MATHI 20

Kurungasolu ching Rhimorübo

1“Tümütüsho yinmi kiulongthsü ju yapsu mükikde wukhiukbah api yo kurungasolu thsungkheak rhimopü rhimorü mulokhi thüyam putungrü kiphahlah. 2Küyimki apinü rhimorübo ki nimung mihkhah dün adholi 1 jihpü mulongbanü arübo api yo kurungasolu ching yüshihchoh. 3Apinü 9 king ngüm yü tüsho püpürü yinzüyindopung ching sühdukde azhipkhi ngü, 4tüsho arü ki tha, ‘Nüsa she kurungasolu ching yüang, tüsho tümü dünbanü inü nüsa kilim jihbah.’ Tüsho arünü yü. 5Kheaküshe apinü 12 tüsho 3 king ngüm she jude thsü. 6Tüsho apinü 5 king ngüm yü tüsho püpürü sühdukde azhipkhi ngü, tüsho apinü arü ki tha, ‘Tümü thsüde nüsa nimung amuyung ha kheak sühdukde azhipkhea?’ 7Arünü api ki alo, ‘Tümütüsho shenü isa mümulo.’ Apinü arü ki tha, ‘Nüsa she kurungasolu ching yüang.’ 8Jumonü küyimki arelim kamkhea, kurungasolu putungpuhnü api kimthsübuh ki tha, ‘Rhimorübo jiang, tüsho ashurünü akhuhrü khiungde arü mihkhah dün jihang.’ 9Tüsho sherü 5 king ching rhimo tankihkheanü mihbüm aban adholi 1 jih. 10Tüshe küyimki akhuhrü arükheanü, arünü alü ngüpü mükkin thsü. Tüshe arü she abande adholi 1 jih. 11Küyimki arünü ju leangkhikheanü alo putungpuh azhihde atsang, 12‘Ashu mihtsürübonü kimkhü 1 lang rhimo, tüsho isa nimung amuyung aninü phude arhimorü lung arübo rukhüh kamshihdo.’ 13Tüshe apinü arü khülang ki alo, ‘Müyambuh, inü nü ki amülim mürhimo; adholi 1 thsungkheak nünü I ki alokhikhi yung de? 14Nü yo tümü lanü luang, tüsho tsoang; nü ki jihkhi nangde ashu mihtsürü ki she ajihpü inü mulonglah. 15Inü I kukruk kheak I lümkhi rhimopü I alim yung de? Yungsho I salamo nüsanü lungkhangla de?’ 16#Mt 19.30; Mk 10.31; Lk 13.30Junangde ashurü ju akhuhrü kambah, tüsho akhuhrü ju ashurü kambah.”

Jisunü Api Shepü Mahsam Kipü Thakhi

(Mk 10.32-34; Lk 18.31-34)

17Judüki Jisunü Jirusalem lim wutuchoki jingyanrü thürükheak mahne ju limro mungyean behuhbah arü ki tha, 18“Kheahang, isa Jirusalem lim wutuchoh, tüsho Mihtsürü Tsührü ju amükeam putungrü le yakzan thsangyurübo kilim thsungyuka jihbah; tüsho arünü api sheshihpü bahyukbah, 19tüsho mükhemükimshihpü, arhapshihpü tüsho ayümkihshihpü khiungkerü kilim jihbah.”

Berünü Mushukhi

(Mk 10.35-45)

20Judüki Zebedee tsührübo abe, atsührübo bebah api ki arübah khukning tüsho api kilimnü tümükhüh kheang. 21Tüsho apinü alibe ki tha, “Nü tümü lunela?” Alibenü api ki alo, “I tsührü mahne ha nü kiulongthsü ching khülang nü khah tsülim tüsho püpü nü khah huzulim binpü mülüjang.” 22Tüshe Jisunü arü ki tha, “Nüsanü tümü keokhichonü nüsanü mümükheah. Inü ayungpü lakhi pung nüsanü ayungkhukba shi?” Arünü api ki alo, “Isanü akukbah.” 23Apinü arü ki tha, “Nüsanü I pung chingnü ayungbah, tüshe I khah tsülim yungsho huzulim binpü a inü amülübe yung, tüshe harü ju I Buhnü athsakhamjihrü thsungkheak lah.” 24Küyimki jingyanrü thürünü ha dünkheak sokhea, keoniorü mahne kheak arünü bukakhiuk. 25#Lk 22.25,26Jisunü arü rukhüh jimukhung tüsho tha, “Khiungkerü yakzanshuhrübonü arü kurungkheak atungrü thsülah tüsho arü torübonü arü kurungkheak thiyukhümsühmüh ahorichoh de nüsanü mükheahlah. 26#Mt 23.11; Mk 9.35; Lk 22.26Tütüshe nüsa bolung a jude müthsü; tüshe nüsa bolung shepünü atobe kampü künlanü api ju nüsa yamlarü thsüshang. 27Tüsho shepünü nüsa bolung akhuhbuh thsünelanü, api nüsa yo azhorü kamshang– 28Mihtsürü Tsührü she tankihshihpü yung tüshe tankihpü tüsho ahihdo rhokhitpü api rhangdung jihpü arükheah!”

Müktukrü Mahne Thsüngukhi

(Mk 10.46-52; Lk 18.35-43)

29Tüsho arü Jirikho chingnü wukhiukchoki yimto atonü api dunglim yan. 30Tüsho kheahang, limro yean binkhi müktukrü mahnenü Jisu tsahhochoh de sobah zhide tha, “O Atungpuh, David tsührü, ike muzhoang!” 31Judüki botonü ane thürüh tüsho malanpü tha; tüshe anenü alü thsüde zhi, “O Atungpuh, David tsührü, ike muzhoang!” 32Jumonü Jisunü zhikde zhip tüsho ane jibah tha, “Nüke thsungkheak inü tümü rhimoshihnela?” 33Anenü api ki alo, “Atungpuh, ike mükbo khimshuhshihnelah.” 34Jumonü Jisunü muzho tüsho ane mükbo qiu. Judüchokinü anenü ngü, tüsho api dunglim yan.

Currently Selected:

MATHI 20: YIMCBSI

Highlight

Copy