MATHI 26

Jisu azhihde Rük Yimkhi

(Mk 14.1-2; Lk 22.1-2; Jhn 11.45-53)

1Küyimki Jisunü harü alala thakhamkhea, apinü ajingyanrübo ki tha, 2“Nüsanü mükheahlah, nimung mahne dunglim phungho-thünio labah, tüsho Mihtsürü Tsührü sangkim ching yümkihpü jihbah.”

3Judüki amükeam putungrübo, athrütrübo tüsho mihtsürübo kurung azothsürübo Kaifa de ajikhi achangbe amükeamrü yam ching mukhung, 4tüsho arünü rük thsüde Jisu rama lubah alaksahpü lümkhi thsü. 5Tüshe arünü tha, “Thünio kim ching a düh, jude yungsho mihtsürü bolung arhunganimbah.”

Bethani ching Müdangke Mujukhi

(Mk 14.3-9; Jhn 12.1-8)

6Tüsho küyimki Jisu ju Bethani ching aphamrü Simon yam ching lakhea, 7#Lk 7.37,38aliberü khülang lung-langpung chingnü amo-achak rhümthünea müdangke lubah arü, tüsho api dükhüm ki binde alachoki aku kheak dungkihjih. 8Tüshe küyimki api jingyanrübonü ju ngükhea, arünü bukakhiukde tha, “Tümü thsükhi ha phinphurukcho? 9Tümütüsho ha rhümthünea müdangke ahihdo mo yinbah zhochihrü kilim jihbeah.” 10Tüshe küyimki Jisunü ju mükheahkhea, apinü arü ki tha, “Tümü thsükhi nüsanü alibe küpkhuk jihcho? Tümütüsho anihbenü I thsungkheak rhimo atsü rhimodo. 11Tümütüsho nüsa lung zhochihrü kamruhroro labah, tüshe I a kamruhroro müla. 12Tümüde I pang kheak ha rhümthünea müdangke bukkihkhinü, alibenü I mi bahpü thsungkheak rhimodo. 13Atsütsü inü nüsa ki thachoh, alomiküp kürü ching ha thiyusheak-atsü thsangyuthsangrabanü, ha liberünü tümü rhimokheanü anihbe mümihpü thsüde athabah.”

Judanü Jisu Yinatsühpü Alokhikhi

(Mk 14.10-11; Lk 22.3-6)

14Judüki thürükheak mahne bolung khülang, Juda Iskariotnü amükeam putungrübo ki yü 15tüsho tha, “Inü api nüsa kilim jihsho nüsanü I kilim tümü jihpü mulongla?” Tüsho arünü api kilim shotoyinchi 30 khekhita jih. 16Jumonü apinü ju kim ching api yinatsühpü kim atsü yim.

Phungho-thünio Yimtsühkhi

(Mk 14.12-21; Lk 22.7-13,21-23; Jhn 13.21-30)

17Kheakü phaüm muyukkhi thünio akhuhbe nimung jingyanrübonü arübah Jisu ki tha, “Nü thsungkheaknü phungho-thünio tsühpü isanü küching thsakhamshihnela?” 18Tüsho apinü tha, “Kiuto ching mihtsürü khürü ki yübah thaang, ‘Thsangyurünü thachoh, “I kim thüninde lah; I jingyanrübo tüsho inü nü yam ching phungho-thünio labah.”’” 19Jumonü Jisunü khuhlangahuhkhi nangde jingyanrübonü rhimo; tüsho arünü phungho-thünio thsakham.

20Küyimki arelim kamkhea, apinü thürükheak mahne lung bin. 21Arü yimtsühde alachoki, apinü tha, “Atsütsü inü nüsa ki thachoh, nüsa bolung khülangnü I yinatsühbah.” 22Arünü khide mulong rozhak, tüsho arü abannü api ki thapü tankih, “Atungpuh, ju I a shi?” 23Judüki apinü alo, “Shepü I lung phuru ching akhah amayukchonü junü I yinatsühbah. 24Mihtsürü Tsührü a api dünkheak thrüta lakhi nangde yüchoh, tüshe shepünü Mihtsürü Tsührü yinatsühchonü ju mihtsürü are! Ju mihtsürü a api thsungkheaknü müzübejungkhi atsübe lado.” 25Judüki api yinatsühpü lakhi Judanü tha, “Thsangyurü, ju I a shi?” Apinü anihbuh ki tha, “Nünü thado.”

