MATHI 22

Arhangrü Thünio Shihdanglimyu

(Lk 14.15-24)

1Jisunü kheaküshe arü ki shihdanglimyubo chingnü tha: 2“Yinmi kiulongthsü ju ha kiphahlah. Kiulongthsürü khürünü api tsührü thsungkheak yamkhün kamkhi thünio thsakham, 3tüsho apinü thünio ching jiyukrü jishihpü ayamlarübo yüshih tüshe arübonü arochih. 4Kheaküshe apinü yamlarü püpürü thiyia yüshih, ‘Ajiyukrübo ki thaang, “Kheahang, inü jimpung thsakhamlah; I moshipungbo tüsho ashih-kihkhi moshibo laksahdo, tüsho lüpdükhi thsakhamlah. Arhangrü thünio ching arang.” 5Tüshe arünü ju süpsüpde lüm tüsho khülangnü nihbuh lu ching tüsho püpürünü nihbuh rhimo ching de yüabah. 6Aningkhinü api yamlarübo rama shik tüsho arü laksah. 7Ju sobah kiulongthsüpuhnü bukakhiuk; apinü anihbuh bonungrübo yüshihbah mihkhukrübo dükheakshih tüsho arü kiuto takabahshih. 8Judüki apinü ayamlarübo ki tha, “Arhangrü thünio thsakhambah lah, tüshe sherübo jiyukkheanü müthülünde alakheah. 9Jumonü kiudunglimrobo ching yüang, tüsho nüsanü küdükhüh ngübanü, thünio ching jiyukang.” 10Junangde yamlarübonü kiudunglimrobo ching yü tüsho arünü angükhi amütsü tüsho atsü chido rukhüh bemukhung. Tüsho arhangrü yam ju hanrünü mide kam.

11Tüshe küyimki kiulongthsüpuhnü hanrübo kheahpü arükhea, apinü ju ching mihtsürü khülang arhangrü khimmih müyihde ngü. 12Jumonü apinü anihbuh ki tha, “Müyambuh, arhangrü khimmih müyihde küde thsah ha ching azahkhea?” Tüsho apinü sheak makhiuk. 13#Mt 8.12; 25.30; Lk 13.28Judüki kiulongthsüpuhnü yamlarübo ki tha, “Api khah tüsho jing rhükbah bede tsoang, tüsho wungdo amiting ching bahang; ju ching atripkhi tüsho hü mütrütkhi labah.” 14Tüsho Jisunü akheam thsüde tha, “Ahihdo jiyuk, tüshe anükhüh lang mokhita lah.”

Ruk Jihkhi dünkheak Keokhikhi

(Mk 12.13-17; Lk 20.20-26)

15Judüki Pharisirübonü yü tüsho anihbuh yubo chingnü api phuhpü lümkhibo thsü. 16Tüsho arünü api kilim arü jingyanrü bolung Herod borü yüshihde tha, “Thsangyurü, nü thiyuro, tüsho thiyuro ching Thrünpuh limro thsangyuchoh de isanü mükheahlah; yungsho nünü she dünkheak kümkanga müla; tümüde nünü mihtsürü kheyuka müla. 17Jumonü nünü tümü lümlanü isa ki thaang? Kaesar kilim ruk jihpü alim a shi yung?” 18Tüshe Jisunü arü lümkhi amütsü mükheahbah tha, “Nüsa yiuhkhaprübo, tümüde nüsanü rükakicho? 19Ruk jihpü lakhi shonak I ki huhang!” Arünü api kilim adholi 1 ludarü, 20tüsho apinü arü ki keo, “Ha she miro tüsho mung a?” 21Arünü alo, “Kaesar ah.” Tüsho apinü arü ki tha, “Jumonü küju Kaesar yoanü Kaesar kilim jihang, tüsho küju Thrünpuh yoanü Thrünpuh kilim jihang.” 22Küyimki arünü ju sokhea, arünü müyinsah tüsho api bahbah tsoabah.

Arhang Kamlodarükhi dünkheak Keokhikhi

(Mk 12.18-27; Lk 20.27-40)

23 # Yunir 23.8 Ju nimung arhang kamlodarükhi müla de atharü Sadukirü api ki arübah keokhi. 24Arünü tha, “Thsangyurü, mihtsürü khülang tsührü mülade shesho, aniurünü aniube ju alubah tüsho api thsung thsüde tsührübo lashihbah de Mosanü isa ki thakheah. 25Kheakü isa bolung keoniorü thüne lakheah. Adüjibuh ju yamkhün thsü tüsho sheabah, tüsho api tsührü mülakhinü aniube ju aniurü kilim zojih. 26Mahnepü le mahsampü tüsho athünepü khiungde ju ruk dünji. 27Akheam ching alibe ju sheabah. 28Dale tüsho arü alalanü alibe lukheale arhang kamlodarüchoki alibe ju arü thüne bolung shepü niube thsüba?”

29Jisunü arü ki alo, “Nüsanü amüsühyu yungsho Thrünpuh wu mümükheahde lakmihdo. 30Tümütüsho arhang kamlodarükhi ching arünü yamkhün müthsü, tüshe yinmi ching Thrünpuh yunirübo nangde alabah. 31Tüsho asherü arhang kamlopü thsungkheaknü, Thrünpuhnü nüsa ki thakhi mükheakheah de, 32‘I Abraham Thrünpuh, Isak Thrünpuh tüsho Jakob Thrünpuh’? Api ju asherü yo yung tüshe arhang larü Thrünpuh ah.” 33Tüsho küyimki botonü ju sokhea, arünü api thsangyukhi müyinsah.

Thiyuzüng Atobe

(Mk 12.28-34; Lk 10.25-28)

34Tüshe küyimki apinü Sadukirü zhikde akamshihkhi Pharisirünü asokhea, arünü rukhüh mukhung. 35Tüsho arü bolung mahkhaprü khülangnü api ki rükakide keokhi, 36“Thsangyurü, yakzan ching thiyuzüng küpü atobe a?” 37Jisunü alo, “Nü mulong athrünkhinü, nü me athrünkhinü, tüsho nü lümkhi athrünkhinü Atungpuh nü Thrünpuh muzhoang. 38Ha thiyuzüng atobe tüsho akhuhbe lah. 39Tüsho mahnepü ju, ‘Nünü nü yamhingrü ki nihbuh nangde muzhoang.’ 40#Lk 10.25-28Ha yuzüng mahne kheak yakzan tüsho wukihrübo alalanü angükihlah.”

Messia dünkheak Keokhikhi

(Mk 12.35-37; Lk 20.41-44)

41Küyimki Pharisirübo rukhüh mukhungkhea, Jisunü arü ki keokhi, 42“Nüsanü Khrista dünkheak tümü lümcho? Api shepü tsührü a?” Arünü api ki alo, “David tsührü ah.” 43Apinü arü ki tha, “Dale tüsho küde thsah Davidnü me chingnü api ki ‘Atungpuh’ de ajikhea:

44Atungpuhnü I Tungpuh ki tha:

Inü nü riribo nü jing-thrümpung mükamshihyi khiungde

I khah tsülim binang?

45Davidnü api ki ‘Atungpuh’ de jisho, küde thsah api ju atsührü thsüpü?” 46Tüsho shenü she api ki thiyu khülang she malokhuk, yungsho ju nimungnü shenü she api ki mükeokhidebah.

Currently Selected:

MATHI 22: YIMCBSI

Highlight

Copy