LEVI 25
25
Athünepü Kam
(Yuzüng 15.1-11)
1 Atungpuhnü Sinai Müzüng kheaknü Mosa ki tha, 2Israel mihtsürübo ki thaang, küyimki nüsa inü ajihkhi lomi ching arübanü, alonü Atungpuh thsungkheak amuni mungang. 3Kam thuruk nüsanü thulu ching müjih yukbah, tüsho kurungasolu mupungbah, tüsho asobo hanmukhungbah; 4tüshe kam thünepü ching alo ju Atungpuh miki sühakhimkhi amuni labah. Nüsa lu ching müjih düyuk yungsho kurungasolubo dümupung. 5Aküdah thsüde mukhuhkhi hi she düyimlu, tüsho mümupungkhi kurungasobo dühanmukhung; ha alo thsungkheaknü sühakhimkhi kam ah. 6Mude amungkhi kam ching akhiukkhi ju nüsa, athrürü tüsho aliberü azhorübo, nüsanü amulokhi rhimorübo tüsho nüsa lung larü thsungkheak tsühyungpü labah; 7nüsa akamshiwühbo, thulu ching lakhi mütüm shiwühbo thsungkheak alo chingnü akhiukkhi alala atsühpü labah.
Jubilee Kam
8Nüsanü amuni kambo kheang, thünenü thüne kam; tüsho amuni thüne thsükhi kambo ju kam yirükheak tuku labah. 9Tüsho nüsanü khinu thüne nimung thürü nipü ching Jubilee hulipungpung achangnü müta khiungke lim yüshang; neak dünthsükhipü nimung ching nüsanü hulipungpung müta nüsa lomi alala ching yüshang. 10Tüsho nüsanü kam thünimpü ju müsühkhitbah tüsho lomi ching larübo alala ki zuzu kamkhi zhiyukjihbah. Ha nüsa thsungkheaknü Jubilee labah; tüsho nüsa mihbüm abannü nihbuh lakhitkukrukbo, tüsho nüsa mihbüm abannü nihbuh yamkhün kilim alode arübah. 11Hoju thünimpü kam ju nüsa thsungkheaknü Jubilee labah; ju ching nüsanü müyang, yungsho aküdah thsüde mukhuhkhi müyimlu, yungsho mümupungkhi kurungaso mühanmukhungbeah. 12Tümüde ha Jubilee ah; ha nüsa thsungkheaknü amüsüh labah; nüsanü thulu chingnü akhiukkhi tümü la ju tsühang.
13Ha Jubilee kam ching nüsa mihbüm abannü nihbuh lakhit-kukruk lim alode arübah. 14Tüsho nüsanü yamhingrü ki alo yinsho yungsho nü yamhingrü kheaknü thulosho, khülangnü khülang dümülapyuk. 15Jubilee dunglim kambo ayannü nünü nü yamhingrü kheaknü athulobah, tüsho hi yimlupü aninga lakhi kambo ayannü apinü nü ki yinbah. 16Kambo ju hihsho nünü adün yükihbah, tüsho kambo ju nüksho nünü adün keamkhibah; tümüde apinü kambo ching hi khekhitkhi ayannü nü ki yinjihchoh. 17Jumonü nüsanü khülangnü khülang kheak dümülapyuk, tüshe nüsanü nüsa Thrünpuh wüntreang, tümüde I Atungpuh nüsa Thrünpuh ah.
Kam Athünepü thsungkheak Müngühmühi
18Jumonü nüsanü Atungpuh yakzan thsükhibo tüsho thiyuzüngbo anide rhimoang, jude athsükhinü nüsa lomi ching tsokhitde alabah. 19Alonü hi mukhuhshihbah, tüsho nüsa bukthsüde tsühde tsokhitde alabah.
20Tüshe nüsanü akeokhibah, Isanü mümükhean yungsho hi müyimlusho, kam thünepü ching isa tümü tsühba? 21Inü kam thurukpü ching nüsa thsungkheak I müngühmühi jihbah; junangde kam mahsam thsungkheaknü sangsolungso suhdahde asoshihbah. 22Küyimki nüsanü kam atizheahpü ching mükheanbanü, kam thurukpü khiungde nüsa awün hi tsühde alabah; ju yimlude malungyichoki khiungde, nüsa awün hi tsühbah.
Lakhit-kukruk Ngülokhi
23Alo ju kamruhroro thsungkheak müyinbeah, tümüde alo ju I yo ah; nüsa I lung jaksorü tüsho tsotsahrü ruk lah.
24Tüsho nüsa lakhi lomi athrünkhi ching nüsanü alakukruk rhokhitpü mülübeah. 25Nü keoniorü khürü zhochihrü kambahle lakhit khürü yinsho api keoniorü khungnü arübah arhokhitbah. 26Mihtsürü ju arhokhitpü she mülade azangrü lalimlako tsüshihbah arhokhitpü thsüsho, 27apinü ayinkhi kam chingnü kambo kheshang, tüsho apinü ayinjihbuh kilim ju aningkhi jihloshang, jude thsübah api lakhit-kukruk lulobah. 28Tüshe apinü suhdahde mülakhinü nihbuh zangrü rhokhita mulukhuksho, tümü yinkheanü athulobuh khah ching Jubilee kam khiungde alabah; tüsho ju Jubilee kim ching jihlobah, tüsho api nihbuh lakhit lim yübah.
