MATHI 25

Atsangkhit Anünürü Thürü Shihdanglimyu

1 # Lk 12.35 “Judüki yinmi kiulongthsü ju atsangkhit anünürü 10 arü tsünpung shuhbah yamkhün-kamrü mihleang yükhi kiphahde alabah. 2Kheakü arü 5 lümlung larü, tüsho 5 lümlung mülarü lakheah. 3Lümlung mülarübonü moke alü mühande arü tsünpung lu, 4tüshe lümlung larübonü arü tsünpungbo lungnü arü langpung ching moke han. 5Tüshe küyimki yamkhün-kamrü ruhde alakhea, arü alala ane tüsho yapshede yü. 6Tsüngphulung ching azhikhi khülang so: Kheahang, yamkhün-kamrü arüchoh; api leangpü wukhiukang! 7Judüki atsangkhit anünürü alala asürü tüsho arü tsünpung atünado. 8Tüsho lümlung mülarübonü lümlung larübo ki tha, ‘Isa kilim nüsa moke anüknük jihang, tümüde isa tsünpung mütmuroh.’ 9Tüshe lümlung larübonü alo, ‘Muh, isa le nüsa chido thsungkheak musuhdah; judüpü dün a ayinrü kilim yübah nüsa thsungkheak thuloang.’ 10Tüsho küyimki athulopü yükhea, yamkhün-kamrü arü, tüsho thsakhama larübo ju api leangpü arhangrü thünio ching yüzah; tüsho khimdopü rihabah. 11#Lk 13.25Ju dunglim atsangkhit anünürü püpürü ju she arübah tha, ‘Atungpuh, Atungpuh, isa kilim khimshuhjang!’ 12Tüshe apinü tha, ‘Atsütsü inü nüsa ki thachoh, inü nüsa mümükheah.’ 13Jumonü kurhangang, tümüde Mihtsürü Tsührü arüpü nimung yungsho kim nüsanü mümükheah.

Yamlarü Mahsam Shihdanglimyu

(Lk 19.11-27)

14 # Lk 19.11-27 “Tümütüsho yinmi kiulongthsü ju mihtsürü khülangnü ayamlarübo jibahle api kukrukbo zojihbah limshu lomi ching hantsah yükhi kiphahlah. 15Tüsho apinü mihbüm aban akukkhi thülün khülang kilim suna shonak 5000 jih, püpü kilim 2000 jih, tüsho püpü khülang kilim 1000 jih; tüsho apinü hantsah yü. 16Judüki suna shonak 5000 leangkhibuhnü yübah jurünü shothsübu, tüsho püpü alü 5000 kamshih. 17Tüsho 2000 leangkhibuhnü she 2000 alü kamshih. 18Tüshe shepünü 1000 leangkhikheanü alo kiubah api putungrü sho rama zo.

19“Kim ashang dunglim jurü yamlarübo putungrü arü tüsho arübo lung khezükhedode mütsanmüküh. 20Jumonü shepünü suna shonak 5000 leangkhikheanü püpü suna shonak 5000 lude arübah tha, ‘Atungpuh, nünü I kilim suna shonak 5000 jih; kheangang, inü ju ching suna shonak püpü 5000 alü thsüjihdo.’ 21Api putungrünü anihbuh ki tha, ‘Tsüde rhimodo, thiyuro yamlarü atsü; nünü kukruk anükhüh kurungkheak thiyuro lado, inü kukruk ahihkhüh kurungkheak nü yakzanshuhrü kamshihbah. Nü putungrü asühpung ching yüzahang.’

22“Shepünü suna shonak 2000 leangkhikheanü arübah tha, ‘Atungpuh, nünü I kilim suna shonak 2000 jih; kheahang, inü ju ching suna shonak püpü 2000 alü thsüjihdo.’ 23Api putungrünü anihbuh ki tha, ‘Tsüde rhimodo, thiyuro yamlarü atsü; nünü kukruk anükhüh kurungkheak thiyuro lado, inü kukruk ahihkhüh kurungkheak nü yakzanshuhrü kamshihbah. Nü putungrü asühpung ching yüzahang.’

24“Judüki suna shonak 1000 leangkhibuhnü arübah tha, ‘Atungpuh, nü amüküp mihtsürü ah de inü mükheahlah; küching nünü mümükheankhea, ju ching nünü yimluchoh, tüsho küching nünü müjih muhiukhea, ju ching nünü hanmukhungchoh. 25Jumonü I trede alakheah, tüsho yübah nü yo suna shonak alo ching ramkheah. Kheahang, nü yo ha lah.’

