MATHI 24

Arüngyam Thsümünimpü Jisunü Athakhi

(Mk 13.1-2; Lk 21.5-6)

1Judüki Jisunü wukhiukbah arüngyam chingnü chamachih, tüsho api jingyanrübonü anihbuh ki arüngyam huhpü arü. 2Tüsho Jisunü arü ki tha, “Nüsanü harü alala müngü de? Atsütsü inü nüsa ki thachoh: ha dangpung ching lung khülang she maningde keamabahbah.”

Küpkhuk tüsho Thsümüchi

(Mk 13.3-13; Lk 21.7-19)

3Kheakü api Oliv Müzüngbo kheak binde alachoki jingyanrübonü api kilim mükhingde arübah tha, “Harü küyimki dünjibanü isa ki thaang? Tüsho nü arükhi le lün akheam amütsan tümü laba?” 4Jisunü arü ki alo, “Shenü she nüsa mümülapyukshihpü kurhangang. 5Tümüde ahihkhühnü I mung chingnü, ‘I Khrista’ de thade arübah tüsho ahihkhüh mülapyukbah. 6Nüsanü thirithsübo tüsho thirithsü düsheakbo sobah, tüshe nüsanü darhunganim; tümüde harü alala adünjibah, tüshe akheam marüyi. 7Tümütüsho trükshihnü trükshih, tüsho kiulongthsünü kiulongthsü azhihde wusubah. Tüsho dangpung aban ching khümzung, arüm, tüsho muliuyuk labah. 8Harü alala zübe-thsünü tankihkhi labah.

9 # Mt 10.22 “Judüki arünü nüsa thsümüchipü jihbah tüsho alaksahbah, tüsho I mung dünkheaknü trükshih alalanü nüsa thraneanbah. 10Tüsho judüki ahihkhühnü akin ching tuklobah, khülangnü khülang thsungyukachihbah tüsho thraneanachihbah. 11Arükchih wukihrü ahihkhüh akhiukbah tüsho ahihkhüh mülapyukbah. 12Tümütüsho mihbukmuyuk alü kamkhinü ahihkhüh amuzho rüngde akambah, 13#Mt 10.22tüshe shepünü akheam khiungde arümbanü akhümkhitbah. 14Tüsho ha kiulongthsü thiyusheak-atsü alomiküp alala ching thiyumütsan thsüde trükshih alala ki thsangyuthsangrabah, tüsho jushu akheam arübah.

Thsümütsü-ato

(Mk 13.14-23; Lk 21.20-24)

15“Jumonü küyimki nüsanü, Daniel wukihrü hode athakhi athsümünimshihbe athraneanbe amüsüh dangpung ching zhipde angübanü–akherünü anikhitshang– 16judüki Judea ching larü müzüngbo ching tsoshang. 17#Lk 17.31Shepü thüyammün kheak lanü api yam chingnü tümükhüh lupü düyüki. 18Tüsho shepü thulu ching lanü nihbuh khimmih lupü alode düyü. 19Tüshe jurü nimungbo ching mübünkeangde alarübo tüsho khungarü niuh duhde alarübo ayokhe! 20Tüsho nüsa tsopü ju tsüngkam yungsho Amuni müthsüpü tamkhüntamnüang. 21#Ami 7.14Tümüde judüki alomiküp tankihbah ha kim khiungde mülakhi yungsho küyimkishe mülalopü lakhi thsümütsüato labah. 22Jurü nimungbo mükhikkheamkhülaa, sheshe rhangdung mülade alabah, tüshe amokhitrübo thsülimnü jurü nimungbo khikkheamjihbah. 23Khürünü nüsa ki ‘Kheahang, ha kheak Khrista lah!’ yungsho ‘Ju ching api lah!’ de thasho ju dükin. 24Tümütüsho arükchih Khristabo tüsho arükchih wukihrübo akhiukbah tüsho kuksho amokhitrü she bede mülapyukpü amütsan atobe tüsho amüyinsahbebo rhimobah. 25Kheahang inü nüsa ki amüngühnü thado. 26#Lk 17.23,24Jumonü arünü nüsa ki, ‘Kheahang, api loshelo ching lah!’ de thasho duwukhiuk; yungsho ‘Kheahang, api alungbe khiungshakbo ching lah!’ de thasho ju dükin. 27Tümüde aniakhiuklimnü chinchobe arübah aniyüzahlim phürapa yüshihkhi nangde Mihtsürü Tsührü arükhi labah. 28#Lk 17.37Tümütüsho kürü ching ashemibo abanü, ju ching müleangbo shomukhungbah.