29Mihtsürü khürünü chipi thsükhi kiuto alunglim thüyam yinsho, apinü ayinkhi kim ching kam khülang amuyung rhokhitpü alim lah. 30Ju kam khülang dükeak chingnü mürhokhitsho, chipi thsükhi kiuto alunglim lakhi thüyam ju aronü tsühsoniuso lün khiungde athulobuh yo kambah. Ju Jubilee ching müjihlo. 31Tüshe chipi mülakhi kiulongbo ching lakhi thüyambo ju lomi lubo nangde akhebah. Jurübo arhokhitkhukbah, tüsho Jubilee kim ching jihlobah. 32Tahle Levirü kiutobo, tüsho arü lakhit-kukrukbo kiutobo ching lakhi thüyambo, Levirübonü tümütümü kim ching she rhokhitkhukbah. 33Tüsho Levirü khülangnü thüyam yinbah rhokhitloa mulua lasho, arü lakhitkukruk kiuto ching lakhi thüyam yinkhi ju Jubilee kim ching jihlobah; tümüde Israelrü bolung Levirü kiutobo ching thüyambo lakhi ju arü lakhit-kukrukbo ah. 34Tüshe Levirü kiutobo mühi boto lu lakhi ju küyimkishe müyinbeah; ju lün thsungkheaknü arü lakhit-kukruk ah.
Zhochihrü kilim Nipjihkhi
35Tüsho nü keoniorü khürü zhochihrü kambahle nihbuh zangrü mümütrükhuksho, nünü api rungang, api jaksorü khülang yungsho tsotsahrü nangde nü lung labah. 36Api kheaknü sholü tümü dulu; tüshe nü Thrünpuh treang; arübo nü lung lashang. 37Nünü api kheak alü lupü thsüde sho dünipjih, yungsho alü ngülopü thsüde tsühyungpü münipjihbeah. 38I Atungpuh nüsa Thrünpuhnü nüsa kilim Kanan lo jihpü tüsho nüsa Thrünpuh thsüshihpü nüsa Ijip lomi chingnü bekhit.
Azhorübo Dükhekhi
39Nü keoniorü khürü zhochihrü kamde anihbuh nü ki yinsho, nünü api ki azhorü nangde dütankihshih. 40Tüshe api nü lung amulokhi rhimorü khülang nangde tüsho tsotsahrü nangde alabah, tüsho Jubilee kam khiungde nü tankihbah; 41jushu api le atsührübo nü kheaknü atsobah tüsho anihbuh yamkhün tüsho jipürü lopung yimde ayübah. 42Tümüde arübo I yamlarübo, inü Ijip lomi chingnü abekhitkheah, arü azhorü nangde ayinpü mukuk. 43Nünü api kheak müküpde thiyuzüng dahori, tüshe nünü nü Thrünpuh wüntreang. 44Nü thsungkheaknü athrürü tüsho aliberü azhorü yihnüpü thsüsho, nü mühide alakhi trükbo chingnü arübo thuloang. 45Nüsanü nüsa lung larü mihsorübo tsotsahrü sherübo nüsa lo chingnü zübekheanü arü yamkhün bolung chingnü athulopü kuklah; arübo ju nüsa lakhit-kukruk thsüpü kuklah. 46Tüsho nünü arübo nü tsührübo thsungkheak yamrüplurüp thsüde azojihpü kuklah, arübo kamruhroro nüsa azhorü thsübah. Tüshe nüsa keoniorü Israelrü tsührübo kheak nüsanü müküpde yakzan düshuh.
47Mürangkhüh nüsa lung larü khiungkerü alarü kamsho, tüsho keoniorü Israelrü khürü zhochihrü kambah jurü khiungkerü yungsho arü betsührü khürü ki yinsho, 48api yinabahshu, anihbuh rhokhitlopü alim lah. Akeoniorü khürünü api rhokhitpü kuklah; 49yungsho akü yungsho akü tsührünü api rhokhitpü kuklah; yungsho api thüninde alarü keoniorü khürünü arhokhitpü kuklah; yungsho api lalimlako tsüde kamsho anihbuh zangrü rhokhitpü kuklah. 50Api tüsho api thulobuhnü anihbuh yinkhi Jubilee kam khiungkhi khebah. Api dükhepü dün ju kambo khekhi amulokhi yamlarü kilim jihkhi khuh yanbah. 51Kheaküshe kam hihde aninga lasho, ju yande apinü anihbuh dün jihkhi chingnü api rhokhitpü jihlobah, 52tüsho Jubilee kam khiungpü kam nükde aninga lasho, apinü kambo khebah ju yande api rhokhitpü adün jihbah. 53Api kam abande amulokhi yamlarü nangde alabah, tütüshe nü miki api putungrünü api kheak thiyuzüng müküpde mahoribeah. 54Tüsho api jurü kambo ching mürhokhita lasho, api lung atsührübo she bebah Jubilee kam ching zuzu kamde atsobah. 55Tümüde Israelrü tsührübo ju I yamlarübo ah; inü Ijip chingnü abekhitkhi I yamlarübo: I Atungpuh nüsa Thrünpuh.
Currently Selected:
LEVI 25: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
