?” Arünü api ki alo, “Api yümkihang.” 23Judüki kovünornü tha, “Tümü thsükhi, apinü amütsü tümü rhimoa la?” Tüshe arünü alü thsüde tha, “Api yümkihang!”

24Küyimki Pilatnü tümü müthsükhukde boto arhunganim tankihkhi ngükhea, apinü ke lubah boto miki akhah mütsakde tha, “Thiyuro mihtsürü thiyih bukkhi I amülim müla. Ju nüsa küdah thsang!” 25Tüsho mihtsürü alalanü alo, “Api thiyih isa le isa tsührübo kheak rheakshang.” 26Judüki apinü arü kilim Baraba dükhe; tüsho apinü Jisu ju rhapbah ayümkihshihpü shuhmülanga jih.

Bonungrübonü Jisu Luhmünekhi

(Mk 15.16-20; Jhn 19.2-3)

27Judüki Pilat bonungrübonü Jisu bea lubah kovünor yam ching yüzah tüsho bonungrü boto alala api mükamde mukhung. 28Tüsho arünü api khimmih khukkhijihbah mürümmuchu shulünkhim yihkihjih. 29Arünü ayangliunü rhophülapde kuthran khülang thsübah aku kheak thranjih, tüsho akhah tsülim tso khülang zhimshih. Arünü api miki khukning tüsho api ki luhmünede tha, “Tsüde laang, Jihudarü kiulongthsüpuh!” 30Judüki arünü api kheak mukhiukkih, tüsho tso lubah aku kheak rhap. 31Küyimki arünü api mükhemükimkhea, arünü api kheaknü shulünkhim khukkhi tüsho anihbuh khimmih phuyujihbah ayümkihpü thode yü.

Jisu Yümkihkhi

(Mk 15.21-32; Lk 23.26-43; Jhn 19.17-27)

32Arü akhiukde alachoki, Simon de ajikhi Serene ching mihtsürü khülang arünü shoru, tüsho arünü api ki nimkih-a sangkim hanshih. 33Tüsho küyimki arünü Kuro Dangpung de ajikhi Golgotha ching arükhea, 34arünü akhüh düsahbah asanke api duh. Tüshe apinü ju müleakakheahbah muyung. 35Judüki arünü api yümkih, tüsho azan thsüde api khimmih chama lu, junangde wukihrünü athakhi dünjipü lakheah: “Arünü arü bolung I khimmihbo chama lu, tüsho I khimmih thsungkheak arünü azan thsü.” 36Tüsho arünü ju ching api aheangde bin. 37Tüsho api azhihkhi yu thrüta api kumung zojih: Ha jihudarü kiulongthsüpuh jisu. 38Judüki arünü api lung ahührü mahne khülang tsülim tüsho khülang huzulim yümkih. 39Tüsho atsahhorübonü arü ku angamde api ki mükhemürang thsü 40#Mt 26.61; Jhn 2.19tüsho tha, “Nü shepünü arüngyam thsümünimbah nimung mahsam chingnü athsükhipü lanü, nü küdah thsüde khümkhitang! Nü Thrünpuh tsührü a sho sangkim chingnü akiang.” 41Junangde amükeam putungrübonü she athrütrü le azothsürübo lungnü luhmünede tha, 42“Apinü püpürü khümkhitdo; apinü anihbuh mükhümkhitkhuk. Api Israel kiulongthsüpuh a sho, kheakü apinü sangkim chingnü akishang, tüsho isanü api kheak akin labah. 43Apinü Thrünpuh kheak kindo; kheakü apinü anihbuh khümkhitshang; tümüde apinü tha, ‘I Thrünpuh tsührü ah.’ ” 44Api lung yümkihkhi ahührübonü she ju ruk api mükhemürang thsü.

Jisu Shekhi

(Mk 15.33-41; Lk 23.44-49; Jhn 19.28-30)

45Kheakü animuro kim chingnü 3 king khiungde alomi alala ching amiting lakheah. 46Tüsho 3 king ngüm Jisunü düsheak achangnü zhide tha, “Eloi, Eloi, lama sabakthani?” ju amütsan, “I Thrünpuh, I Thrünpuh, tümüde nünü I bahyukkhea?” 47Ju ching zhiprü khürünü sobah tha, “Apinü Elija jichoh.” 48Arü bolung khülangnü nahde shande yübah minap hingkhi lu tüsho asanke ching thsambah dükheangmung mün kheaknü api duh. 49Püpürünü tha, “Api langzü zojang; Elija arübah api khümkhitnahnü isanü kheahanü.” 50Tüsho Jisunü adüsheak achangnü zhilobah anihbuh sheak akheam thsü.

51Tüsho kheahang, arüngyam zhindokhim ju akulimnü abolim khiungde mahne thsüde thorüp; alomi niuk, tüsho lungbo lahmüzüt, 52tüsho kiuyukbo khimshuh; shea lakhi amüsührü pangbo ahihkhüh arhang kamlode asürü; 53arünü kiuyukbo chingnü akhiuk tüsho Jisu arhang kamloshu arünü amüsüh kiuto ching yüzah tüsho ahihkhüh ki akhiuka huh. 54Küyimki bonungrü torü tüsho api lung aheangrübonü muliuyuk züngkhi tüsho adünjikhi alala ngükhea, arünü khide trede tha, “Atsütsü ha Thrünpuh tsührü thsüa lah!” 55#Lk 8.2,3Tüsho Galilee chingnü Jisu dunglim yande api tankihrü aliberü ahihdonü limshu chingnü kheahde alakheah, 56jurü bolung Mari Magdalen, Jakob tüsho Josep abe Mari, tüsho Zebedee tsührübo abe lakheah.

Jisu Mi Bahkhi

(Mk 15.42-47; Lk 23.50-56; Jhn 19.38-42)

57Küyimki arelim kamkhea, nihbuh zangrü Jisu jingyanrü kamkhi Arimathea chingnü alarü mihtsürü khülang Josep arü. 58Apinü Pilat kilim yübah Jisu mi kheang tüsho Pilatnü api kilim jihpü thiyukhüm jih. 59Josepnü mi ju lubah khim athünak chingnü hing, 60tüsho lung chingnü akiukhi anihbuh kiuyuk aso ching zo; tüsho kiuyuk mün kheak lung ato khülang lahkih-a zobah tsoabah. 61Tüsho Mari Magdalen le püpürü Mari kiuyuk mikhuh binde alakheah.

Kiuyuk Aheangrü

62Ashidopü, Amunimung, amükeam putungrübo tüsho Pharisirübonü Pilat ki rukhüh mukhung, 63#Mt 16.21; 17.23; 20.19; Mk 8.31; 9.31; 10.33,34; Lk 9.22; 18.31-33tüsho tha, “Atobuh, api arhang lachoki, mülapmüjibuhnü athakhi isanü lümkhitchoh, ‘Nimung mahsam dunglim I asürübah.’ 64Jumonü nimung mahsam khiungde kiuyuk aheangpü thiyukhüm jihang, jude yungsho api jingyanrübonü azhing ching arübah ahühde atsobah, tüsho, ‘Ashe chingnü api arhang kamdo’ de mihtsürübo ki thabah. Junangde ashude mülapyukkhi ju akhuhbe kheaknü amütsübe labah.” 65Pilatnü arü ki tha, “Aheangrü bebah yüang; nüsanü amükheahkhi nangde aheangang.” 66Jumonü arünü yübah kiuyuk ju lungnü düngde lahdo tüsho aheangrü zojih.

Currently Selected:

MATHI 27: YIMCBSI

Highlight

Copy