MATHI 23

Yakzan Thsangyurü tüsho Pharisirü dünkheak

(Mk 12.38-39; Lk 11.43,46; 20.45-46)

1Judüki Jisunü botobo tüsho api jingyanrübo ki tha: 2“Yakzan thsangyurübo tüsho Pharisirübonü Mosa binkiu kheak binchoh. 3Jumonü nüsanü arü ki mihyuaniang tüsho arünü nüsa ki thakhi lüpdükhi rhimoang; tüshe arünü arhimokhi dürhimo, tümüde arünü tümü thsangyuthsangrachonü ju mürhimochoh. 4Tümüde arünü hah amülangbo rhükchoh tüsho mihtsürübo dubuh kheak yihkihjihchoh, tüshe jurü hanrungpü yingkhing khülang she mülüplüpne. 5#Mt 6.1Arünü mihtsürübonü angüshihpü thsüde arü rhimo alala thsüchoh; tümüde arünü kingkang kheak rümbe tode tüsho khimmüngam shangde zochoh; 6tüsho arünü aniojikhi ching wüntre dangpung tüsho sinagogbo ching atsüdak binkiubo mükühchoh; 7arünü yinzüyindo dangpungbo ching salüm jihshihpü tüsho mihtsürübonü arü ki thsangyurü de jishihnechoh. 8Tüshe nüsa ki a thsangyurü de müji, tümüde nüsa thsangyurü khülang lah, tüsho nüsa alala keoniorü ah. 9Tüsho alomi ching mihtsürü she ki she abuh de düji, tümüde yinmi ching nüsa Abuh khülang lah. 10Yungsho limberü de düji, tümüde nüsa limberü khülang Khrista lah. 11#Mt 20.26,27; Mk 9.35; 10.43,44; Lk 22.26Nüsa bolung shepü atobe lanü nüsa tankihrü thsübah; 12#Lk 14.11; 18.14shepünü aküdah thsüde shuhkihchonü aninibe kambah, tüsho shepünü aküdah thsüde aninibe kamchonü anihbuh shuhkihbah.

Jisunü Yiuhkhaprü Bahyukkhi

(Mk 12.40; Lk 11.39-42,44,52; 20.47)

13“Tüshe nüsa yakzan thsangyurübo tüsho Pharisirü, yiuhkhaprübo are! Tümüde nüsanü mihtsürübo azhihde yinmi kiulongthsü rihdo; tümütüsho nüsanü müyüzah yungsho ayüzahpü larü she müyüzahshih. 14Nüsa yakzan thsangyurübo tüsho Pharisirü, yiuhkhaprübo are! Tümüde nüsanü khimoberü yambo thsümünimchoh, tüsho rük thsüde ashangshang tamkhüntamnüchoh. Jumonü nüsa thsümüchi amütsübe lah. 15Nüsa yakzan thsangyurübo tüsho Pharisirü, yiuhkhaprübo are! Tümüde nüsanü mihtsürü khülang mulong müthrishihpü alomi tüsho keto hode tsahchoh, tüsho küyimki nüsanü api kukbanü, api ju nüsa kheaknü alü athsümüchi tsührü kamshihchoh.

16“Nüsa müktukrü limberübo, are! Nüsanü thachoh, ‘Khürünü arüngyam tamde thiyuchihchimsho, ju tümü müthsü; tüshe khürünü arüngyam suna tamde thiyuchihchimsho, anihbuh thiyuchihchimnü api rhüka lah.’ 17Nüsa müktukrü makharübo! Suna le suna müsühkhitkhi arüngyam shepü atobe a? 18Kheaküshe nüsanü thsangyuchoh, ‘Khürünü kingaün sadam tamde thiyuchihchimsho, ju tümü müthsü; tüshe khürünü ju kheak lakhi thsambah tamde thiyuchihchimsho, anihbuh thiyuchihchimnü api rhüka lah.’ 19Nüsa müktukrübo! Suna le thsambah müsühkhitkhi kingaün sadam shepü atobe a? 20Jumonü shepünü kingaün sadam tamde thiyuchihchimchonü, ju le ju kheak lakhi alala tamde thiyuchihchimchoh. 21Shepünü arüngyam tamde thiyuchihchimchonü, ju le ju ching labuh tamde thiyuchihchimchoh. 22#Mt 5.34Tüsho shepünü yinmi tamde thiyuchihchimchonü, Thrünpuh kiulongthsü-binkiu tüsho ju kheak binbuh tamde thiyuchihchimchoh.