Atungpuh Thünio

(Mk 14.22-26; Lk 22.14-20; 1 Kor 11.23-25)

26Arü yimtsühde alachoki, Jisunü yikhap lubah müngühjih tüsho yihnak, tüsho jingyanrübo ki jihde tha, “Luang tüsho tsühang; ha I pang ah.” 27Jushu apinü pung ju lu, tüsho makshe jihbah arü ki jihde tha, “Nüsa alala ha chingnü yungang. 28Tümüde ha aso tangzüngkhi, ahihkhüh neak bahjihpü bukkhi I thiyih ah. 29Tüshe inü nüsa ki thachoh, inü nüsa lung I Buh kiulongthsü ching kurungaso ke aso muyungyi khiungde kurungaso ke muyung.”

30Tüsho küyimki arünü khün thsükheanü Oliv Müzüng lim yü.

Peternü Malokhipü Müchitkhi

(Mk 14.27-31; Lk 22.31-34; Jhn 13.36-38)

31Judüki Jisunü arü ki tha, “Khihre nüsa alala I dünkheaknü atsomüzütbah, tümüde ha thrüta lah: ‘Inü namfimihnu neakbuh shikbah, tüsho namfimihnu boto tsomüzütbah.’ 32#Mt 28.16Tüshe I alode asürü dunglim, I nüsa müngüh Galilee ching yübah.” 33Peternü api ki alo, “Nü dünkheaknü alala tsomüzützüt she, inü a küyimkishe mutso.” 34Jisunü api ki tha, “Atsütsü inü nü ki thachoh, khihre thunu mukhungyide, nünü mahsam ki I malokhide alabah.” 35Peternü alo, “I nü lung ashepü thsüthsü she, inü nü malokhide müla!” Tüsho junangde jingyanrü alalanü tha.

Gethsemane ching Tamkhüntamnükhi

(Mk 14.32-42; Lk 22.39-46)

36Judüki Jisunü arü lung Gethsemane de ajikhi dangpung ching arü, tüsho jingyanrübo ki tha, “I ju ching yübah tamkhüntamnüchoki ha kheak bincholang.” 37Apinü anihbuh lung Peter tüsho Zebedee tsührü mahne bea lu tüsho mulong rozhakde sükde lümthsünüpü tankih. 38Apinü arü ki tha, “I me ashepü thsüde mulong rozhaklah. Nüsa ha kheak I kheahde aleangang. 39Apinü anükhüh limshude yübah amiro mükhüm tüsho tamkhüntamnüde tha, ‘O Abuh, kuksho ha pung I kheaknü luakhinjang; judüalalashe I lümkhi yung, tüshe nü lümkhi ah.’ 40Judüki apinü jingyanrübo kilim arü tüsho arü yapshea ngü, tüsho Peter ki tha, ‘Nüsanü I lung kimkhü 1 she kurhangde mülakhuk de? 41Junangde nüsa rükaki ching müyüzahpü thsüde kurhangang tüsho tamkhüntamnüang. Menü a künlah tüshe shih ching reangmüzah.’ 42Apinü mahne kipü yülo tüsho tamkhüntamnüde tha, ‘O Abuh, inü muyungde ha pung luakhinbah mutsokhuksho, nü lümkhi thsang.’ 43Küyimki api alode arükhea, kheaküshe arübo yapshea apinü ngü, tümütüsho arünü arü mük mürheakkhuk. 44Jumonü apinü arü zojihbah alode yü, tüsho thiyubo ju ruk lang mahsam kipü tamkhüntamnü. 45Judüki apinü ajingyanrübo kilim arübah tha, ‘Nüsa kheakü khiungde sühakhimde yapla de? Kheahang, kim thünina lah, tüsho Mihtsürü Tsührü aneakrübo khah ching jihdo. 46Asürang, isa yüanü. Kheahang, I yinatsührü ha kheak lah.’ ”

Jisu Ramkhi

(Mk 14.43-50; Lk 22.47-53; Jhn 18.3-12)

