LEVI 13
13
Küp Tukthsü Dünkheak Yakzanbo
1 Atungpuhnü Mosa tüsho Aron ki tha, 2Küyimki mihtsürü khürü pang kheak abümkhi yungsho jukrüpa yungsho areak kihba, tüsho ju pang küp kheak apham tukthsü kambanü, ju buh amükeambuh Aron yungsho atsührü amükeamrü khülang kilim bedarübah. 3Amükeambuhnü apang küp kheak kihkhi mü ju kheahramde akheahbah; tüsho mü akhiukkhi ching anam müyedo kambahle mü ju pang küp kheaknü sükde yüzah-a lasho, ju apham tukthsü labah; küyimki amükeambuhnü kheahramde akheahbanü api mümüsüh de athabah. 4Tüshe pang küp kheak areak ju müyesho, tüsho küp lunglim müyüzahsho, tüsho ju kheak anam mümüyesho, amükeambuhnü tukthsü kihkhi mihtsürü ju nimung thüne thsungkheak büthsüde azobah. 5Nimung athüne nipü amükeambuhnü, api kheahbah amük ki mü ju küp ching mubude ju ruk lang lasho, jushu she apinü tukthsübuh ju nimung thüne büthsüde azobah. 6Kheaküshe amükeambuhnü api nimung athüne nipü kheahjihbah, tüsho mü ju amürung thsüde küp ching mubusho, amükeambuhnü api amüsüh de athabah; ju küp züngrüpkhi lang ah; tüsho apinü khimmih müsühabahbah, tüsho amüsüh kambah. 7Tüshe amükeambuhnü kheahjihbah amüsüh ah de athashu mü ju küp ching bua lasho, kheaküshe api amükeambuh kilim alode ayübah. 8Kheaküshe amükeambuhnü api kheahjihbah, tüsho ju bua lasho ju buh ju mümüsüh de athabah; ju apham tukthsü ah.
9Küyimki mihtsürü khürü apham tukthsü akhiukbanü, api amükeambuh ki bedarübah; 10amükeambuhnü akheahjihbah, tüsho küp kheak mü ju müyedo kamde nam müyede kamsho, tüsho nütlosho, 11ju beshebe apham tukthsü ah, tüsho amükeambuhnü api mümüsüh de athabah; apinü ju buh büthsüde muzo, tümüde api mümüsüh. 12Tüsho aphamnü küp mide, tukthsübuh ju aku chingnü amüphü khiungde misho, 13kheaküshe amükeambuhnü api kheahlobah, tüsho aphamnü apang müyedo kamde mithülama lasho, api ju ngudo de athabah; tüsho api müsühlah. 14Tüshe judüchoki nütlosho, api mümüsüh. 15Amükeambuhnü api akheahlojihbah, tüsho apinü anütlokhi ngüsho ju buh mümüsüh de athabah. Anütlokhi amütsan apham tukthsü, api mümüsühkhi kambah. 16Tüshe küyimki mü ju ngude müyedo kamde arübanü, api amükeambuh kilim yübah, 17amükeambuhnü api kheahjihbah, tüsho mü ju müyedo kama lasho api amüsüh ah, jumonü amükeambuhnü tukthsübuh ju müsühlah de athabah.
18Küyimki khürü pang küp kheak phanjakkhuh akhiukbahle angubanü, 19tüsho phanjakkhuh akhiukkhi kheak müyede bümsho yungsho mamde kamsho, ju amükeambuh huhbah; 20amükeambuhnü akheahjihbah, tüsho ju küp alunglim sükde ngüsho tüsho nam müyedo kamsho, amükeambuhnü api mümüsüh de athabah; ju phanjakkhuh chingnü kinkhitde akhiukkhi apham tukthsü ah. 21Tüshe amükeambuhnü kheahbah nam mümüyesho tüsho küp alunglim yungde amürung thsüde lasho, amükeambuhnü api nimung thüne büthsüde azobah; 22tüsho ju küp ching bua lasho, amükeambuhnü api mümüsühde athabah; ju apham tukthsü ah. 23Tüshe ju mümüthridü lang lasho tüsho mubusho, ju mü akhiukbah angukhi areak lang ah, tüsho amükeambuhnü api müsühlah de athabah.
24Khürü pang monü takbahle müyedo nütlosho yungsho mamde kamsho, 25amükeambuhnü api kheahjihbah, mü ching anam müyedo kama lasho tüsho küp alunglim sükde lasho, ju atakkhi chingnü athsukhi apham tukthsü ah tüsho amükeambuhnü api mümüsüh de athabah. 26Tüshe amükeambuhnü kheahbahle nam ju müyedo mükamsho tüsho küp alunglim yungde amürung thsüa lasho, amükeambuhnü api nimung thüne büthsüde azobah. 27Amükeambuhnü nimung athüne nipü kheahlobah, tüsho ju bua lasho apham tukthsü ah, tüsho amükeambuhnü api mümüsühde athabah. 28Tüshe areak ju mümüthridü lang lasho tüsho mubude amürung thsüa lasho, ju apham tukthsü yung. Amükeambuhnü api müsühlah de athabah, tümütüsho ju atakkhi mü ching areak lang ah.
