LEVI 24
24
Tsünpungbo Kümkhi
(Abe 27.20-21)
1 Atungpuhnü Mosa ki tha, 2Israel mihtsürübo ki tsünpung ching yukpü thsüde oliv chingnü anitkhitkhi müdangke handarüpü thiyukhüm jihang, junangde tsün ju mutukzhakde atrushihbah. 3Ashorupung khimyam ching tangzüng khim zhinkhi aleanglim, Aronnü tsünpungbo ju takkih-a zoanude arenü yapsu khiungde akümbah. Ha tsühsoniuso lün thsungkheaknü yakzan thsükhi labah. 4Suna müthsün tsünpung zopung Atungpuh miki lakhi kheak dubopü tsünpungbo ju apinü mutukzhakde azobeah.
Atungpuh kilim Jihkhi Yikhap
5Tüsho nüsanü ayikangkang khahngak 12 lubah yikhap thürükheak mahne nungang. 6Jurübo ju thuruk thuruknü ru mahne thsüde Atungpuh miki lakhi suna müthsünnü athsükhi dükhüm kheak zoang. 7Tüsho nüsanü atsangkhitkhi rhümthüneabe aru abande yihkihang; ju yikhap ching ride yüzahbah mümihpü shihcham Atungpuh kilim monü taka kingaünkhi labah. 8Israelrü mihtsürü thsung thsüde Aronnü ha yikhap lubah amuni aban mutukzhakde, lünnü tangzüngkhi amütsan Atungpuh miki zojihbah. 9Ha yikhap ju Aron le atsührübo yo thsübah, arünü ju amüsüh dangpung chingnü atsühbah, tümütüsho, ha Atungpuh kilim taka kingaünkhi chingnü arü lün yo khide amüsüh shihcham ah.
Athruajirü Rusahkhi
10Kheakü athrürü khülang, abe Israelrü tüsho abuh Ijiprü labuhnü Israel mihtsürü bolung wukhiuk; tüsho Israelbe tsührü tüsho Israelbuh ane binkheampung ching rukachih. 11Israelbe tsührü junü Thrünpuh mung athrude tha; jumonü arünü api Mosa kilim bedarü. (Abe mung ju Shelomith, Dan trük, Dibri tsührübe lakheah). 12Tüsho Atungpuhnü arü ki mütsanmükhi müjihyi khiungde api rihyam ching zo.
13Tüsho Atungpuhnü Mosa ki tha, 14Athruajibuh ju binkheampung chingnü bekhitang, tüsho apinü athruajikhi sorü abannü amülim ah dükhi amütsan arü khah aku kheak nimbah, tüsho boto alalanü api lungnü rusahang. 15Tüsho Israelrü ki thaang, Shepünü nihbuh Thrünpuh athruajibanü nihbuh neak hanbah. 16Shepünü Atungpuh mung athrubanü api asheshihbah; boto ching athrünkhinü api rusahbah; hanrü thsüthsü mihkhung larü thsüthsü, küyimki Atungpuh athrubanü api asheshihbah.
17Khürünü mihtsürü laksahsho api asheshihbah. 18Shepünü shiwüh laksahbanü ju dün shaklobah, rhangdung müthri rhangdung.
19Khürünü nihbuh yamhingrü yurijihsho, apinü arhimokhi nangde api kheak rhimolobah; 20ro nüpkhi dün ro, mük müthri mük, hü müthri hü; apinü mihtsürü kikshihkhi nangde, api kikabahshihbah. 21Shepünü shiwüh laksahbanü amüthri jihloshihbah, tüshe shepünü mihtsürü laksahbanü api asheshihbah. 22Khiungkerü tüsho mihkhung thsungkheaknü yakzan khülang lang alabah: tümüde I Atungpuh nüsa Thrünpuh.
23Mosanü Israel mihtsürübo ki tha; tüsho arünü athruajibuh ju binkheampung aleanglim bekhit, tüsho api rusahabah, Atungpuhnü Mosa ki thiyukhüm jihkhi nangde Israel mihtsürünü rhimo.
Currently Selected:
LEVI 24: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