23“Nüsa yakzan thsangyurübo tüsho Pharisirü, yiuhkhaprübo, are! Nüsanü rhümthünea wokephüyak, ningpürang tüsho khiungün thürü shihcham jihchoh, tüshe nüsanü adungtobe yakzan thiyuro, mihmüthsüm tüsho akin bahyuk. Püpü ju she mübahyukde nüsanü harü rhimopü lado. 24Nüsa müktukrü limberübo! Nüsanü somünak changkhitchoh tüshe kemel a muyuchoh.

25“Nüsa yakzan thsangyurübo tüsho Pharisirü, yiuhkhaprübo are! Tümüde nüsanü nüsa pung tüsho phuru aleanglim müsühchoh, tüshe alunglim a tsühneyungne tüsho athsümünimnü milah. 26Nüsa müktukrü Pharisirübo! Akhuhde pung tüsho phuru alunglim müsühang, tüsho aleanglim she müsühde akambah.

27 # Yunir 23.3 “Nüsa yakzan thsangyurübo tüsho Pharisirü, yiuhkhaprübo are! Nüsa ju aleanglim akheahakhamkhi tüshe alunglim a asherü roreang tüsho amümüsüh lüpdükhinü mide alakhi amüye kiuyukbo nangde lah. 28Junangde aleanglim a nüsa ju thiyuro-lungki mihtsürü nangde huhchoh tüshe alunglim a nüsa yiuhkhapkhi tüsho mihbukmuyuknü mide lah.

Thsümüchi Arüpü Thakhi

(Lk 11.47-51)

29“Nüsa yakzan thsangyurübo tüsho Pharisirü, yiuhkhaprübo are! Tümütüsho nüsanü wukihrü kiuyukbo thsüchoh tüsho thiyuro-lungkirü mümih-lungbo züt thsüchoh, 30tüsho thachoh, ‘Isa jipürü nimungbo ching isa lakhülaa, wukihrü laksahrü bolung isa a mübea labah.’ 31Jumonü nüsa ju wukihrübo laksahrü tsührübo ah de nüsa azhihde nüsa thiyumütsanbo lah. 32Dale nüsa jipürünü atankihkhi atsamabahang. 33#Mt 3.7; 12.34; Lk 3.7Nüsa phurutobo, phuruto tsührübo! Athsümüchi chingnü nüsanü küde thsah atsokhitpü? 34Jumonü inü nüsa kilim wukihrübo, lümlung larü mihtsürübo, tüsho yakzan thsangyurübo thiyibah: nüsanü khürü laksahbah tüsho ayümkihbah, tüsho khürü nüsa yo sinagogbo ching rhapbah tüsho kiuto chingnü kiuto khiungde athsümüchibah, 35junangde thiyuro-lungkirü Abel thiyih kheaknü nüsanü arüngyam le kingaün sadam dükeak laksahkhi Berekia tsührü Zekaria thiyih khiungde, alomi ching thiyuro-lungkirü thiyih bukkhi alala nüsa kheak arübah. 36Atsütsü inü nüsa ki thachoh, harü alala ha lünkhe kheak arübah.

Jisunü Jirusalem Muzhokhi

(Lk 13.34-35)

37“O Jirusalem, Jirusalem, shepünü wukihrübo laksah tüsho anihbe kilim yüshihrü lungnü rusahkhea! Thunu dretonü ajipjipbo aghidükeang khüp bemukhungkhi nangde, küdükhüh ki lang inü nü tsührübo bemukhungpü künkhea, tüshe nünü mümulong! 38Kheahang! Nü yam bahyuka zhikrangkhündo lah; 39tümüde nünü, ‘Shepü Atungpuh mung ching arüchonü müngühmühi’ de müthayikia nünü I müngülo.”

Currently Selected:

MATHI 23: YIMCBSI

Highlight

Copy