26“Tüshe api putungrünü anihbuh ki tha, ‘Nü mihbukmuyuk tüsho yomuhyothsün yamlarü, inü mümükheankhi ching inü yimluchoh tüsho müjih muhiupung ching hanmukhungchoh de nünü mükheahlah. 27Jumonü nünü I sho ju shoyam ching zobeah tüsho I arüchoki sholü bede inü aleangkhipü lado. 28Jumonü api kheaknü suna shonak luang, tüsho ju shonak 10,000 labuh kilim jihang. 29#Mt 13.12; Mk 4.25; Lk 8.18Tümüde shepü lanü, alü jihlobah, tüsho api muzhomopungde alabah; tüshe shepü mülanü, api lakhi she lude atsobah. 30#Mt 8.12; 22.13; Lk 13.28Tüsho alü-müthsükhi yamlarü ju wungdo amiting ching jipa bahang, ju ching atripkhi tüsho hü mütrütkhi labah.’

Akheam Thiyukhap

31 # Mt 16.27; Mt 19.28 “Küyimki Mihtsürü Tsührü, api lung amüsüh yunirübo alala bebah müretahkhi ching arübanü, nihbuh müretah kiulongthsü-binkiu kheak api binbah. 32Trükshih alala api miki mukhungbah, tüsho namfimihnu neakrünü nihbuh namfimihnubo chingnü mihnubo büthsükhi nangde apinü arü khülang chingnü khülang büthsübah. 33Apinü namfimihnubo api khah tsülim, tüsho mihnubo huzulim zobah. 34Judüki kiulongthsüpuhnü tsülim larü ki thabah, ‘Arang, nüsa I Buhnü müngühjihrübo, alomiküp thrüntanchokinü nüsa thsungkheak thsakhamkhi kiulongthsü yamrüplurüp luang: 35tümüde I khümde alakheah tüsho nüsanü I kilim jim kip; I kethüride alakheah tüsho nüsanü I kilim ayungbe duh; I hanrü lakheah tüsho nüsanü I beyuk; 36I bünkeang lakheah tüsho nüsanü I phuyujih; I tukthsüde lakheah tüsho nüsanü I mütrü; I rihyam ching lakheah tüsho nüsanü I rhuakheah.’

37“Judüki thiyuro-lungkirünü api ki alode athabah, ‘Atungpuh, küyimki isanü nü khümde angükhea tüsho nü yimkipkhea, yungsho kethürikhea tüsho ayungbe nü duhkhea? 38Küyimki isanü nü hanrü thsüde angükhea tüsho beyukkhea, yungsho bünkeang labah nü phuyujihkhea? 39Yungsho küyimki nü tukthsükhea, yungsho rihyam ching lakhi ngübah isanü nü rhuakheahkhea?’

40“Kiulongthsüpuhnü arü ki alobah, ‘Atsütsü inü nüsa ki thachoh, nüsanü tümüpürü I keoniorü bolung aninibe thsungkheak rhimokheanü, nüsanü I thsungkheak rhimodo.’

41“Judüki apinü huzulim larü ki thabah, ‘Nüsa arimri tüsho api yunirübo khilim thsakhamkhi akheam müla motru ching muthrumüneana bahrübo, I kinü tsoang: 42tümüde I khümde alakheah tüshe nüsanü I kilim jim mükip; I kethüride alakheah tüshe nüsanü I kilim ayungbe muduh; 43I hanrü lakheah tüshe nüsanü mübeyuk, bünkeang lakheah tüshe nüsanü I muphuyujih, tukthsüde tüsho rihyam ching lakheah tüshe nüsanü rhuamükheah.’

44“Judüki arünü she api ki alobah, ‘Atungpuh, küyimki isanü nü khümde yungsho kethüride yungsho hanrü thsüde yungsho bünkeang yungsho tukthsüde yungsho rihyam ching lade ngübah nü mürungkhea?’ 45Apinü arü ki alode athabah, ‘Atsütsü inü nüsa ki thachoh, nüsanü tümüpürü I keoniorü bolung aninibe thsungkheak mürhimokheanü, nüsanü I thsungkheak mürhimo.’ 46Judüki harü akheam müla thsümüchi ching yüshihbah, tüshe thiyuro-lungkirü a akheam müla rhangdung ching yübah.”

Currently Selected:

MATHI 25: YIMCBSI

Highlight

Copy