LEVI 23
23
Akin Yakli Thüniobo
1 Atungpuhnü Mosa ki tha, 2Israel trükbo ki thaang: Harü ha akhukhitkhi Atungpuh thüniobo, nüsanü amüsüh amukhung ah de azhiyukpü lah. 3Nimung thuruk rhimo rhimobah, tüshe thüne nipü a sühakhim amunimung, amüsüh kingaünpü nimung. Nüsa küching küching lalashe, nüsanü rhimo tümü she mürhimobeah, ha Atungpuh amunimung khülang ah. 4Harü ha Atungpuh thüniobo, amüsüh amukhungbo, nüsanü akhukhitkhi kim ching zhiyukjihpü lah.
Phungho-thünio tüsho Phaüm Muyukkhi Yikhap
(Wüh 28.16-25)
5Akhuhbe khinu, nimung thürükheak phüyi nipü ani yüzahchoki ju Atungpuh phungho-thünio ah. 6Tüsho ju khinu nimung thürükheak phüngü nipü ju phaüm muyukkhi Atungpuh thünio labah; nüsanü nimung thüne phaüm muyukkhi yikhap tsühbah. 7Atan nimung nüsanü amüsüh amukhung khülang labah; nüsanü rhimo achak tümü she mürhimo. 8Tüshe nüsanü Atungpuh kilim nimung thüne taka kingaünbah; athüne nipü ju amüsüh amukhung nimung ah; nüsanü rhimo achak tümü she dürhimo.
9Tüsho Atungpuhnü Mosa ki tha, 10Israel mihtsürübo ki thaang: Küyimki nüsanü inü ajihkhi lo ching arüba, tüsho yimlubanü, nüsanü akhuhde yimlukhi hi phung amükeambuh kilim handarünü jihang; 11tüsho nüsa aleangkhikhukpü thsüde, apinü Atungpuh miki müleamde kingaünbah; ju amunimung shidopü amükeambuhnü müleamde ajihbah. 12Tüshe hi phung müleamde ajih nimung, nünü lapha mükihkhi namfimihnunu pung kam khülang bankhi Atungpuh kilim taka kingaünang. 13Ju lung nüsanü ayikangkang khahngak 2 ching oliv müdangke yukbah hi kingaün jihde arhümthüneakhinü Atungpuh asühshihbah; tüsho yukhu she pungdüchi 1 kingaün jihbah. 14Nüsanü ju nimungnü nüsa Thrünpuh kilim kingaün handarü müjihyi khiungde yikhap thsüthsü, angukhi hi thsüthsü yungsho aso hi thsüthsü nüsanü mütsüh; ha nüsa tsühsoniuso lün ching lapung abande thiyukhüm labah.
Yimlukhi Thünio
(Wüh 28.26-31)
15Tüsho amuni shidopü, nüsanü hi phung müleamde kingaünkhi ninü ründe amuni thüne khiungde kheang. 16Amuni thünepü dunglim nimung thünim kheang; jushu nüsanü aso hi kingaün Atungpuh kilim jihang. 17Nüsanü nüsa lapung chingnü ayikangkang khahngak 2nü anungkhi yikhap mahne müleamde ajihpü lubah arang; jurübo ju atsüdak ayikangkang, phaüm yukbah anungkhi, Atungpuh kilim akhuhbe sangaso thsübah. 18Tüsho nüsanü yikhap lung lapha mükihkhi namfimihnunu pung kam khülang bankhitkhi thüne, moshipung khülang, tüsho mihnupung mahne de jihang; jurübo ju hi kingaün tüsho yukhu kingaünkhi bolung taka kingaünde, arhümthüneakhinü Atungpuh asühshihbah. 19Tüsho nüsanü neak kingaünpü mihnupung khülang, tüsho kam khülang bankhi namfimihnunu mahne mungtsü kingaün shuhmülanga jihpü thsungkheak jihang. 20Amükeambuhnü akhuhbe sangaso ju namfimihnu mahne lung Atungpuh miki müleamde kingaünbah; jurübo amükeambuh thsungkheaknü Atungpuh miki amüsüh labah. 21Tüsho ju ninü nüsanü zhiyukjang; nüsanü amüsüh amukhung khülang labah; nüsanü rhimo achak tümü she mürhimo: ha nüsa lapung abande kamruhroro nüsa lün amuyung yakzan labah.
22Tüsho küyimki nüsanü yimlubanü, nüsanü thulu tsünthri khiungde düyimlu, yungsho yimluabahshu hi müdre moa dulu; nüsanü jurübo zhochihrü tüsho khiungkerübo khilim zojang: I Atungpuh nüsa Thrünpuh.