Mihtsürü Tsührü Arüpü

(Mk 13.24-27; Lk 21.25-28)

29 # Ami 6.12; Ami 6.13 “Jurü nimungbo ching thsümütsü-ato dunglim yanalünde ani mitingde akambah, tüsho khinunü ayin müjihde akambah; thüning chingnü chiningbo keamkhibah, tüsho thüning sühmühbo niukbah. 30#Ami 1.7Judüki Mihtsürü Tsührü amütsan thüning ching akhiukbah, tüsho alomi trük alalanü atripbah, tüsho arünü Mihtsürü Tsührü thüning kheak amo ching wu tüsho müretah ato ching arükhi ngübah. 31Apinü api yunirübo hulipungpung düsheak atonü mütde ayüshihbah, tüsho arünü api yo amokhitrübo alomi akheamnü khülim khiungde thrip phüyi chingnü abemukhungbah.

Khubasodung chingnü Anikhitbe

(Mk 13.28-31; Lk 21.29-33)

32“Kheakü khubasodung chingnü amütsan ha anikhitang: Küyimki adübit chinde ayü akhiukbanü, muzhu thünindo de nüsanü mükheahchoh. 33Junangde küyimki nüsanü harü alala ngübanü, api khimdopü ki thüninde lah de mükheahang. 34Atsütsü inü nüsa ki thachoh, harü alala müdünjiyikia ha lün hode mutso. 35Thüning tüsho alomi hode atsobah, tüshe I yubo a küyimkishe hode mutso.

Nimung tüsho Kim Shenü she Mümükheah

(Mk 13.32-37; Lk 17.26-30,34-36)

36“Tüshe ju nimung tüsho kim ju Abuh kheak hode, yinmi yunirübo yungsho atsührü yungsho shenü she mümükheah. 37Noa nimungbo ching nangde, Mihtsürü Tsührü arükhi labah. 38Tümütüsho keking müngüh nimungbo ching arünü Noanü sangkung ching yüzahkhi nimung khiungde tsühyungde tüsho yamkhün thsüde alakheah; 39tüsho keking arübah arü alala hande mutsoyi khiungde mümükheah, junangde Mihtsürü Tsührü arükhi labah. 40Mihtsürü mahne thulu ching labah; khülang bea lubah tüsho khülang bahjihbah. 41Aliberü mahne thsam ching hi chude alabah; khülang bea lubah tüsho khülang bahjihbah. 42Jumonü kurhangde lang, tümütüsho nüsa Atungpuh arüpü kim nüsanü mümükheah. 43#Lk 12.39,40Tüshe ha mükheahang, thüyam putungrünü ahührü arüpü kim mükheahkhülaa, apinü aheangde alabah tüsho api yam müchakashungshihpü lakheah. 44Jumonü nüsa she atündoang, tümüde nüsanü amülümkhi kim khülang ching Mihtsürü Tsührü arübah.

Akin-lakhi yungsho Akin-mülakhi Yamlarü

(Lk 12.41-48)

45“Judüasho nihbuh putungrünü arü kilim kim dükdü ching tsühyungbe jihshihpü api yamlarübo kurungkheak zojihkhi akin-lakhi tüsho lümlung lakhi yamlarü ju she a? 46Nihbuh putungrü arüchoki, ju rhimode alakhi ngürü yamlarü asühpü. 47Atsütsü inü nüsa ki thachoh, apinü anihbuh kukrukbo alala kurungkheak api zojihbah. 48Tüshe ju yamlarü mihbukmuyuk lasho tüsho nihbuh küdahnü, ‘I putungrü arüpü ruhde lah’ de thasho, 49tüsho rukhüh yamlarübo lakpü tankihsho tüsho amüshangrü lung tsühyungsho, 50yamlarü putungrü ju apinü amülümkhi nimung tüsho mümükheahkhi kim khülang ching arübah, 51api adütre kamde akhapnakbah tüsho yiuhkhaprü lung chamyukjihbah. Ju ching atripkhi tüsho hü mütrütkhi labah.

Currently Selected:

MATHI 24: YIMCBSI

Highlight

Copy