LEVI 14
14
Küp Tukthsü Kihshu Müsühkhitkhi
1 Atungpuhnü Mosa ki tha, 2Ha aphamrü müsühkhit nimung thsungkheaknü yakzan labah. Api amükeambuh kilim bedarübah, 3amükeambuhnü binpung chingnü api bebahle wungdo wukhiukbah akheahbah. Tukthsü ju thsüngua lasho, 4amükeambuhnü wuhnu arhang amüsüh mahne handarüpü thiyukhüm jihbah, ju lung cedar sang, shungliu amürüm, tüsho monam sangkhah; 5jushu amükeambuhnü wuhnu khülang ju alo phüh ching ke khipleangkhi zahkhi mi kheaknü alaksahpü thiyukhüm jihbah. 6Tüsho apinü wuhnu arhang lung, cedar sang, shungliu amürüm tüsho monam le alaksahkhi wuhnu thiyih ching yuka thsambah. 7Apinü apham tukthsü chingnü amüsühkhitbuh mihtsürü kheak thiyih thüne ki rhakkihbah, jushu api müsühlah de athabah, tüsho rhangdung lakhi wuhnu ju kimtsüh ching phinde atsoshihbah. 8Apham kihbuhnü akhimmihbo müsühbahle ku hütabahbah, tüsho kemüyihbah; jushu api amüsüh kambah. Api binpung ching yüzahpü kuklah, tüshe anihbuh khimyam aleanglim nimung thüne labeah. 9Kheaküshe apinü nimung athüne nipü akuyü, mükhühnam, müknam, tüsho apang kheak kihkhi nam alala hütabahbeah; apinü khimmih müsühbahle kemüyihbah, tüsho api müsühde akambah.
10Tüsho nimung atizheah nipü apinü lapha mükihkhi namfimihnunu kam khülang bankhi dre khülang, hi kingaün thsungkheaknü ayikangkang atsüdak muluk shihcham thürü ching shihcham mahsam lung müdangke thsürubah, tüsho müdangke pungdüchi shihchamkhüh handarübah. 11Amükeambuhnü mihtsürü tüsho kingaünbo lubahle Atungpuh shorupung khimyam ripit ki yübah. 12Jushu amükeambuhnü namfimihnunu pung khülang tüsho müdangke pungdüchi shihchamkhüh lubah ashaklo kingaün jihbah; apinü jurü müleamde Atungpuh kilim amükeambuh thsungkheak jihbah. 13Tüsho apinü namfimihnunu ju neak kingaün tüsho taka kingaünpü laksahpung, amüsüh dangpung chingnü alaksahbah, tümüde neak kingaün ju amükeambuh yo ah, junangde ashaklo kingaün she api yo thsübah. Ju khide amüsüh ah. 14Amükeambuhnü namfimihnunu thiyih khürü lubahle müsühkhitpü lakhi mihtsürü tsülim nuku müzhean, tsülim khahkutopü, tüsho tsülim jingkutopü kheak yihkihbah. 15Amükeambuhnü müdangke pungdüchi shihcham khürü lubahle anihbuh müyi huzulim bukkihbah, 16ju ching tsülim yingkhing athsoyuka pangbahle müdangke khürü Atungpuh miki thüne ki rhakbah. 17Apinü amüyi ching yo müdangke tüsho namfimihnunu thiyih khürü ashaklo kingaün lubahle müsühkhitpü lakhi mihtsürü tsülim nuku müzhean, tsülim khahkutopü, tüsho tsülim jingkutopü kheak yihkihbah. 18Apinü aningkhi müdangke amüyi ching yo lubahle müsühkhitpü lakhi mihtsürü ku kheak yihkihbah, hanangde apinü Atungpuh miki dünthsükhia bahjihbah.
19Amükeambuhnü müsühkhitpü lakhi mihtsürü thsungkheak api mümüsühkhi chingnü müsühkhitpü dünthsükhide neak kingaün jihbah. Jushu apinü taka kingaünpü laksahbah; 20tüsho amükeambuhnü taka kingaün tüsho hi kingaünkhi kingaün sadam kheak jihbah. Hanangde amükeambuhnü api thsungkheak dünthsükhibah, tüsho api ju amüsüh kambah.