Kamso Thünio
(Wüh 29.1-6)
23 Atungpuhnü Mosa ki tha, 24Israelrübo ki thaang: Khinu thüne atan nimung nüsanü sühakhimkhi, lümrhihkhi amüsüh amukhung, khungpi khungde mungang. 25Nüsanü rhimo achak tümü she dürhimo, tüsho nüsanü Atungpuh kilim taka kingaünkhi jihang.
Dünthsükhikhi Nimung
(Wüh 29.7-11)
26Tüsho Atungpuhnü Mosa ki tha, 27Ha khinu thüne nimung thürü nipü ju neak dünthsükhikhi nimung labah; nüsa thsungkheaknü ha nimung amüsüh amukhungkhi kim labah, tüsho nüsanü nüsa nihbe me thsünübah tüsho Atungpuh kilim taka kingaünkhi jihbah. 28Tüsho nüsanü ha nimung rhimo tümü she dürhimo; tümüde ha nüsa neak dünthsükhipü Atungpuh nüsa Thrünpuh miki dünthsükhikhi nimung ah. 29Tümütüsho shepünü ha nimung ching müthsünübanü api mihtsürü bolungnü khekhita bahbah. 30Tüsho khürünü ju nimung rhimosho, Atungpuhnü api asheshihbah. 31Nüsanü tümü she mürhimo; ha nüsa lapungbo ching nüsa tsühsoniuso lün ching lünnü yakzan thsükhi labah. 32Ha nüsa thsungkheaknü sühakhimpü amunimung ah, tüsho nüsanü nüsa nihbe küdah thsüde thsünüang. Khinu ching nimung tuku nipü arelimnü ashirepü khiungde nüsanü amunimung yihkhia lubeah.
Arüngkhimyam Thünio
(Wüh 29.12-40)
33Tüsho Atungpuhnü Mosa ki tha, 34Israelrü tsührübo ki thaang: Ha khinu thüne nimung thürükheak phüngü ninü ründe nimung thüne khiungde Atungpuh miki arüngkhimyam thünio labah. 35Akhuhbe nimung ching amüsüh amukhung labah; nüsanü rhimo achak tümü she mürhimobeah. 36Nimung thüne nüsanü Atungpuh kilim taka kingaünbah; atizheah nipü nüsanü amüsüh amukhung labah tüsho Atungpuh kilim taka kingaünbah; ha mülangrüpdo amukhungkhi lah tüsho nüsanü rhimo achak tümü she mürhimobeah.
37Harü ha nüsanü Atungpuh thüniobo, amüsüh amukhung kim ah de azhiyukpü lah, ju Atungpuh kilim taka kingaünkhi tüsho hi kingaünkhi, shuhmülanga jihkhi tüsho yukhu kingaün, buh nimungmung akhukhitkhi yande ajihbe ah. 38Harü kingaünbo ha Atungpuh amuni kingaün, nüsa thsambahbo, nüsanü thiyuchihchimkhi kingaün tüsho mulongde jihchungkhi kingaünbo Atungpuh kilim jihkhi bolung yukrude ajihbe lah.
39Jumonü küyimki nüsa lu yimlubanü khinu thüne nimung thürükheak phüngü ninü ründe nimung thüne Atungpuh thünio mungang; atan ni tüsho atizheah nipü ju sühakhimkhi amunimungbo labah. 40Tüsho nüsanü atan nimung sangdung atsü sangasobo, ashidung khahbo, ayü hihkhi sangkhahbo tüsho keyean zhipkhi sangbo lude arübah; tüsho nüsanü Atungpuh nüsa Thrünpuh miki nimung thüne asühachihbah. 41Ha Atungpuh thünio kam abande nimung thüne mungang. Haju ha nüsa lün amuyung kamruhroro thsungkheaknü yakzan thsükhi lah; ha khinu athünepü ching mungang. 42Israel mihtsürü alalanü nimung thüne khimyam ching labah, 43jude athsükhi hode Atungpuhnü Israel mihtsürübo Ijip chingnü abekhitchoki khimyam yancho ching binshih-a lah de nüsa tsühsoniusobonü amükheahbah: I Atungpuh nüsa Thrünpuh.
44Jumonü Mosanü akhukhitkhi Atungpuh thüniobo dünkheak Israel mihtsürübo kilim mükheahshih.
Currently Selected:
LEVI 23: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
