MATHI 21

Akuk Ngüde Yüzahkhi

(Mk 11.1-11; Lk 19.28-40; Jhn 12.12-19)

1Küyimki arünü Jirusalem thüninde arübah Oliv Müzüng ching lakhi Bethphage khiungkhea, Jisunü jingyanrü mahne thiyide, 2ane ki tha, “Nüke müngüh lakhi kiulong ching ju yüzahang, tüsho nükenü nahdü lang donki khülang anunu bede chinga ngübah. June trünang tüsho I kilim bebah arang. 3Khürünü nüke ki tümükhüh thasho, Atungpuhnü arü yihnüpü lah de api ki thaang, tüsho apinü nahde arüshihbah.” 4Ha alala wukihrünü athakhi dünjipü lakheah:

5“Zion tsührübe ki thaang,

‘Kheahang, nü kiulongthsüpuh, azhihayihde donki kheak,

donki nunu kheak binbah arüchoh.’ ”

6Jingyanrübonü yü tüsho Jisunü arü ki thakhi nangde rhimo. 7Arünü donki tüsho anunu bede arübah arü khimbo phukih, tüsho Jisunü ju kheak bin. 8Tüsho yimto atonü arü khimbo limro kheak khima zo; püpürübonü sangdungbo kheaknü akhahbo ngamkhia limro kheak khima zojih. 9Judüki müngühlim yükhi tüsho dunglim yankhi botonü zhide tha: “Hosanna, David tsührü! Shepü Atungpuh mung chingnü arüchonü müngühmühi thsang! Achangbe chingnü shiang!” 10Küyimki Jisu ju Jirusalem ching yüzahkhea, kiuto abümnü arhunganimde tha, “Ha Shepü a?” 11Tüsho botonü alo, “Ha Galilee ching lakhi Nazareth chingnü wukihrü Jisu ah.”

Jisunü Arüngyam Müsühkhi

(Mk 11.15-19; Lk 19.45-48; Jhn 2.13-22)

12Judüki Jisunü arüngyam ching yüzahbah shothsümolorü alala yankhit tüsho sho müthriachihrü dükhümbo le müthrithrümpü yinrü binkiubo lahyuka bahjih. 13Tüsho apinü arü ki tha, “Ha thrüta lah, ‘I yam ki tamkhüntamnü yam de ajibah,’ tüshe nüsanü jangkhijangrarü jikpung kamshihchoh.”

14Müktukrü le jingkikrü arüngyam ching api kilim arü, tüsho apinü arü thsüngu. 15Tüshe apinü amüyinsahbebo rhimokhi tüsho “Hosanna David tsührü” de azürübonü arüngyam ching zhikhi amükeam putungrübo tüsho yakzan thsangyurübonü ngübah arü bukakhiuk. 16Tüsho arünü api ki tha, “Harü tümü thachonü nünü socho shi?” Jisunü tha, “Am; ‘Khungarübo tüsho niuhdukrübo mün chingnü nü khiukdahde shijihkhi lah’ de athakhi nüsanü mükherhak de?” 17Tüsho apinü arü bahjihbah kiuto chingnü Bethani lim wukhiuk tüsho ju ching yap.

Jisunü Khubasodung Athrukhi

(Mk 11.12-14,20-24)

18Yapsu kiuto lim alode arüchoki, api khümde alakheah. 19Limmungyean khubasodung zhipde ngübah apinü yü, tüsho ju kheak tümü müngü tüshe ayübo lang alakheah. Tüsho apinü ju ki tha, “Küyimkishe nü kheaknü aso dasolo!” Tüsho judüchokinü khubasodung ju yiuhabah. 20Küyimki jingyanrübonü ha ngükheanü müyinsahde tha, “Küde thsah khülangkinü khubasodung yiuh-a la?” 21#Mt 17.20; 1 Kor 13.2Tüsho Jisunü arü ki alo, “Atsütsü inü nüsa ki thachoh, nüsa akin lasho tüsho mudukiuhlosho, khubasodung kheak rhimokhi lang nüsanü mürhimo tüshe ‘Ha shuh-a keto ching jipa bahang’ de ha müzüng ki thasho, ju arhimobah. 22Tüsho nüsanü tümüpürü tamkhüntamnüde akheangbanü, nüsa akin lasho nüsanü angübah.”

