LEVI 15
15
Pang chingnü Amüyeankhi Dünkheak Yakzanbo
1 Atungpuhnü Mosa tüsho Aron ki tha, 2Israel tsührübo ki thaang, Küyimki athrürü khürü pang chingnü amüyeanbanü, amüyeankhi ju mümüsüh. 3Ha api müyeankhi dünkheak yakzan: apang ching ju müyeanyean she yungsho, amüyeankhi ju tukloa lalashe, api pang ching mümüsühkhi lah. 4Amüyeanbuh yapkhi yapkiu tüsho binpungbo alala mümüsühkhi labah. 5Tüsho shepünü ju buh yapkiu qiubanü nihbuh khimmih müsühbah, kemüyihbah tüsho arelim khiungde mümüsühkhi labah. 6Sherünü abinpung tümükhüh kheak qiubanü nihbuh khimmih müsühbah tüsho kemüyihbah, tüsho api arelim khiungde mümüsühkhi labah. 7Shepünü amüyeanbuh pang kheak qiubanü nihbuh khimmih müsühbah tüsho kemüyihbah, tüsho api arelim khiungde mümüsühkhi labah. 8Amüyeanbuh mihtsürünü amüsüh mihtsürü khürü kheak mukhiukkihsho ju buhnü khimmih müsühbah tüsho kemüyihbah, tüsho arelim khiungde mümüsühkhi labah. 9Tüsho amüyeanbuhnü abinkhi binkiubo ju mümüsühkhi kambah. 10Ju buh mihtsürünü abinkhibo kheak shepünü aqiubanü api arelim khiungde mümüsühkhi labah; tüsho shepünü jurü kukruk hanbanü akhimmih müsühbah, tüsho kemüyihbah, tüsho arelim khiungde mümüsühkhi labah. 11Amüyeanbuh mihtsürünü akhah mümütsakde khürü kheak qiusho, ju buhnü akhimmih müsühbah tüsho kemüyihbah, tüsho api arelim khiungde mümüsühkhi labah. 12Amüyeanbuhnü aqiukhi alo phüh ju yihrüpabahbah; tüsho sangnü athsükhi pungphurubo ju kenü müsühabahbeah.
13Mihtsürü amüyeankhi chingnü thsüngushu, apinü amüsühkhitpü thsungkheaknü nimung thüne aleangbah tüsho jushu akhimmih müsühbah tüsho akhipleangkhi kenü kemüyihbah, tüsho api amüsüh kambah. 14Nimung atizheah nipü apinü müthrithrümpü mahne yungsho chithüreku mahne lubah Atungpuh shorupung khimyam ripit ki arübah tüsho jurübo amükeambuh kilim jihbah. 15Amükeambuhnü khülang neak kingaün jihbah tüsho püpü ju taka kingaünbah. Hanangde apinü amüyeanbuh müsühkhitpü Atungpuh miki dünthsükhibah.
16Küyimki athrürü ke akhiukbanü, apinü apang alala müyihabahbeah; tüsho api arelim khiungde mümüsühkhi labah. 17Hing khim yungsho shihküp kheak judürü ke yükihsho kenü müsühabahbeah, tüsho ju arelim khiungde mümüsühkhi labah. 18Küyimki athrürünü aliberü kheak nungbah ke akhiukbanü, ane chido kemüyihbeah, tüsho ane arelim khiungde mümüsühkhi labah.
19Küyimki aliberü khülang nihbe khinu shihcham arübanü, alibe nimung thüne khiungde mümüsühkhi labah, tüsho shepünü alibe qiubanü arelim khiungde mümüsühkhi labah. 20Anihbe khinu shihcham arüchoki binpung yungsho yappungbo mümüsühkhi labah. 21Shepünü anihbe yapkiu qiubanü akhimmih müsühbah tüsho kemüyihbah, tüsho arelim khiungde mümüsühkhi labah. 22Tüsho shepünü alibenü abinkhi kheak qiubanü akhimmih müsühbah tüsho kemüyihbah, tüsho arelim khiungde mümüsühkhi labah; 23yapkiu thsüthsü yungsho alibenü abinpung tümükhüh thsüthsü, apinü qiusho api arelim khiungde mümüsühkhi labah. 24Tüsho athrürü khürünü anihbe lung nungbah alibe mümüsühkhi api kheak yükihsho, api nimung thüne mümüsühkhi labah; tüsho anihbuhnü ayapkhi yappung aban mümüsühkhi labah. 25Aliberü khürü khinu shihcham marüpü kim ching nimung ashang thiyih müyeansho yungsho amünchi kim hode müyeansho, amüyeankhi kim khiungde alibe ju püpüki mümüsühkhi kim nangde mümüsühkhi labah. 26Alibe müyeande alakhi nimung alala ching anihbenü ayapkhi yapkiu aban, anihbe mümüsühkhi yapkiu khejihbah; tüsho alibe binpungbo kheak anihbe mümüsühkhi kim ching nangde mümüsühde alabah. 27Shepünü jurü qiubanü mümüsüh tüsho khimmih müsühbeah tüsho ke müyihbeah, tüsho api arelim khiungde mümüsühkhi labah. 28Anihbe thiyih müyeankhi tuklosho, alibenü nimung thüne khebah, tüsho jushu anihbe müsühde akambah. 29Nimung atizheah nipü alibenü müthrithrümpü mahne yungsho chithüreku mahne lubahle Atungpuh shorupung khimyam ripit ki amükeambuh kilim yübah. 30Amükeambuhnü khülang neak kingaün jihbah tüsho püpü ju taka kingaün jihbah, tüsho hanangde apinü alibe müsühkhitpü thsungkheak Atungpuh miki dünthsükhibah.
31Hanangde nünü Israel mihtsürübo arü mümüsühkhi chingnü chamkhijihbeah, jude yungsho arü bolung lakhi I yo arüngyam thsümünimkhi hode arü münean chingnü ashebah.
32Harübo ha athrürü shepünü müyeancho yungsho ke akhiukkhinü müneana lucho, api thsungkheak yakzanbo, 33aliberü nihbe khinu shihcham arüchoki, athrürü yungsho aliberü müyeankhi, tüsho athrürü shepünü aliberü amümüsüh kheak nungcho, arü thsungkheak ah.
Currently Selected:
LEVI 15: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
