LEVI 26
26
Mihyuanikhi thsungkheak Müngühmühi
(Yuzüng 7.12-24; 28.1-14)
1Nüsanü nüsa thsungkheak sangthsü tümü düthsü tüsho sangthsü yungsho dungjing düzhipshih, tüsho khukningde kingaünpü thsüde lung lamkhita nüsa lo ching düzhipshih; tümüde I Atungpuh nüsa Thrünpuh. 2Nüsanü I yo amunibo zoang tüsho I yo amüsüh dangpung wüntreang: I Atungpuh ah.
3Nüsanü I yakzan thsükhibo yansho tüsho I yuzüngbo thiyuronü leangkhisho, 4inü nüsa kilim akheahmünchi ching tsüng arüshihbah, tüsho alonü hi mukhuhshihbah tüsho mütüm sangdungbonü aso asobah. 5Nüsa lu ju khide pung-alungde kurungaso rho khiungde yimlubah, tüsho mükhean kim khiungde kurungaso rhobah; nüsanü atsühnekhi suhdahde angübah tüsho nüsa lo ching nüsa tsokhita labah.
6Inü nüsa lo ching mungtsü lashihbah, tüsho nüsa zuh-a yapbah tüsho shenü nüsa mütreshih; inü lomi ching ahürhang shiwühbo yankhita bahbah, tüsho ju ching keochih mülade akambah. 7Nüsanü nüsa riri yande amüshambah tüsho arübo nüsa müngüh nukshangnü akeamshihbah. 8Nüsa phüngünü chi khülang yande müshambah, tüsho nüsa chi khülangnü chithürü thürü yande müshambah; nüsa riribo nüsa müngüh nukshangnü akeamshihbah. 9Inü nüsa kheak künde akheahbah tüsho nüsa aso asode wüh bushihbah, tüsho inü tangzüngkhi nüsa kheak zobah. 10Nüsanü shangde azokhi hi wün tsühbah tüsho hi aso yukpü thsungkheaknü wukhita bahbah. 11Inü I lapung nüsa bolung zobah, tüsho inü nüsa mübahyuk. 12I nüsa lung tsahbah tüsho nüsa Thrünpuh thsübah, tüsho nüsa I mihtsürü thsübah. 13I Atungpuh nüsa Thrünpuh hode nüsa arü azhorü müthsüshihpü Ijip lomi chingnü bekhit; inü nüsa sangkaplak yihshakjih tüsho langakindo tsahshih.
Mihyumanikhi thsungkheak Thsümüchi
(Yuzüng 28.15-68)
14Tüshe nüsanü I ki manisho, tüsho thiyukhümbo alala müleangkhisho, 15tüsho I yakzan thsükhibo manisho tüsho I yuzüngbo manisho yungsho I yukhümbo alala müleangkhide tangzüngkhi thsümünimsho, 16inü nüsa kheak ha rhimobah: Inü nüsa kheak zukleangnü atrebe handarübah; nüsa mük tukshihpü tüsho rhangdung dükheakshihpü thsüde amungube tukthsü tüsho phütsak arüshihbah. Nüsanü müjih akeangkeang ching hiubah, tümüde nüsa riribonü jurü tsühbah. 17Inü I miro nüsa azhihde akheahbah, tüsho nüsa riribonü nüsa laksahbah, nüsa thraneanrünü nüsa kumung yakzan shuhbah, tüsho nüsa müshamrü mülalashe nüsa alihde atsobah. 18Harübo dünjishu she nüsanü I yu manisho, kheaküshe nüsa neak dünkheak inü thüne ki thsümüchibah. 19Inü nüsa kükheangkhi wu thsümünimjihbah; inü nüsa kumung lakhi thüning yinchi nangde akamshihbah tüsho nüsa bukkhüp lakhi alo ju müwayinchi nangde akamshihbah. 20Nüsa sühmüh akeangkeang ching bahbah, tümütüsho nüsa lonü hi makhiukshih tüsho sangdungbonü aso masojih.
21Kheaküshe nüsanü I azhihsho tüsho I yu manisho, nüsa neak dünkheak thüne ki mutuklode athsümüchibah. 22Inü nüsa azhihde mütüm shiwüh dükhebah, tüsho jurünü nüsa tsührübo nguhsahbah, nüsa yo akam-shiwüh nguhsahbah; arünü nüsa anükhüh lang aningshihbah tüsho nüsa limdungtobo zhikabahshihbah.