Jisu Thiyukhüm-sühmüh Keokhikhi

(Mk 11.27-33; Lk 20.1-8)

23Küyimki api arüngyam ching yüzahkhea, amükeam putungrübo tüsho mihtsürü azothsürübo api thsangyude alachoki arü tüsho tha, “Tümü thiyukhüm-sühmüh hode nünü harü alala rhimocho? Tüsho ha thiyukhüm-sühmüh nü kilim shenü ajihkhea?” 24Tüshe Jisunü arü ki alo tüsho tha, “Inü she nüsa ki khülang keokhianü, ju nüsanü I ki thasho tümü thiyukhüm-sühmüh hode harü rhimochonü inü nüsa ki thabah: 25Johannü baptikhi ju küchingnü a? Yinmi chingnü a shi mihtsürübo kilimnü a?” Tüsho arünü arü bolung lümde thaachih, “Isanü, ‘Yinmi chingnü,’ de thasho, apinü isa ki thabah, ‘Dale tüsho tümüde nüsanü api mükinkhea?’ 26Tüshe isanü, ‘Mihtsürübo kilimnü,’ de thasho, isanü boto trelah, tümütüsho alalanü Johan ju wukihrü khejihde lah.” 27Jumonü arünü Jisu ki alo, “Isanü mümükheah.” Tüsho apinü arü ki tha, “Dale tüsho tümü thiyukhümsühmüh hode inü harü rhimochonü inü nüsa ki mütha.

Tsührü Mahne Shihdanglimyu

28“Nüsanü tümü lümcho? Mihtsürü khülang tsührü mahne lakheah; tüsho apinü adüjibuh ki yübah tha, ‘I tsah-a, yüang tüsho khihni kurungasolu ching rhimoang.’ 29Tüsho apinü alo, ‘I a muh’; tüshe ju dunglim lümlobah yü. 30Tüsho apinü mahnepü ki yübah ju ruk tha; tüsho apinü alo, ‘He, atobuh,’ tüshe apinü müyü. 31Mahne bolung shepünü abuhnü alümkhi rhimokhea?” Arünü alo, “Akhuhbuhnü.” Jisunü arü ki tha, “Atsütsü inü nüsa ki thachoh, ruk-threrü tüsho müzammüramrübo nüsa müngühnü Thrünpuh kiulongthsü ching yüchoh. 32#Lk 3.12; 7.29,30Tümüde thiyuro-lungki limro ching Johan nüsa kilim arü, tüsho nüsanü api kheak akin müla, tüshe ruk-threrübo tüsho müzammüramrübonü api kheak akin la; tüsho nüsanü ha ngü dunglim she nüsa mulong mümüthri tüsho api kheak mükin.

Kurungasolu-thsürü Shihdanglimyu

(Mk 12.1-12; Lk 20.9-19)

33“Shihdanglimyu püpü: Kurungasolu putungrü khülang lakheah. Apinü ju mükamde shahwün ayün, ju ching anitpung kiu tüsho aheangsadam khülang thsü. Judüki apinü kurungasolu ju thulu-thsürü khürü kilim amüche jihbah hantsah yü. 34Küyimki yimlupü kim khiungkhea, apinü thulu-mücherü kilim yimlukhi chingnü shihcham lupü ayamlarübo yüshih; 35Thulu-mücherünü api yamlarübo ram; arünü khülang lak, püpü laksah, tüsho asampü ju lungnü king. 36Kheaküshe apinü yamlarü püpürü akhuhbe kheaknü alü thsüde yüshih; tüsho arünü ju ruk lang arü kheak rhimo. 37Ju dunglim apinü arü kilim, ‘Arünü I tsührü wüntre jihbah,’ de thade yüshih. 38Tüshe küyimki thulu-mücherübonü atsührü ju angükhea, arü khülangnü khülang ki thaachih, ‘Ha yamrüplurüp lubuh ah; arang, isanü api laksahanü tüsho api yamrüplurüp luanü.’ 39Arünü api bea lubah kurungasolu chingnü yankhit, tüsho api laksah. 40Jumonü küyimki kurungasolu putungrü arübanü, apinü thulu-mücherübo kheak tümü thsüba?” 41Arünü alo, “Apinü jurü amütsürü thsümüchide asheshihbah, tüsho yimlu kim ching api hi shihcham jihshihpü thsüde kurungasolu ju thulu-mücherü püpürü kilim jihbah.”

42Jisunü arü ki tha, “Nüsanü amüsühyubo ching mükheakheah de:

‘Thüyam-thsürünü abahyukkhi lung ju amühit-lung kamdo;

Atungpuhnü ha rhimodo, tüsho ha isa mük ki amüyinsahbe lah’?

43“Jumonü inü nüsa ki thachoh, yinmi kiulongthsü ju nüsa kheaknü luakhinbah tüsho aso asoshihpü mihtsürübo kilim jihabahbah. 44Tüsho sherü ha lungmi kheak keambanü adütre kamde adannakbah; tüshe sherü kheak ha lung keambanü adübün kamde azünakbah.”

45Küyimki amükeam putungrü tüsho Pharisirübonü api yo shihdanglimyubo sokhea, apinü arü dünkheak thachoh de mükheah. 46Tüshe arünü api rampü mürangchoki, arünü botobo tre, tümütüsho arünü api ju wukihrü khülang khejih.

Currently Selected:

MATHI 21: YIMCBSI

Highlight

Copy