47Api thade alachoki, thürükheak mahne bolung khülang, Juda, anihbuh lung amükeam putungrübo tüsho mihtsürü yo azothsürübonü athiyikhi nukshangbo le shinuk shuhrü boto ato bebah arü. 48Kheakü api yinatsühbuhnü arü ki amütsan jihde tha, “Shepü kheak inü müthsüpbanü, api ah; api ramang.” 49Judüki apinü niokheamde Jisu kilim yü tüsho tha, “Salüm, Thsangyurü!” tüsho api müthsüp. 50Tüsho Jisunü api ki tha, “Müyambuh, nü tümü thsüpü arükhea?” Judüki arünü arübah Jisu rama lu. 51Zukleangnü Jisu lung bekhi khülangnü nukshang dukkhitbah achangbe amükeambuh yamlarü nuku thsüpkhijih. 52Jisunü api ki tha, “Nü nukshang ayukpung ching yukloang, tümütüsho nukshang ahorirü alala nukshangnü ashebah. 53Kheakü I kilim yunirü boto thürükheak mahne kheaknü she alü arüshihpü inü I Buh ki mütamkhüntamnükhuk de nüsanü lümcho de? 54Dale tüsho judüpü thsüde amüsühyu küde thsah adünjiba?” 55#Lk 19.47; 21.37Ju kim ching Jisunü boto ki tha, “Nüsanü jangkhijangrarü khülang azhihkhi nangde nukshangbo le shinukbo shuhbah I rampü arükhea de? Nimung aban arüngyam ching thsangyude I nüsa lung bindo, tüsho nüsanü I müram. 56Tüshe ha alala wukihrübonü thrüta zokhi dünjipü lakheah.” Judüki jingyanrübo alalanü api bahbah tso.

Jisu Kiuthsü-binkiu Miki

(Mk 14.53-65; Lk 22.54-55,63-71; Jhn 18.13-14,19-24)

57Tüsho Jisu ramrübonü api ju achangbe amükeambuh Kaifa kilim, athrütrü le azothsürübo mukhungpung bebah yü. 58Tüshe Peternü limshu chingnü yande achangbe amükeambuh yam ki yü. Tüsho apinü yüzahbah tümü dünjibanü kheahde aheangrü lung bin. 59Kheakü amükeam putungrübo, azothsürübo, tüsho kiuthsü-binkiu alalanü api sheshihpü Jisu azhihde arükchih thiyumütsan yim, 60tüshe tümü müyimkhit. Arükchih thiyumütsan ahihkhüh arürü she, arünü müyimkhit. Tüshe akheam ching thiyumütsan mahne arü 61#Jhn 2.19tüsho tha, “Inü Thrünpuh arüngyam thsümünimbah nimung mahsam chingnü athsülokhukbah de ha buhnü thado.” 62Achangbe amükeambuhnü wusu tüsho api ki tha, “Nünü maloba de? Harü mihtsürübonü nü azhihde thiyumütsan thsükhibo ha tümü a?” 63Tüshe Jisunü zhikde la. Tüsho achangbe amükeambuhnü api ki tha, “Nü Thrünpuh tsührü Khrista a shi yungnü isa ki thaang de inü arhang Thrünpuh tamde nü ki thachoh.” 64Jisunü api ki alo, “Nünü thado. Tüshe inü nüsa ki thachoh, ha dunglim Mihtsürü Tsührü ju Wuto khah tsülim binbah yinmi amo ching arükhi nüsanü angübah.” 65Judüki achangbe amükeambuhnü akhim thorüpde tha, “Apinü mükhemürang thado! Isanü thiyumütsan alü yihnüpü müla! Nüsanü kheakü apinü mükhemürangkhi sodo! 66Nüsanü tümü lümcho?” Arünü alo, “Api ashepü thülünlah.” 67Judüki arünü api amiro kheak mukhiukkih tüsho lak; tüsho püpürünü arü khah zhimpungbah api shik, 68tüsho tha, “Isa ki müchitang, Khrista! Nü shikcho ju she a?”

Peternü Jisu Malokhikhi

(Mk 14.66-72; Lk 22.56-62; Jhn 18.15-18,25-27)

69Kheakü Peter ju wungdo limkhuh binde alakheah. Tüsho yamlarü aliberü khülangnü arübah api ki tha, “Nü she Galileerü Jisu lung lakheah.” 70Tüshe apinü arü alala miki arochihde tha, “Nünü tümü thachonü inü mümükheah.” 71Tüsho küyimki ripit-limro lim yükhea, aliberü püpünü api ngübah ju kheak larü ki tha, “Ha buh she Nazarethrü Jisu lung lakheah.” 72Tüshe kheaküshe apinü thiyuchihchimde arochih, “Inü mihtsürü ju mümükheah!” 73Tüsho anükhüh labah ju ki zhiprünü arübah Peter ki tha, “Tsükjide nü she arü bolung belah, tümütüsho nü yunü nü mütsanchoh.” 74Judüki apinü athruajide tüsho thiyuchihchimde athapü tankih, “Inü mihtsürü ju mümükheah!” Tüsho judüakede thununü khung. 75Tüsho Jisunü api ki thakhi yu Peternü lümkhit, “Thunu mukhungyide nünü mahsam ki I malokhide alabah.”

Currently Selected:

MATHI 26: YIMCBSI

Highlight

Copy