MATHI 19

Yamkhün Müchamachihpü Thsangyukhi

(Mk 10.1-12)

1Küyimki Jisunü harü thakhamkhea, apinü Galilee chingnü chamachih tüsho Jordan hobah Judea lomi ching arü. 2Yimto atonü api dunglim yan, tüsho apinü ju ching arü thsüngujih. 3Pharisirü she api ki arübah rükakide keo, “Mihtsürü khülangnü amütsan khürü dünkheaknü nihbuh niuberü bahpü yakzan la de?” 4Apinü arü ki alo, “Atankih ching shepünü arü thrünkheanü, ‘athrürü tüsho aliberü thrünkheah,’ de nüsanü mükhe de? 5tüsho tha, ‘Ha dünkheaknü athrürünü abuh tüsho abe chamkhibah tüsho aniube lung thsürua labah, tüsho mahne ju shihphü khülang kambah.’ 6Junangde kheaküa ane mahne yung tüshe shihphü khülang ah. Jumonü Thrünpuhnü tümü thsürushihdünü mihtsürünü düchamachih shi.” 7#Mt 5.31Arünü api ki tha, “Dale tümüde abahpü jingyanbe jihpü tüsho alibe tsoshihpü Mosanü thiyukhüm jihkhea?” 8Apinü arü ki alo, “Nüsa mulong müküpkhi hode Mosanü nüsa ki nüsa niuberü bahpü mülükheah, tüshe atankih chingnü a jude müla. 9#Mt 5.32; 1 Kor 7.10,11Tüsho inü nüsa ki thachoh, yüliyürakhi kheak hode shepünü nihbuh niuberü bahbah püpürü luchonü müzammüram yihbeakchoh; tüsho bah-a lakhi liberü shepünü luchonü müzammüram yihbeakchoh.”

10Api jingyanrübonü api ki tha, “Athrürü tüsho api niube dükeak jude lasho, yamkhün müthsükhi atsübe ah.” 11Tüshe apinü alo, “Thrünpuhnü jih-a larü kheak hode alala kheak ha yu mayepü kuklah. 12Tümütüsho khürü a berü buk chingnü dukha zübechoh, tüsho khürü a mihtsürünü athsakhamkhi lah, tüsho khürü a yinmi kiulongthsü dünkheaknü nihbuh küdah thsüde athsakhamkhi lah. Shepünü ha leangkhipü kuklanü leangkhiang.”

Jisunü Azürü Aninibo Müngühjihkhi

(Mk 10.13-16; Lk 18.15-17)

13Judüki arü kheak api khah nimbah tamkhüntamnüshihpü azürü aninibo api ki bedarü, tüshe jingyanrübonü arü thürüh. 14Tüshe Jisunü tha, “Azürü aninibo I kilim arüshang, tüsho arü düyanlo; tümüde yinmi kiulongthsü harü yo ah.” 15Apinü akhahnü arü kheak nim tüsho ju chingnü chamachih.

Alarü Athrününgtsüng

(Mk 10.17-31; Lk 18.18-30)

16Mihtsürü khülang Jisu ki arübah keokhi, “Thsangyurü, akheam müla rhangdung ngüpü inü tümü atsü rhimobea?” 17Jisunü alo, “Tümüde nünü I ki atsü dünkheak keokhicho? Atsü khülang lang lah. Nünü rhangdung lapung ching yüzahnesho, thiyukhümbo zoang.” 18Apinü anihbuh ki tha, “Küpü a?” Tüsho Jisunü alo, “Nünü dülaksah, nünü müzammüram düthsü, nünü dahüh, nünü arükchih thiyumütsan düthsü, 19nü buh tüsho nü be wüntreang, tüsho nünü nü yamhingrü ki nihbuh nangde muzhoang.” 20Athrününgtsüngbuhnü api ki tha, “Harü alala I athunuchokinü rhimodo; kheaküshe I tümünü maban le?” 21Jisunü api ki alo, “Nünü banthsangde kamnesho, yüang, nü yamalobo yinbah zhochihrü kilim jihang, tüsho yinmi ching nü rahpung labah; tüsho arang, I dunglim yanang.” 22Küyimki athrününgtsüngbuhnü ha sokhea, mulong rozhakde api tsoabah; tümüde api lakhit ato lakheah.

23Tüsho Jisunü api jingyanrübo ki tha, “Atsütsü inü nüsa ki thachoh, alarü mihtsürü khülangnü yinmi kiulongthsü ching yüzahpü chaklah. 24Kheaküshe inü nüsa ki thachoh, alarü mihtsürü khülangnü Thrünpuh kiulongthsü ching yüzahpü kheaknü a kemelnü dübean-ku#Amüsühyu yim-hüm ching a Jirusalem chipi ching ‘amütsüm-ripit’ ki thachoh. chingnü chinkhitde ahokhi athülihbe ah.” 25Küyimki jingyanrübonü ha sokhea, arünü khide müyinsah tüsho tha, “Dale tüsho shepü khümkhitba?” 26Tüshe Jisunü arü kheak kheahbah tha, “Mihtsürü thsungkheak ha amukukbe, tüshe Thrünpuh thsungkheak a alala akukbe lah.” 27Judüki Peternü alo, “Kheahang, isanü lüpdükhi bahbah nü dunglim yando. Dale tüsho isa thsungkheak tümü labea?” 28#Mt 25.31; Lk 22.30Jisunü arü ki tha, “Atsütsü inü nüsa ki thachoh, küyimki Mihtsürü Tsührü nihbuh müretahkhi kiulongthsü-binkiu kheak binbanü, nüsa sherü I dunglim yankheanü alomiküp aso ching kiulongthsübinkiu thürükheak mahne kheak Israel trük thürükheak mahne mahkhapde abinbah. 29Tüsho shepünü I mung dünkheaknü thüyambo, khiungmungrü, chiniurü, abuh, abe, tsührübo yungsho alobo bahjihdünü chi kinü alü ngübah tüsho akheam müla rhangdung yamrüplurüp lubah. 30#Mt 20.16; Lk 13.30Tüshe akhuhrü ahihkhüh ashurü kambah, tüsho ashurü ahihkhüh akhuhrü kambah.

Currently Selected:

MATHI 19: YIMCBSI

Highlight

Copy