23Harü thsümüchishu nüsanü I kilim murholosho tüsho mutuklode I azhihsho, 24inü she nüsa kheak azhihbah, tüsho nüsa neakbo dünkheak inü thüne ki thsümüchibah. 25Nüsanü I kheak tangzüngkhi thsümünimkhi royimlopü inü nüsa kheak nukshang handarübah, tüsho nüsanü nüsa kiutobo ching yüsho, inü nüsa bolung arüm arüshihbah, tüsho nüsa riribo khah ching yüzahshihbah. 26Küyimki inü nüsa tsühyungpü zhimzhakshihbanü, aliberü thürünü yinchi kuk khülang ching yikhap dambah, tüsho arünü adünloa nüsa kipbah; ju nüsanü atsühbah, tüshe bukmüthsü.
27Hade athsüshu she nüsanü I azhihde mükthsüsho, 28inü she I bukakhiukde nüsa kheak mükthsübah; tüsho nüsa neak dünkheaknü thüne ki thsümüchibah. 29Nüsanü nihbuh tsührü le tsührübebo shih tsühbah. 30Achang dangpungbo kheak lakhi nüsa kingaün sadambo inü thsümünimjihbah, arhümthüneabe kingaün sadambo keamshihbah, tüsho nüsa ashemibo rhangdung mülakhi nüsa sangthsübo kheak jipkih-a bahbah; tüsho I menü nüsa thraneanbah. 31Inü nüsa kiutobo akeangkeang kamshihbah tüsho amüsüh dangpungbo zhikabahshihbah, tüsho nüsanü arhümthüneabe kingaünkhi mümünimjih. 32Inü nüsa yingyingbe khungshihbah, tüsho ju ching lapü arürü nüsa riribonü ju ngübah müyinsahbah. 33Inü nüsa trükshih bolung müzütshihbah tüsho nüsa azhihde nukshang thokhitbah; nüsa lo zhikabahbah tüsho kiutobo akeangkeang kambah. 34Nüsabo nüsa riri lomi ching lachoki alo zhikrangkhündo thsümünima lakhi khiungde alonü amunibo leangkhibah; tüsho alonü sühakhimbah tüsho amuni asühde leangkhibah. 35Ju thsümünima yapkhi khiungde sühakhimbah, ha sühakhim ju nüsa ju ching lachoki amunibo ching nüsanü müngükhukkhi sühakhim labah.
36Nüsa sherübo rhangdung lanü nüsa riri lo ching inü nüsa mulong ching trede akamshihbah; sangyü keamkhikhi düsheaknü nüsa tsoshihbah, tüsho nüsabo nukshang müngüh tsokhi nangde atsoshihbah, tüsho nüsabo shenü müyande angaka yapbah. 37Nüsabo shenü müyande, nukshang müngüh tsokhi ruk khülangnü khülang kheak mürhemülüna mülade akambah. 38Lomi bolung nüsa dükheakshihbah, tüsho nüsa riri lonü nüsa tsühabahbah. 39Nüsa sherübo aninga lanü nihbuh neak tüsho jipürü neak dünkheaknü nüsa riri lo ching dükheakbah.
40Tüshe nüsanü nihbuh neak tüsho jipürü neak alokhisho, küpünü I kheak thiyuro mülashihkhea, tüsho I azhihkhea, 41tüsho inü nüsa azhihkhi hode nüsabo thiriri lo ching hande yükhea; nüsa mulong tsütamübahkhi azhihayihde kamsho, tüsho nihbuh neak le azhihde atsahkhi thsüphulosho, 42inü Jakob, Isak tüsho Abraham kheak tangzüngkhi lümkhitbah, tüsho inü alomi lümkhitbah. 43Tüshe arünü alo ju akeangkeang lashihbah, tüsho arübo mülade zhikrangkhündo alachoki amunibo asühde amungbah; arübonü nihbuh neak dün thsüphulobah, tümütüsho arübonü I yakzan tüsho thiyukhümbo bahyuk. 44Tütüshe, arübo arü riri lomi ching lalashe, inü arübo mübahyuk yungsho shahde müthsümünim, tüsho arü kheak inü tangzüngkhi müthsümünim; tümüde I Atungpuh arü Thrünpuh. 45Tüshe arü ki inü arü jipürü kheak tangzüngkhi lümkhitbah, arübo inü trükshih miki Ijip chingnü I arü Thrünpuh thsüpü bekhit: I Atungpuh ah.
46Harü ha Atungpuhnü Sinai Müzüng kheak api tüsho Israel mihtsürübo dükeak Mosa hode ajihkhi yakzan thsükhibo, thiyuzüngbo tüsho yakzanbo ah.
Currently Selected:
LEVI 26: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
