LEVI 22
22
Amüsüh Kingaünbo
1Tüsho Atungpuhnü Mosa ki tha, 2Aron tüsho atsührübo ki, Israel tsührübonü I kilim müsühkhitde kingaünkhi kümkangpü thaang, junangde arünü I mung amüsüh mümüneanjih; I Atungpuh ah. 3Arü ki thaang: Nü lünbo amuyung ching nü tsührü-tsührü bolung khürükhüh mümüsühde alachoki Israelrünü Atungpuh kilim müsühkhitde kingaün jihkhi miki arüsho, api ju I mikinü khekhita bahbah: I Atungpuh ah.
4Aron tsührü-tsührü bolung apham yungsho pang chingnü amüyeanrü shenü she nihbuh mümüsühkhityi khiungde amüsüh kingaünkhi mütsüh. Shepünü ashemi yungsho ke müyeanrü kheak qiubanü mümüsüh, 5yungsho apinü abüde atsahbe shiwüh yungsho amümüsüh mihtsürü kheak qiusho api mümüsühde akambah. 6Shepünü hadürü kukruk qiubanü api arelim khiungde mümüsühkhi labah tüsho api pang kenü müyihamübahsho amüsüh kingaünkhi apinü mütsüh. 7Tüsho küyimki ani yüzahbanü api amüsüh kambah; tüsho ju dunglim amüsüh kingaünkhibo ju apinü atsühpü kuklah, tümütüsho ju api tsühyungpü ah. 8Apinü shiwüh akeangnü ashekhi yungsho mütüm shiwühnü anguhsahkhi shih tümü she mütsüh; junü api müneanjihbah: I Atungpuh ah.
9Amükeamrü alalanü inü ajihkhi yuzüngbo anibah. Jude müthsüsho arübonü ju müneankhinü neak yihbeakbah tüsho ashebah: I Atungpuhnü arü müsühkhit.
10Püpürü shenü she amüsüh kingaünkhi mütsüh; amükeambuh lung lakhi hanrü yungsho amulokhi yamlarübonü she mütsühbeah. 11Tüshe amükeambuhnü shonü athulokhi azhorü yungsho api yam chingnü azübekhi azhorünü a api tsühyungpü tsühpü kuklah. 12Amükeambuh tsührübe khülangnü püpürü ki rhangsho anihbenü amüsüh kingaünkhibo mütsüh. 13Tüshe amükeambuh tsührübe ju khimoberü kamsho yungsho bah-a lasho, tüsho tsührü mülasho, tüsho abuh yam ching alode arübah anihbe athunu kim ching lakhi ruk api lung lasho, anihbenü abuh tsühyungpü tsühpü kuklah; tütüshe püpürünü a ju mütsüh.
14Mihtsürü khürünü amüsüh kingaünkhi ju müreanglimnü tsühsho, apinü ju ching muku shihcham jihbah, tüsho amüsüh kingaünkhi ju amükeambuh kilim jihbah. 15Israel tsührübonü Atungpuh kilim jihkhi amükeamrübonü dümüneanjih, 16yungsho arü ki thiyukhüm jihbahle amüsüh kingaünkhi tsühkhi hode arübo kheak amülim akihbah; tümüde I Atungpuhnü jurü mümüsühkhit.
17Tüsho Atungpuhnü Mosa ki tha, 18Aron le atsührübo tüsho Israel mihtsürübo ki thaang, Küyimki Israel yamkhün khürü yungsho Israel lung larü khiungkerünü kingaün jihbanü, alokhikhi shakpü yungsho mulongde Atungpuh kilim taka kingaünpü thsüthsü, 19aleangkhipü thsüde nüsanü lapha mükihkhi moshipung yungsho namfimihnupung yungsho mihnupung bolungnü jihang. 20Nüsanü mütsümüyangkhi shiwüh tümü she düjih, tümüde nü dünkheaknü müleangkhi. 21Tüsho küyimki khürünü mungtsü kingaün Atungpuh kilim shuhmülanga jihbanü, alokhikhi thsüthsü yungsho mulongkhi kingaünpü thsüthsü, aleangkhipü thsüde moshi yungsho namfimihnu bolungnü lapha mükihkhi jihbeah. 22Shiwühbo amük tukkhi yungsho akikkhi yungsho ajing zhakkhi yungsho amüyeankhi yungsho aküp züngrüpkhi yungsho müshak kihkhibo, nüsanü hadürü shiwühbo kingaünpung kheak Atungpuh kilim taka dükingaün. 23Moshipung yungsho namfimihnunu ajingkhah alü shangkhi yungsho alü khihkhi nüsanü mulongkhi kingaünpü kuklah, tüshe alokhikhi dünkheak a ju müleangkhi. 24Shiwüh amükiji trükhi yungsho azünakkhi yungsho azüngrüpkhi yungsho akiukhi, nüsanü Atungpuh kilim müjihbeah yungsho nüsa lomi ching she shuhmülanga dükingaün; 25yungsho hadürü shiwüh khiungkerü khah chingnü leangkhia nüsanü Atungpuh kilim tsühyungpü kingaün düjih. Tümüde jurü kheak lapha tüsho areak kihkhi hode nüsa thsungkheaknü müleangkhi.
26Tüsho Atungpuhnü Mosa ki tha, 27Küyimki moshipung yungsho namfimihnu yungsho mihnu adrebanü, abe lung nimung thüne labah; tüsho atizheah nipünü ründe Atungpuh kilim taka kingaünpü aleangkhikhukkhi thsübah. 28Tüsho ju moshi dreto yungsho namfimihnu dreto thsüthsü, nüsanü anunu ane chido nimungkhühnü mülaksahbeah. 29Nüsanü küyimki makshe jihkhi Atungpuh kilim shuhmülanga jihbanü, nüsa dünkheak aleangkhikhukpü thsüde jihang; 30nüsanü ju nimungnü tsühang tüsho ashido yapsu khiungde daningshih: I Atungpuh ah.
31 Atungpuhnü tha, Jumonü nüsanü I yukhümbo aniang; I Atungpuh ah. 32Nüsanü I mung amüsüh mükhemürang düthsü; tüshe Israel tsührü bolung I amüsüh thsübah. I Atungpuh nüsa müsühkhitjihbuh; 33tüsho I nüsa Thrünpuh thsüpü thsüde inü nüsa Ijip lomi chingnü bekhit: I Atungpuh ah.
Currently Selected:
LEVI 22: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
