LEVI 27
27
Atungpuh kilim Thsambah Jihkhi Yakzanbo
1 Atungpuhnü Mosa ki tha: 2Israel mihtsürübo ki thaang: Küyimki khürünü thiyuchihchimde Atungpuh kilim mihtsürü müsühkhitchoki amo dünde akhuarabanü, 3athrürü kam 20 le 60 dükeak arüngyam ching akhukhi yande shotoyinchi 50 dünde akhuang; 4tüsho aliberübo a-sho anihbe dün shotoyinchi 30 akhuang. 5Mihtsürü ju kam 5 le 20 dükeak a-sho, athrürü dün shotoyinchi 20 tüsho aliberü dün shotoyinchi 10 de akhuang. 6Mihtsürü ju khinu 1 le kam 5 dükeak a-sho, athrürü dün shotoyinchi 5 tüsho aliberü dün shotoyinchi 3 de akhuang. 7Mihtsürü ju kam 60nü akumung a-sho, athrürü dün shotoyinchi 15 tüsho aliberü dün shotoyinchi 10 de akhuang.
8Thiyuchihchimpü mihtsürü ju khide zhochihkhi hode adün mode müjihkhuksho, apinü mihtsürü ju amükeambuh ki bedarübah, tüsho mihtsürü junü ajihkhukpü thsüde amükeambuhnü adün keamkhide akhubah.
9Shiwüh khülang Atungpuh kilim kingaünpü hande arüsho, judürü Atungpuh kilim jihbe amüsüh labeah. 10Püpü lung mümüthriachih yungsho atsü müthri amütsü yungsho amütsü müthri atsü de mümüthri; tüsho apinü shiwüh le shiwüh ane müthriachihsho, ane chido amüsüh labeah. 11Tüsho shiwüh ju Atungpuh kilim mükingaünkhi amümüsüh a-sho, mihtsürü junü shiwüh ju amükeambuh kilim handarübah, 12tüsho amükeambuhnü atsü amütsü akede adün ju arün thsüde akhubah. 13Mihtsürü junü rhokhitlopü lümsho, apinü adün akhukhi kheak shihcham phüngü ching khülang yukbah ajihbah.
14Mihtsürü khülangnü nihbuh yam Atungpuh kilim müsühkhitsho, amükeambuhnü atsü yungsho amütsü thsüthsü adün akhubah; amükeambuhnü akhukhi ching arün thsübah. 15Thüyam müsühkhitbuhnü arhokhitlopü lümsho, apinü adün akhukhi kheak sho shihcham phüngü ching khülang yukbah ajihbah, tüsho ju api yo thsübah.
16Mihtsürü khülangnü nihbuh lu shihcham Atungpuh kilim müsühkhitsho, adün ju müjih yukkhi thülünnü akhubah, barli hi tramduhkhüh dün shotoyinchi 50 akhubah. 17Apinü thulu ju Jubilee kam ching müsühkhitsho, adün ju akhuabahkhi lang ayanbah; 18tüshe apinü thulu ju Jubilee dunglim müsühkhitsho, amükeambuhnü sho dün ju arübe Jubilee kam khiungde khebah adün keamkhijihbah. 19Müsühkhitde ajihbuhnü ju rhokhitlopü lümsho, apinü adün akhukhi kheak shihcham phüngü ching khülang yukbah ajihbah tüsho ju api yo thsübah; 20tüshe thulu ju mürhokhitsho, yungsho püpürü ki yina lasho, ju küyimkishe mürhokhitlokhuk. 21Küyimki arübe Jubilee ching thulu ju zuzu kamshihbanü, ju Atungpuh kilim shuhmülanga jihkhi lu amüsüh kambah; ju amükeamrübo yo thsübah.
22Mihtsürü khülangnü yamrüplurüp chingnü yungde nihbuhnü athulokhi thulu Atungpuh kilim müsühkhitsho, 23amükeambuhnü arübe Jubilee kam khebah adün ju akhubah, tüsho adün akhukhi ju apinü ju nimungnü Atungpuh kilim amüsüh kingaün nangde ajihbah. 24Jubilee kam ching thulu ju shepü kheaknü athulokheanü Atungpuh kilim jihlobah.
25Adün akhukhi alala arüngyam ching lakhi shotoyinchi yande alabah: gera 20nü shekel 1 akhubah.
26Akhuhde adrekhi shiwüh ju Atungpuh yo kamabahdo, shenü she dümüsühkhit; moshipung thsüthsü mihnu thsüthsü, ju Atungpuh yo ah. 27Shiwüh ju mümüsühkhi a-sho, apinü adün akhukhi yande rhokhitbah, tüsho ju kheak shihcham phüngü ching khülang yukbah; yungsho ju mürhokhitsho apinü akhukhi yande ayinbah.
28Tüshe mihtsürübonü Atungpuh kilim kingaünkhi, mihtsürü yungsho shiwüh, yungsho yamrüplurüp lukhi thulu thsüthsü, müyinkhuk yungsho mürhokhitkhuk; shuhmülanga jihkhi kukruk abannü Atungpuh kilim khide amüsüh lah. 29Mihtsürü bolungnü thsümünima bahpü akhukhita lakhi mihtsürü ju mürhokhitkhuk, api dükde asheshihbah.
30Alo chingnü akhiukkhi thürü shihcham alala, hi yungsho sangaso thsüthsü, Atungpuh yo ah. Ha Atungpuh kilim amüsüh lah. 31Mihtsürü khürünü nihbuh kingaün shihcham rhokhitnesho, apinü ju ching shihcham phüngü ching khülang yuklobah. 32Tüsho moshi boto le namfimihnu boto shihcham thsungkheaknü küpü namfimihnu neakbuh tso bukkhüp lanü, athürüpü ju Atungpuh miki amüsüh labah. 33Apinü atsü yungsho amütsü dünkheak mükeokhi, yungsho mümüthriachih, apinü zhide lang müthrisho, ane chido Atungpuh yo thsübah, ju mürhokhitkhuk.
34Harü thiyukhümbo ha Israel mihtsürübo thsungkheak Atungpuhnü Mosa kilim Sinai Müzüng kheaknü ajihkhi lah.
Currently Selected:
LEVI 27: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