21Tüshe mihtsürü ju zhochihrü thsübahle ju dükhüh müjihkhuksho, apinü anihbuh dünthsükhipü thsungkheaknü namfimihnunu pung khülang lang anihbuh dünkheak ashaklo kingaün handarübah, ju amükeambuh thsungkheaknü Atungpuh kilim müleamde ajihkhi labah, tüsho hi kingaün jihpü ayikangkang atsüdak muluk shihcham thürü ching khülang lung müdangke tüsho müdangke pungdüchi shihchamkhüh jihbeah; 22kheaküshe apinü ajihkhukpü lakhi müthrithrümpü mahne yungsho chithüreku mahne jihbeah; khülang ju neak kingaünpü tüsho püpü ju taka kingaünpü thsungkheak. 23Tüsho apinü nimung atizheah nipü anihbuh müsühkhitpü thsüde ashorupung khimyam ripit ki, Atungpuh ki jurübo handarübah. 24Amükeambuhnü ashaklo kingaün jihkhi namfimihnunu tüsho müdangke pungdüchi shihchamkhüh lubahle müleamde Atungpuh kilim jihbah. 25Apinü namfimihnunu laksahbahle athiyih khürü lubah tüsho ju mihtsürü tsülim nuku müzhean, tsülim khahkutopü, tüsho tsülim jingkutopü kheak yihkihjihbah. 26Amükeambuhnü müdangke khürü amüyi huzulim bukkihbah 27tüsho tsülim yingkhingnü müdangke khürü Atungpuh miki thüne ki rhakbah. 28Apinü ashaklo kingaün thsungkheak thiyih yihkihpung kheak lang müdangke khürü yihkihbah: ju mihtsürü tsülim nuku müzhean, tsülim khahkutopü, tüsho tsülim jingkutopü kheak yihkihbah; 29tüsho aningkhi müdangke amüyi ching yo ju apinü mihtsürü ku kheak bukkihbah tüsho hanangde Atungpuh miki müsühkhitde dünthsükhibah. 30Tüsho apinü akukkhi müthrithrümpübo yungsho chithürekubo jihbah, 31khülang neak kingaün tüsho püpü ju taka kingaünpü thsungkheak hi kingaün lungnü ajihbah. Hanangde amükeambuhnü api dünkheak amüsühkhitpü ATU NGPUH miki dünthsükhibah. 32Ha apham tukthsü kihrü shepünü nihbuh müsühkhitpü thsungkheak kingaün müjihkhukpü lanü api thsungkheak yakzan ah.
Thüyambo ching Mokri Pungkhi
33 Atungpuhnü Mosa tüsho Aron ki tha, 34Küyimki inü nüsa yamalo thsüpü jihkhi Kanan lomi ching nüsa arüba, tüsho thüyam ching mokri yükihshihbanü, 35thüyam putungpuhnü amükeambuh ki yübah thaang, “I yam ching mokri khürü lakhi ruk ah.” 36Amükeambuhnü api yübah mokri ju mükheahyide thüyam ching lakhi kukrukbo athrünkhi akükhita bahang de thiyukhüm jihbah; jude yungsho thüyam ching lakhi kukruk lüpdükhi amümüsüh kambah. Tüsho apinü thüyam ching yübah, 37tüsho mokri ju akheahbah. Ju ching phüyakdo yungsho mamde mokri kihbah rhü alunglim tsühde ayüzahpü lasho, 38apinü thüyam chingnü atsobah tüsho nimung thüne rihdoa zobah. 39Nimung athüne nipü amükeambuhnü arülobah akheahbah; tüsho tukthsü ju thüyam rhübo ching bua lasho, 40tukthsü yükihkhi lungbo akükhita mümüsühkhi dangpung kiuto aleanglim bahang de amükeambuhnü thiyukhüm jihbah; 41tüsho apinü thiyia thüyam lunglim rhü kheak mujukhi khukkhishihbah, tüsho arünü ayihkhikhi asungthulung ju mümüsühkhi dangpung kiuto aleanglim wukhita zobah; 42tüsho arünü lahkhita bahkhi lungbo müthri lung püpü handarünü ayukbah, tüsho amujube aso handarünü rhü ju amujudobah.
43Lungbo tüsho rhü mujukhi khukkhia bahbahle amuju dunglim kheaküshe tukthsü ju thüyam ching akhiuklosho, 44amükeambuhnü arübahle akheahbah; tüsho tukthsü ju thüyam ching bua lasho, ju amütsü kambe apham tukthsü ah. Thüyam ju mümüsüh. 45Tüsho thüyam, lungbo, sangbo tüsho amujukhibo alala akhapkheambah; tüsho jurübo mümüsühkhi dangpung kiuto aleanglim hande ayübah. 46Khürükhüh thüyam rihdoa lachoki yüzahsho api arelim khiungde mümüsühkhi labah. 47Khürükhühnü thüyam ching awuh-a yapde yungsho tsühyungsho akhimmihbo müsühabahbeah.
48Tüshe thüyam mujulobah dunglim, amükeambuhnü arünü kheahbahle tukthsü ju thüyam ching mubuloa lasho, amükeambuhnü thüyam ju müsühlah de athabah, tümüde tukthsü shahde wukhiukabahdo. 49Thüyam müsühkhitpü, apinü wuhnu mahne, cedar sang, shungliu amürüm tüsho monam sangkhahbo lubah. 50Apinü wuhnu khülang ju alo phüh ching ke khipleangkhi zahkhi mi kheaknü alaksahbah. 51Tüsho apinü cedar sang, monam, shungliu amürüm tüsho wuhnu arhang lubah alaksahkhi wuhnu thiyih ju akhipleangkhi ke ching thsambah. Tüsho apinü thüyam kheak thüne ki rhakbah. 52Hanangde apinü thüyam ju wuhnu thiyih, ke khipleangkhi, wuhnu arhang, cedar sang, monam, tüsho shungliu amürümnü müsühkhitbah. 53Tüsho apinü wuhnu arhang ju kiuto aleanglim kimtsüh ching phinde atsoshihbah. Hanangde apinü thüyam thsungkheak amüsühkhitbe dünthsükhibah, tüsho ju müsühde akambah.
54Ha apham tukthsü thsungkheaknü yakzan; mükhüt, 55khimmih tüsho thüyam ching akhiukkhi mokri, 56tüsho abümkhi yungsho azüngrüpkhi yungsho areak akhiukkhi, 57ju mümüsühkhi tüsho amüsühkhi dünkheak huhpü. Ha apham tukthsü thsungkheak yakzan.
Currently Selected:
LEVI 14: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