29Küyimki athrürü yungsho aliberü ku kheak yungsho mükhüh kheak mü akhiukbanü, 30amükeambuhnü tukthsü ju akheahbah; ju küp alunglim sükde ngüsho, tüsho ju ching nam yungsho kuyü kelülü kamde abükhabündo lasho, amükeambuhnü api mümüsüh de athabah; ju apham tukthsü ah, tüsho apinü ju buh mümüsüh de athabah. 31Amükeambuhnü mükhüt tukthsü ju kheahbahle küp alunglim sükde müngü tüshe kuyü amürak mükihsho, amükeambuhnü mükhüt kihbuh ju nimung thüne büthsüde azobah, 32nimung athüne nipü amükeambuhnü tukthsü kheahjihbah; tüsho mükhüt ju bude müyüde tüsho kuyü kelülü mükihsho, tüsho mükhüt ju küp alunglim yungde ngüsho, 33jushua azangrü hütabahbah, tüshe mü kihpung a mühüt; tüsho amükeambuhnü tukthsübuh ju kheaküshe nimung thüne büthsüde azobah; 34nimung athüne nipü amükeambuhnü mükhüt ju akheahbah, tüsho küp ching bude müyüa lasho tüsho küp alunglim sükde müngüsho, amükeambuhnü api müsühlah de athabah; apinü khimmih müsühbah, tüsho müsühde akambah. 35Tüshe api müsühkhitshu mükhüt ju küp ching bua lasho, 36amükeambuhnü api kheahbah, tüsho mükhüt ju küp ching bua lasho, amükeambuhnü kuyü kelülü kamkhi yimpü yihnüpü müla; api mümüsüh. 37Tüshe mükhüt ju kheahbah amük ki kuyü amürak akhiuka lasho tüsho mükhüt ju ngua lasho, api müsühlah; tüsho amükeambuhnü api müsühlah de athabah.
38Küyimki athrürü yungsho aliberü küp kheak areak amüye kihbanü, 39amükeambuhnü ju mihtsürü kheahbah, areakbo ju buliudo müyesho, ju lapha küp kheak akhiukkhi lang ah; mihtsürü ju amüsüh ah.
40Mihtsürü khülang aku kheaknü kuyü ayoabahbah rakrak kamkam she api amüsüh ah. 41Tüsho api kingkang le müchip kheaknü kuyü adanbah akingkang rakrakde kamkam she api amüsüh ah. 42Tüshe ku rakrakkhi yungsho kingkang rakrakkhi kheak mamde mü-reak kihsho, ju aku yungsho kingkang rakrakkhi kheaknü apham akhiukkhi ah. 43Jumonü amükeambuhnü api kheahbah, tüsho ku rakrakkhi yungsho kingkang rakrakkhi kheak mamde mü nütlokhi ju, küp kheak apham akhiukkhi nangde ngüsho, 44api ju apham kihrü mihtsürü ah, api mümüsüh; amükeambuhnü api mümüsüh de athabah; api mü ju aku kheak kihlah.
45Mihtsürü shepü apham tukthsü kihbanü khim arukthünakkhi phuyubah, tüsho kuyü mushude mün hümbahle zhiang, “ Mümüsüh, mümüsüh!” 46Api tukthsü kih khiungde api mümüsühkhi labah, tüsho api püpürü kheaknü khanguhde yübah lapung aleanglim azangrü labah.
Mokri Dünkheak Yakzanbo
47Küyimki mokri shihnam yungsho azhingzhing khimmih kheak kihbanü, 48yungsho azhingzhing khim yungsho shihnam khim akeakkhi le amürhekhi yungsho shihküpnü athsükhi tümükhüh kheak kihbanü, 49mürangkhüh jurü kheak phüyakde yungsho mamde lasho, ju abube mokri tukthsü ah, tüsho ju amükeambuh ki huhbeah. 50Amükeambuhnü akheahbah tüsho kukruk ju nimung thüne büthsüde azobah. 51Kheaküshe apinü nimung athüne nipü kheahbah, tüsho mokri ju jurübo ching bua lasho, kukruk ju mümüsüh. 52Akeakkhi yungsho amürhekhi shihnam yungsho azhingzhing khim yungsho shihküpnü athsükhi kheak tukthsü kihsho takabahbah, tümüde ha abube mokri tukthsü ah; ha mo ching takbah.
53Tüshe, amükeambuhnü kheahbahle kukrukbo kheak ju mokri mübua lasho, 54apinü müsühabahpü thiyukhüm jihbah tüsho kheaküshe nimung thüne büthsüde azobah. 55Jushu mü ju müsühabahbah apinü akheahbah, tüsho mübua lalashe aphü mümüthria lasho, ju kheaküshe mümüsüh; mokri akhiukkhi ju kukruk mi kheak yungsho alunglim thsüthsü nünü monü takabahang. 56Tüshe amükeambuhnü kheahlobahle, mokri ju amürung thsüa lasho, apinü ju khim yungsho shihküp chingnü rukkhita bahbah. 57Jushu, mokri ju kukrukbo kheak akhiuklosho, ju abube tukthsü ah, tüsho Atungpuhnü kukruk ju monü atakbah. 58Apinü kukruk ju müsühabahbahle areak kheamsho, apinü müsühloa bahbah, tüsho ha amüsüh labah.
59Jumonü ha, mokri khimmih kheak kihkhi dünkheak, shihnam khim yungsho azhingzhing khim yungsho shihküpnü athsükhi tümükhühbo dünkheak yakzanbo ah; hanangde amüsüh yungsho amümüsühkhi dünkheak thashihpü thiyuzüng lah.
Currently Selected:
LEVI 13: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
